فرانسيانىڭ مەملەكەتتىك كەڭەسى ءابليازوۆتى رەسەيگە ەكستراديتسيالاۋدان باس تارتتى
قازىرگى ۋاقىتتا ءابليازوۆ پاريجدەن وڭتۇستىككە قاراي فلەري-مەروجي كوممۋناسىنداعى تۇرمەدە وتىر. بۇل ەۋروپاداعى ەڭ ءىرى پەنيتەنتسيارلىق مەكەمە بولىپ تابىلادى. بۇعان دەيىن حابارلانعانداي، ب ت ا بانكىنىڭ بۇرىنعى باسشىسى مۇحتار ءابليازوۆ قازاقستاندا، رەسەيدە جانە ۋكراينادا بارلىعى 11 باپ بويىنشا ايىپتالدى.
2009-جىلدىڭ 6- ناۋرىزىندا ءابليازوۆ حالىقارالىق ىزدەۋگە جاريالاندى. سەبەبى وعان جانە ول باسشىلىق ەتكەن قىلمىستىق توپقا سەنىپ تاپسىرىلعان مۇلىكتى يەمدەنگەندىگى جانە تالان-تاراجعا سالعاندىعى، الداۋ جانە سەنىمگە قيانات كەلتىرۋ ارقىلى بوتەن مۇلىكتى ۇرلاعاندىعى، زاڭسىز جولمەن تابىلعان اقشا قاراجاتتارىن زاڭداستىرعاندىعى، بانك قاراجاتتارىن زاڭسىز پايدالانعاندىعى، وكىلەتتىكتى اسىرا پايدالانعاندىعى جانە قىلمىستىق توپقا باسشىلىق ەتكەندىگى بويىنشا قازاقستان رەسپۋبليكاسى قىلمىستىق كودەكسىنىڭ 176-بابى 3-بولىگىنىڭ «ب» تارماعىمەن، 176-بابى 3-بولىگىنىڭ «ا»، «ب» تارماقتارى بويىنشا - 24-بابىنىڭ 3-بولىگىمەن، 177-بابى 3-بولىگىنىڭ «ا»، «ب» تارماقتارىمەن، 193-بابى 3-بولىگىنىڭ «ب»، «ۆ» تارماقتارىمەن، 220-بابىنىڭ 1-بولىگىمەن، 228-بابىمەن، 235-بابى 3-بولىگىمەن قاراستىرىلعان) ايىپتار تاعىلعان بولاتىن.
بارىنشا كولەمدى جانە كۇردەلى قىلمىستىق ىستەردىڭ ءبىرى بولىپ تابىلاتىن بۇل قىلمىستىق ءىستىڭ كولەمى ەكى مىڭ تومنان اسادى جانە 150 دەن استام ەپيزودتان تۇرادى. ۇيىمداسقان قىلمىستىق توپتىڭ جاساعان ارەكەتتەرىنەن كەلتىرىلگەن شىعىننىڭ انىقتالعان سوماسى 7,5 ميلليارد ا ق ش دوللارىنان اسادى.
قىلمىسكەرلەردىڭ ءىس-ارەكەتى تەك قازاقستان اۋماعىمەن عانا شەكتەلمەگەن، قىلمىستاردىڭ ەلەۋلى بولىگى قازاقستاندا باستاۋ الىپ، باسقا ەلدەر اۋماعىندا، سونىڭ ىشىندە رەسەي فەدەراتسياسى مەن ۋكراينادا اياقتالعان. قىلمىسكەرلەر تەك قازاقستان رەسپۋبليكاسى مەن وتاندىق قارجى ينستيتۋتتارىنا عانا شىعىن كەلتىرۋمەن شەكتەلگەن جوق. قىلمىستىق ارەكەتتەرمەن ءتۇرلى شەتەلدىك مەملەكەتتەر مەن زاڭدى تۇلعالاردىڭ مۇددەلەرىنە نۇقسان كەلتىرىلدى.
اتاپ ايتقاندا، رەسەي فەدەراتسياسىندا رەسەي ورتالىق بانكىنىڭ ءىرى تۇراقتاندىرعىش زايمدارى مەن جەكە تۇلعالاردىڭ سالىمدارى ۇرلاندى. قىلمىسكەرلەردىڭ رەسەي مەن ۋكراينادا كەلتىرگەن شىعىندارىنىڭ سوماسى ميللياردتاعان دوللارمەن ەسەپتەلەدى. وسىعان بايلانىستى، شەتەلدىك مەملەكەتتەردىڭ ءبىرقاتارى وزدەرىنىڭ ىشكى قۇقىقتىق جانە اكىمشىلىك جۇيەلەرىنە سايكەس دەربەس ۇلتتىق مۇددەلەرىن باسشىلىققا الا وتىرىپ، ۇيىمداسقان قىلمىستىق توپتى قىلمىستىق قۋدالاۋدى جۇزەگە اسىرۋدا.
ولاردىڭ ىشىندە رەسەي فەدەراتسياسى مەن ۋكراينانىڭ قۇقىق قورعاۋ ورگاندارى دەربەس قىلمىستىق ىستەرگە تەرگەۋ جۇرگىزۋدە. بىرنەشە مەملەكەتتىڭ تاپسىرماسىنا سايكەس حالىقارالىق ىزدەۋدە جۇرگەن ءابليازوۆ فرانسۋز رەسپۋبليكاسىنىڭ بيلىگىمەن 2013-جىلعى 31- شىلدەدە ۇستالدى. 2013-جىلعى تامىزدا قازاقستان رەسپۋبليكاسى، رەسەي فەدەراتسياسى جانە ۋكراينا ءبىر-بىرىنە تاۋەلسىز، دەربەس تۇردە جانە ءار ەلدىڭ ۇلتتىق زاڭناماسىنىڭ تالاپتارىنا سايكەس ءابلازوۆتى فرانسيادان ەكستراديتسيالاۋ تۋرالى ساۋالدار جولدادى.
