دوپينگ داۋى: رۋمىن سپورتشىسى بارلىق سىياقىسىنان ايىرىلدى

ەندى، ونىڭ مەدالى ءتورتىنشى ورىن العان قازاقستاندىق اتلەت دەنيس ۇلانوۆقا تابىستالۋى ءتيىس، دەپ حابارلايدى قازاقپارات ءتىلشىسى Vesti.kz سايتىنا سىلتەمە جاساپ.

جاقىن ارادا حالىقارالىق وليمپيادا كوميتەتى سينكراياننىڭ ديسكۆاليفيكاتسياسى بويىنشا ءتيىستى شەشىم شىعارىپ، قولا مەدالدى ۇلانوۆقا تاپسىرۋعا نۇسقاۋ بەرۋى كەرەك. ال رۋمىن زىلتەمىرشىسىن ءومىر باقي سپورتتان شەتتەتۋى ابدەن مۇمكىن. سەبەبى وسىمەن ول ەكىنشى رەت دوپينگ داۋىنا ىلىگىپ وتىر.

ءوز ەلىندە گ. سينكراياننان قولا مەدال ءۇشىن العان بارلىق سىياقىنى الىپ قويدى. ونى وليمپيادا جۇلدەگەرلەرىنە قۇرمەت كورسەتۋ شاراسىنا دا شاقىرعان جوق. ايتا كەتەيىك، بۇعان دەيىن قازاقپارات تىلشىسىنە سۇحبات بەرگەن د. ۇلانوۆ قولا مەدالىن الا الماي جۇرگەنى جايىندا ايتقان.

«ەندى، قازىر رۋمىن (گابريەل سينكرايان - اۆت.) سوتتاسىپ جاتىر. سوندىقتان ءوز مەدالىمدى ءالى العان جوقپىن»، - دەدى ول.

ريو-دە-جانەيرودا وتكەن بيىلعى وليمپيادا ويىندارى كەزىندە 85 كەلىگە دەيىنگى سالماق دارەجەسىندە رۋمىندىق زىلتەمىرشى جالپى ەسەپ بويىنشا 390 كەلى كوتەرىپ، ءۇشىنشى ورىن العان بولاتىن. دەنيس ۇلانوۆ بارلىق مۇمكىندىكتەرىن تۋرا سونداي كورسەتكىشپەن اياقتاعان ەدى. الايدا ءوز سالماعى اۋىر بولعاننان كەيىن ءتورتىنشى ورىندى قاناعات تۇتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى