جالعىزىلىكتى بولۋدىڭ نەسى جامان؟
ءوزىنىڭ سەرىگىن ىزدەۋدەن جالىققان كەزدە، سەنىمسىز سىڭاردان باس تارتقان مەزەتتە، ايتەۋىر سەبەپ تابىلعان سوڭ ايەل ءبىر ءوزى قالۋدى تاڭدايدى.
ءبىراق جالعىزدىقتان ايەل يگىلىك تابۋى ىقتيمال. جالعىزدىق ايەلگە دامۋعا مۇمكىندىك بەرەدى. رۋحاني وسۋگە جول اشادى. بىرىنشىدەن، وزىنە ارنايتىن بوس ۋاقىت قالادى. وقۋ وقيتىن، قىزمەتتە وسەتىن، تابىسىن ەسەلەيتىن ۋاقىت. نەكەدە باقىتسىز ايەلدەر جالعىزىلىكتىلەرگە قاراعاندا پسيحيكالىق دەرتكە نەعۇرلىم بەيىم كەلەدى ەكەن.
سونىمەن، ءسىز جالعىز قالدىڭىز، نەدەن باستاۋ كەرەك؟
ءومىردىڭ ءمانىن تابۋ كەرەك. ءوزىڭىزدى رۋحاني تىنىشتىققا شاقىرىڭىز. قايىرى جوق قارىم- قاتىناستى ساقتايمىن دەپ شارشاپ- شالدىققان كوڭىلىڭىزدى كوتەرىپ، دەمالىڭىز، كۇش- قۋاتىڭىزدى قالپىنا كەلتىرىڭىز. ءوزىڭىزدىڭ مەنىڭىزگە ءۇڭىلىڭىز. قاتەلىكتەرىڭىزدى ساراپتاڭىز. ەلەس قۋىپ ءومىر سۇرگەندى دوعارىڭىز. بۇگىننىڭ شىندىعىن قابىلداڭىز.
ەڭ باستىسى - باقىتسىز ماحابباتىڭىز تۋرالى قۇربى- قۇرداستارمەن، تۋىستارمەن اڭگىمەلەسكەندى دوعارىڭىز. بوس اڭگىمە ءومىرىڭىزدى جەڭىلدەتپەيدى. جالعىزدىقتان قۇتقارمايدى. قايتا كەرىسىنشە، كۇيزەلىسكە يتەرمەلەيدى. بۇل سىزگە كەرەك پە؟
ءوزىڭىزدىڭ كيىم كيىسىڭىزدى، شاش ۇلگىسىن، وزگەرتە الاتىننىڭ ءبارىن وزگەرتىڭىز. فيتنەسكە جازىلىڭىز. باسسەينگە بارىڭىز. ءبي بيلەۋدى ۇيرەنىڭىز. جاڭا كويلەك ساتىپ الىڭىز. وسىنداي ىستەرمەن شۇعىلدانىپ، كوڭىلسىز ويلاردان ارىلۋدى كوزدەڭىز. سوندا ايناعا قاراعان سايىن كوڭىلدى ءوزىڭىزدى كورەسىز. ءوزىڭىزدى بايقاۋدى ۇيرەنەسىز.
كورمە، مۇراجاي، تەاتر سىندى قوعامدىق ورىندارعا ءجيى بارىڭىز. ادامنىڭ تانىمىن كەڭەيتەتىن دۇنيەلەرگە ءمان بەرىڭىز. كىتاپتى كوپ وقىڭىز. جىلتىراق جۋرنالدارعا اۋەستەنبەڭىز. ودان دا كوركەم شىعارما وقىعان ابزال. ول جاعىمسىز ويدان ارىلۋعا سەپتىگىن تيگىزەدى. قوسىمشا ءبىلىم ىزدەڭىز. مىسالى، شەت ءتىلىن مەڭگەرىڭىز، كولىك جۇرگىزۋدى ۇيرەنىڭىز، ءتىپتى بولماسا تاماق جاساۋدى ۇيرەتەتىن كۋرسقا جازىلىڭىز. كيىم تىگۋدىڭ دە پايداسى مول. ەڭ باستىسى جانىڭىزعا جاعاتىن ىسپەن شۇعىلدانىڭىز. سوعان عانا ۋاقىت ارناڭىز.
ءوزىڭىز ءۇشىن ءوزىڭىزدىڭ باعاڭىزدى كوتەرۋ ماڭىزدى. ايەلدىڭ وزىنە دەگەن سەنىمى كۇش- قۋاتتىڭ قاينار كوزى. باياندى بولماعان قارىم- قاتىناس سول سەنىمنەن ايىرادى. مۇنداي كەزدە ايەل زاتى ومىردەن دە، وزىنەن دە ءتۇڭىلىپ كەتەدى. سول ءتۇڭىلۋدى ەڭسەرۋ ءۇشىن ءوزىڭىزدى قايتا جاقسى كورىپ، قايتا باعالاپ ۇيرەنۋگە تۋرا كەلەدى. تۇڭىلۋدەن تەك العا قاراي باعىتتالعان قوزعالىس قۇتقارادى. تەك وزىڭىزگە اياۋشىلىق تانىتپاڭىز. اياۋشىلىق جاقسىلىققا باستامايدى. ادام ءوزىن جاقسى كورىپ ۇيرەنۋى ماڭىزدى. ال، ايەل تارتىمدى بولۋ ارقىلى، وزگەگە ۇناۋ ارقىلى جايقالادى.
وتكەن ءومىردى وتكەن شاقتا قالدىرىڭىز. ءومىردى تازا پاراقتان باستاڭىز. تاعدىر سىزگە جاڭا مۇمكىندىك بەرىپ وتىر. سونى دۇرىس پايدالانا ءبىلىڭىز. ءبىر ەسىك جابىلعاندا، كەلەسىسى اشىلاتىنىن ەسكەرىڭىز. تەك كوزقاراستىڭ باعىتىن وزگەرتۋ قاجەت. سوندا جاڭا مۇمكىندىكتى بايقايسىز.
نەنى وزگەرتۋ كەرەك؟
اينالاڭىزبەن، وزىڭىزبەن ۇيلەسىمدىلىكتە ءومىر ءسۇرىڭىز. ءومىردىڭ ءمانى كەرەكتى ەركەكتى ىزدەۋدەن تۇرمايدى. الەمدە ودان دا بولەك كوپ قىزىق بار. سان الۋان مۇمكىندىكتەر. ءومىردى جەلىسى ۇزىلمەيتىن ساياحات دەپ ەلەستەتىڭىز. وسى بوس ۋاقىتتى پايدالانىپ ءوزىڭىز ارمانداعان ىسكە كىرىسە الاسىز. ءوز ءىسىڭىزدى اشۋعا، ساياحاتتاۋعا، جاقىندارىڭىزعا ۋاقىت بولۋگە، ءوزىڭىزدى جەتىلدىرۋگە، تاعىسىن تاعى. ءسىزدىڭ الدىڭىزدا بۇكىل الەم جاتىر. تەك وزىڭىزگە باقىتتى بولۋعا رۇقسات بەرىڭىز.
«قازىر جانە وسىندا» ۇستانىمىمەن ءومىر ءسۇرۋدىڭ عاجابىن سەزىنىڭىز. ءار ساتتەن جاقسىلىق ىزدەڭىز. ءار مينۋتتىڭ قۇندىلىعىن ءبىلىڭىز. وتكەنگە قاراماڭىز. كەلەشەكتى ۋايىمداماڭىز. بۇگىننىڭ ءوز باقىتى بار.
ءوز قابىلەتىڭىزدى جەتىلدىرىڭىز. جاڭا باستامالارعا پەيىلدى بولىڭىز. كەز كەلگەن مۇمكىندىكتى پايدالانىڭىز.
جۇرەگىڭىزدى جاڭانىڭ بارىنە اشىڭىز. جاڭا اندەردى تىڭداڭىز. تابيعاتتى تاماشالاڭىز. اينالاداعى ادامداردى زەرتتەڭىز. سىزگە قۋانىش سىيلاعان ءار نارسەنى ەستە ساقتاپ قالۋعا تىرىسىڭىز. ءومىر وسىنداي ساتتەردەن تىزبەكتەلەدى.
ءبىراز ۋاقىت وتكەن سوڭ ءومىردى شىنايى قابىلداپ داعدىلاناسىز. ءوز جۇمىسىڭىزدان ءلاززات الاتىن بولاسىز. ويىن- ساۋىقتىڭ ءوزى باسقاشا قۋانىش سىيلايتىن بولادى. دوستارمەن ارالاسۋدىڭ جاڭا بەلەسىنە كوتەرىلەسىز.
كوپ ۋاقىت وتكەن سوڭ وتكەنگە ساراپتاما جاساي وتىرىپ، جالعىزدىقتان ەش ۇتىلماعانىڭىزدى تۇسىنەسىز. اقىماق بولۋدىڭ، جولىڭ بولماۋدىڭ باستى ماقساتى ادامنىڭ مەنىن دامىتۋدىڭ ءبىر باسپالداعى ەكەنىن تۇسىنەسىز. ومىرگە كوڭىلىڭىز تولعان ساتتە سىڭارىڭىز دا تابىلارى ءسوزسىز. ءسىز بۇل كەزدەسۋگە دايىن بولاسىز. رۋحاني تولىساسىز. قاتەلىكتەردىڭ ءبارىن تۇسىنۋگە، قابىلداۋعا، تۇزەتۋگە ەش قينالمايسىز. ءار ءساتتىڭ وزىندىك قۇندىلىعى بارىن ۇمىتپاعايسىز. ءومىردىڭ ءار ءساتى قىمبات!
اۋدارعان شىنار ءابىلدا
