گولوۆكيننىڭ مىقتى قارسىلاسى بولعان جوق، ەندەشە ونى قالاي ۇلى بوكسشى دەي الامىز؟
باسىلىم GGG- ءدىڭ ۇلى بوكسشى ەكەنىنە كۇمان كەلتىرەدى. «گەننادي گولوۆكين - نوكاۋتتار ماشيناسى، ءبىراق ونىڭ كورسەتكىشى الدامشى» ماقالاسى وسى ماسەلەگە ارنالىپتى.
«گولوۆكيننىڭ 36 جەڭىسىنىڭ 33 ءى نوكاۋتپەن اياقتالعان، ول 23 رەت قاتارىنان اتاعىن قورعادى، ءبىراق، وعان ءوزىنىڭ ۇلىلىعىن 160 فۋنت سالماقتاعى مىقتى قارسىلاسىنىڭ الدىندا دالەلدەۋ كەرەك. دەنيەل دجەيكوبس سونداي قارسىلاس پا؟ ولاي ەمەس. ءبىراق ول گولوۆكينمەن وسىعان دەيىن كەزدەسكەن بوكسشىلاردىڭ ىشىندەگى ەڭ قاۋىپتىسى. ولار ءالى گونورار ءۇشىن كۇرەسىپ جاتىر. ەگەر كەلىسىمگە قول قويىلسا، گولوۆكين مەن دجەيكوبس نيۋ-يوركتەگى Madison Square Garden ارەناسىندا كەزدەسەدى. جەكپە-جەك HBO نەمەسە PPV اقىلى ترانسلياتسيا جۇيەسى ارقىلى كورسەتىلۋى مۇمكىن.
ولاي بولا ما، جوق پا بەلگىسىز، ءبىراق بۇل گولوۆكينگە قاجەت جەكپە-جەك. گولوۆكين ءۇش قارسىلاسىن عانا جەڭە الماعان. دەگەنمەن، ونىمەن كەزدەسكەندەر تىم ءالسىز. 2009-جىلى گولوۆكين 10-0 ستاتيستيكاسى بار ميحايل ماكاروۆپەن جەكپە-جەك وتكىزدى. سودان بەرى ول جەڭىلىپ كورمەگەن بوكسشىلارمەن وسى جىلدىڭ باسىنا دەيىن كەزدەسپەدى. سونىمەن بىرگە، ول سىيلى چەمپيوندارمەن از كەزدەستى. ولاردىڭ ىشىندە داۆيد لەمە عانا بەلگىلى.
ەگەر گولوۆكيننىڭ كاسىپقوي بوكستاعى جولىنا كوز جۇگىرتسەك، وندا مىقتى قارسىلاستىڭ بولماعانى انىق بايقالادى. ەندەشە ونى قالايشا ۇلى بوكسشى دەپ ايتا الامىز؟ ونىڭ جاقتاستارى قارسىلاستارىنىڭ قاشىپ جۇرگەنىن ايتادى، ءبىراق ولاي بولا بەرمەگەن شىعار. ۋورد گولوۆيكيننەن قورىقسا، نەگە كوۆاليەۆتەن دە قاشپادى؟ شىن مانىندە ۋورد گولوۆكيندى جەكپە-جەككە شاقىرعان، ال ونىڭ كومانداسى كەلىسسوزدەر ءجۇرىپ جاتىر دەپ جانكۇيەرلەرگە وتىرىك ايتتى. مەن گولوۆكين ءوزىن ەشقاشان كورسەتە المايدى دەپ تۇرعانىم جوق. ءبىراق ونىڭ قولى مىقتى قارسىلاستى جەڭگەننەن كەيىن جوعارى كوتەرىلۋى كەرەك»، - دەپ جازادى Forbes ءتىلشىسى.
ەسكە سالايىق گولوۆكين 2017-جىلى ءتورت جەكپە-جەك وتكىزۋدى جوسپارلاپ وتىر. ءبىرىنشى قارسىلاس دەنيەل دجەيكوبس بولادى. 19- جەلتوقساندا وسى جەكپە-جەك بويىنشا پروموۋتەرلىك ساۋدا وتەدى.
