ەگيپەتتەگى سۇلتان بەيبارىس مەشىتىنە قىرۋار اقشا بولىنسە دە، ەشتەڭە جاسالعان جوق - فوتو
«مىسىردا جۇرگەندە 1267 -جىلى ەل بيلەۋشىسى سۇلتان بەيبارىس سالعان عيبادات ءۇيىن كورىپ قايتتىق. اتالعان نىساننىڭ جالپى اۋدانى 10 مىڭ شارشى مەتردى قۇرايدى. 2007 -جىلى قازاقستان مىسىرمەن اراداعى كەلىسىمنىڭ نەگىزىندە مەشىتتى قالپىنا كەلتىرۋ جۇمىستارىنا 4,5 ميلليون دوللار بولگەن بولاتىن. اقشا ءبولىندى، ءبىراق ءتيىستى جۇمىستار ءالى اياقتالعان جوق. مەشىتتىڭ قازىرگى جاعدايىن ءوز كوزىمىزبەن كورگەننەن كەيىن ءال-فارابي مەن سۇلتان بەيبارىس اتىنداعى قوردىڭ جەتەكشىسى ساپار ىسقاقوۆتىڭ الاڭداۋشىلىعى ورىندى دەپ سانايمىز. ءبىزدىڭ ۇكىمەتكە وسى ماسەلەنى باقىلاۋعا الۋ قاجەت. 10 جىلدىڭ ىشىندە ەشتەڭە ىستەلىنگەن جوق. سوندىقتان وسىنى ءجىتى قاداعالاۋعا العان ءجون»، - دەپ جازدى ن. جازىلبەكوۆ ءوزىنىڭ فەيسبۋك پاراقشاسىندا.
ونىڭ سوزىنە قاراعاندا، سۇلتان بەيبارىستىڭ ۇرپاعى - ساميا بەيبارىس تا وسى ماسەلەنىڭ شەشىلۋىن قالايدى. بۇگىندە ول اراب ەلدەرى ليگاسىندا دەپارتامەنت باسشىسى قىزمەتىن اتقارىپ ءجۇر.
ايتا كەتەيىك، 2007 -جىلى مەملەكەت باسشىسى نۇرسۇلتان نازاربايەۆتىڭ مىسىرعا جاساعان رەسمي ساپارىنان كەيىن كايردەگى سۇلتان ءال-زاحىر بەيبارىستىڭ مەشىتىن قالپىنا كەلتىرۋ جۇمىستارىن بىرلەسىپ قارجىلاندىرۋ تۋرالى كەلىسىم زاڭدى تۇردە بەكىتىلگەن ەدى. اتالعان قۇجاتقا سايكەس، قازاقستان قايتارىمسىز نەگىزدە 4,5 ميلليون دوللار بولسە، مىسىر جاعى 20 ميلليون دوللاردى ءوز موينىنا العان.
اۆتور: ارمان اسقاروۆ
