يليا يلين قايرىمدىلىقپەن اينالىسا بەرەتىن بولادى
«نەگىزىندە مەن قايىرىمدىلىقپەن ءوزىم ويلاعان دارەجەدەگىدەي اينالىسىپ جۇرگەن جوقپىن. مەن سپورتتىق كارەرامدى ەندى عانا اياقتاپ، مەملەكەتتىك قىزمەتكەر نە بولماسا بيزنەسمەن بولامىن. قايىرىمدىلىق دەگەن بۇل رۋحاني دۇنيەمەن بايلانىستى. تۇپتەپ كەلگەندە ءار ادام كۇندە ءبىر قايىرىمدىلىق جاسايدى. ول ءوزىنىڭ جاقىندارى ءۇشىن، بالاسى ءۇشىن، ءتىپتى دوسى ءۇشىن دە بولۋى مۇمكىن. ءار ادام ومرىندە وسىنداي ءبىر ارەكەت جاساۋى كەرەك. قايىرىمدىلىق مەن ءۇشىن ادامداردى بىرىكتىرەتىن فاكتور. ەگەر ءسىز بىرەۋگە بىردەڭەڭىزدى بەرە الاتىن بولساڭىز، ءسىز ونى ەشقانداي قايتارىمسىز ىستەۋىڭىز كەرەك. بۇل بەيبىت ءومىر ءۇشىن قاجەت»، - دەدى سپورتشى جۋرناليستەرگە قازاقستان تاۋەلسىزدىگىنىڭ 25 جىلدىعىنا ارنالعان «مەيىرىمدىلىك كەرۋەنى» اتتى قايىرىمدىلىق كورسەتۋشىلەردىڭ ەكىنشى فورۋمىندا.
اقپارات قۇرالدارى وكىلدەرىنىڭ تاباندى سۇراۋىنىڭ ارقاسىندا يلين ءوزىنىڭ ءبىر جاقسى ءىس ىستەگەنى تۋرالى ايتىپ بەردى. بۇل رەتتە ول ءوزىنىڭ جاساعان جاقسىلىقتارى تۋرالى كوپ ايتۋدى ۇناتپايتىندىعىن دا ەسكەرتە كەتتى.
«بەيجىڭ وليمپياداسىنىڭ سىيلىعىنا مەن سپورت الاڭىن سالدىم. ول جەردە قازىر بالالار جاتتىعىپ ءجۇر. بۇل الاڭ مەن ومىرگە كەلگەن پەرزەنتحانانىڭ ماڭىندا ورنالاسقان. ونىڭ قۇرىلىسىنا جان-تانىممەن مەنىڭ ءوزىم دە قاتىستىم. كەيدە بالالاردىڭ وندا ويناپ جۇرگەندەرىن كورگەندە ىشتەي وسىنداي جاعدايدىڭ قالىپتاسۋىنا مەنىڭ دە ءبىر قوسقان ۇلەسىم بولعان ەكەن عوي دەپ تاڭقالىپ تا قويامىن. مەن ءوزىمنىڭ بەيبىتشىلىك پەن تىنىشتىق سالتانات قۇرىپ جاتقان كىشكەنتاي عانا ومىرىمدە كۇندە از دا بولساق جاقسى ءىس ىستەۋگە تىرىسامىن. ويتكەنى مەيىرىمدىلىك - مەنىڭ ءومىرىمنىڭ قوزعاۋشى كۇشى»، - دەيدى ول.
ايتا كەتەيىك، تۇپتەپ كەلگەندە يلين قايىرىمدىلىقپەن ايتارلىقتاي بەلسەندى اينالىسادى. ول كومەكتى قاجەت ەتەتىندەر ءۇشىن ۇيىمداستىرىلعان اكسيالار مەن ۆەلوجارىستارعا جانە وزگە دە ءتۇرلى شارالارعا قاتىسىپ تۇرادى. جاقىندا حالىقارالىق وليمپيادالىق كوميتەت يليا دوپينگ قولداندى دەگەن كۇدىكپەن چەمپيوننىڭ مەدالدارىن قايتارىپ الاتىنىن جاريا ەتتى. قازاقستاندىقتار سپورتشىعا قولداۋ كورسەتىپ وتىر.
