قازاقستاندا لور دارىگەرلەرى جەتىسپەيدى - اجەنوۆ

 «ءالى كۇنگە دەيىن ەلىمىزدە لور- دارىگەرلەردىڭ جەتىسپەۋشىلىگى بايقالادى. اسىرەسە، بالالاردى ەمدەيتىن لور دارىگەرلەر وتە از. بۇعان قوسا، كوپتەگەن وبلىس ورتالىقتارىندا، ماسەلەن، اقتاۋ،  قىزىلوردا، اتىراۋ، سەمەي سىندى وڭىرلەردىڭ ەمحانالارىندا لور بولىمدەرى قىسقارىپ نەمەسە جابىلۋ ۇستىندە. مۇنىڭ باستى سەبەبى جاسالاتىن وتاعا تولەنەتىن اقشا دەڭگەيىنىڭ تومەندىلىگى بولىپ وتىر. ال وتا جاساۋعا قاجەتتى مەديتسينالىق قۇرالدار مەن جابدىقتاردىڭ قۇنى كوتەرىلىپ كەتكەن. سول سەبەپتى قازىرگى نارىقتىق ەكونوميكا جاعدايىندا كەز كەلگەن اۋرۋحانانىڭ باسشىلارى ءۇشىن ونداي زاماناۋي قۇرال- جابدىقتى ساتىپ الۋ ءتيىمسىز. سوندىقتان دا قازىرگى ۋاقىتتا مۇنداي وپەراتسيالار جاساۋ تەك ۇلكەن ورتالىقتاردا، استانا مەن الماتى قالالارىندا نەمەسە اقىلى مەديتسينالىق ورتالىقتاردا عانا تيىسىنشە باعامەن جاسالاتىن بولعان»، - دەدى ول.

 ونىڭ اتاپ وتۋىنشە، قۇلاق، مۇرىن اۋرۋلارىن دياگنوستيكالىق تەكسەرۋگە ارنالعان نەگىزگى اپپاراتتار مەن وپەراتسياعا قاجەتتى قۇرالداردىڭ ەڭ جاقسىسى ەۋروپالىق سانالادى. دەگەنمەن، سوڭعى ۋاقىتتاردا يزرايل، وڭتۇستىك كورەيا دا بۇل سالادا ءبىرشاما ىلگەرىلەپ وتىر. الايدا، سوڭعى جىلدارى تەڭگەنىڭ دوللارعا شاققانداعى باعامىنىڭ كۇرت وزگەرۋىنە بايلانىستى بۇل اپپاراتتار مەن مەديتسينالىق قۇرال- جابدىقتاردىڭ قۇنى ەكى ەسەگە ءوستى.

«سول سەبەپتى كەز كەلگەن مەديتسينالىق مەكەمەنىڭ ونداي قۇرال- جابدىقتى ساتىپ الۋعا شاماسى جەتە بەرمەيدى. بۇعان قوسا، ولارمەن جۇمىس ىستەيتىن ماماندار تاپشىلىعى دا بار. ونى شەشۋ جولى - دارىگەرلەردىڭ شەتەلدە تاجىريبە جيناۋىنا، ءبىلىم الۋىنا جاعداي جاساۋ. ال ول ءۇشىن ەڭ الدىمەن دارىگەرلەر ءتىل مەڭگەرگەنى ءجون. شەتەلدە ءبىلىم الىپ، تاجىريبە جيناقتاپ كەلگەن دارىگەرلەردى وڭىرلەرگە جىبەرىپ، ءوز تاجىريبەسىمەن بولىسۋىنە جاعداي جاساۋ دا ءجون بولار ەدى»، - دەدى اجەنوۆ.

ونىڭ ايتۋىنشا، ق ر پرەزيدەنتى ءىس باسقارماسى مەديتسينالىق ورتالىعىنىڭ ورتالىق كلينيكالىق اۋرۋحاناسى ورتالىق ازيا اۋماعىنداعى الدىڭعى قاتارداعى مەكەمە سانالادى. سونىمەن بىرگە مەديتسيناسى وتە جوعارى دەڭگەيدە دامىعان الەمنىڭ گەرمانيا، يزرايل، پولشا، وڭتۇستىك كورەيا سىندى ەلدەرىمەن دە تىعىز ىنتىماقتاستىق ورناتقان.

 «بىزدە لور وپەراتسيالارىنىڭ وڭايىنان باستاپ ەڭ كۇردەلىلەرىنە دەيىن جاسالادى. قازاقستاننىڭ تۇكپىر- تۇكپىرىنەن كەلگەن ناۋقاستارعا دا كومەك كورسەتىپ جاتىرمىز. قازىرگى كۇنى كەزەكتە تۇرعان ناۋقاستار سانى 100-دەن اسادى»، - دەدى مەديتسينا عىلىمدارىنىڭ دوكتورى.

 اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى