اكەلى-بالالى ماتايەۆتار راقىمشىلىققا ىلىنبەي قالدى

استاناداعى اپەللياتسيالىق سوت اكەلى-بالالى ماتايەۆتارعا كەسىلگەن ۇكىمدى وزگەرتكەن جوق. اپەللياتسيالىق ينستانتسيادان ۇتىلعان ماتايەۆتار ەندى تەرگەۋ يزولياتورىنان اباقتىعا اتتانادى. نەگىزى ادۆوكات سوتقا 200 دەن استام كۋاگەردى شاقىرىپ، جاۋاپ الۋدى جانە ءىستى قايتا تەرگەۋدى تالاپ ەتكەن.

ايتا كەتۋ كەرەك، سەيىتقازى ماتايەۆ 6 جىلعا، ال ونىڭ ۇلى قازتاگ اگەنتتىگىنىڭ ديرەكتورى اسەت ماتايەۆ 5 جىلعا سوتتالعان بولاتىن. ولارعا «الاياقتىق»، «قازىناعا سالىق تولەۋدەن باس تارتتى» دەگەن ايىپتار تاعىلعان.

سەيتقازى ماتايەۆتىڭ ءوزى راقىمشىلىققا ءۇمىت ارتىپ وتىرعان جوق. ويتكەنى كىناسىز ەكەنىن سوڭىنا دەيىن دالەلدەمەك. ال ماتايەۆتىڭ جارى تاركىلەنگەن دۇنيە-مۇلىكتىڭ 50 پايىزى وزىنە تيەسىلى ەكەنىن ايتىپ، ونى قايتارۋدى تالاپ ەتىپ ءجۇر.

«ءالى جوعارى سوت بار. ەگەر ول دا ارىزىمىزدى كەرى قايتارسا، ەۋروپالىق پارلامەنت، حالىقارالىق سوت بار. بۇل تەك ءبىزدىڭ وتباسىمىزعا عانا قاتىستى وقيعا ەمەس، بۇكىل قازاق جۋرناليستيكاسىنىڭ باسىنا تۇسكەن قايعى»، - دەدى سەيىتقازى ماتايەۆتىڭ جارى بايان رامازانوۆا.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى