ەكس-ماجىلىسمەن: قازاق قىزدارى شىمكەنتتىڭ جىگىتتەرىنە كۇيەۋگە شىعۋى كەرەك
شىمكەنتتە وتكەن «تۋعان جەردى تۇلەتۋ - پەرزەنتتىك پارىز» اتتى قامقورلىق اكسياسىنا قاتىسقان ورازكۇل اسانعازى حالىقتى ەل تاۋەلسىزدىگىنىڭ 25 جىلدىعىمەن قۇتتىقتاپ، قازاق ءتىلىنىڭ مارتەبەسىن كوتەرۋ قاجەتتىگىن ەسكەرتتى.
«التىن قۇرساقتى انالار قازاقتىڭ سانىن كوبەيتىپ جاتىر، ەندى ءبىز ساپاسىن كوتەرۋ ءۇشىن بالالاردى قازاق تىلىندە وقىتايىق، انالار. باسقا ءتىلدى بىلە بەرسىن، مىناۋ گوللانديا، انگليا ەلدەرىندە بارلىعى اعىلشىن ءتىلىن بىلەدى. ءبىراق ءبىر-بىرىمەن ەشقاشان اعىلشىن تىلىندە سويلەسپەيدى. بىلىڭدەر، وقىڭدار»، - دەدى ول.
مۇنان سوڭ ورازكۇل اسانعازى حانىم «شىمكەنت» دەگەنگە ۇرەيمەن قارايتىندارعا جاۋاپ ايتتى. ءتىپتى ول ەلىمىزدىڭ وزگە ءوڭىر قىزدارىن شىمكەنتتىك جىگىتتەرگە تۇرمىسقا شىعۋعا ۇگىتتەپ تە ءجۇر ەكەن.
«تاۋەلسىزدىكتىڭ 25 جىلدىعىنا وراي ەلدەگى وقۋ ورىندارىنىڭ ستۋدەنتتەرىمەن كەزدەسۋ ءوتتى. سول كەزدە مەن «قىزدار، قورىقپاستان شىمكەنتتىڭ جىگىتىنە كۇيەۋگە تيىڭدەر! شىمكەنت كەلىندەرىنە ءۇش-اق اۋداندى باسقارتادى. ودان كەيىن وبلىستى باسقارتىپ، جوعارعى كەڭەسكە دەپۋتات ەتىپ جىبەرەدى» دەدىم... ۇناماعانداردىڭ كوزى كۇيسىن. ءبىزدىڭ شىمكەنتتىڭ ۇلى، قىزى، كەلىندەرى ەلباسىعا تىرەۋ بولىپ، كيەلى وبلىسقا باسشى بولىپ كەلگەن جانسەيىت قانسەيىت ۇلى باس بولسىن. ءبىز كۇندىز-ءتۇنى وڭتۇستىك قازاقستانعا قىزمەت ەتۋگە دايىنبىز»، - دەپ ءسوزىن ءتۇيدى ورازكۇل اسانعازى.
اقپارات رەتىندە ايتا كەتەيىك، ورازكۇل اسانعازى جامبىل وبلىسىنىڭ تۋماسى، وڭتۇستىك قازاقستان وبلىسى، سارى اعاش اۋدانىنىڭ كەلىنى. ءبىر سۇحباتىندا وڭتۇستىككە كەلىن بولۋىنا اجەسى قارسىلىق تانىتقانىن ايتقان. الايدا ول قانداي قيىنشىلىق بولسا دا شىدايتىنىن، سەبەبى بولاشاق جارىن شىن سۇيەتىنىن ايتىپ، رايىنان قايتپاعان.
