تەگىمىزدىڭ جازىلۋىنا ءمان بەرىلدى

تاۋەلسىزدىكتىڭ 25 جىلدىق مەرەكەسىنە وراي ۇيىمداستىرىلعان شارانىڭ تۇپكى ماقساتى - تاۋەلسىزدىك قۇندىلىقتارىن ناسيحاتتاۋ ارقىلى مەملەكەتتىك تىلگە دەگەن قۇرمەتتى قالىپتاستىرۋ، ءتولقۇجاتتاعى تەگىمىزدىڭ دۇرىس جازىلۋىنا ءمان بەرۋ، قۇجاتتاندىرۋعا جاۋاپتى مەكەمەلەردىڭ قىزمەتىن تانىستىرۋ، ۇلتىمىزعا جات اففيكستەردەن ارىلۋ ماسەلەلەرىنە ارنالدى.

جيىنعا وبلىستىق ونوماستيكا كوميسسياسىنىڭ مۇشەلەرى، وڭىردەگى ءتىل جاناشىرلارى، وبلىستىق ادىلەت دەپارتامەنتى مەن ءبىلىم بەرۋ مەكەمەلەرىنىڭ قىزمەتكەرلەرى، جوعارى وقۋ ورىندارىنىڭ وقىتۋشىلارى مەن بەلسەندى جاستار، جاس اتا- انالار مەن باق وكىلدەرى قاتىستى.

وبلىستىق باسقارما جۇيەلى تۇردە ايماقتاعى ۇلتى قازاق ازاماتتاردىڭ اتى- جونىنە بايلانىستى مەكتەپ وقۋشىلارىمەن، جاڭادان شاڭىراق كوتەرگەن جاس جۇبايلارمەن جالپى قالىڭ جۇرتشىلىقپەن تىعىز بايلانىس جاساپ، ۇگىت- ناسيحات شارالارىنا ۇيىتقى بولىپ كەلەدى. وسىنداي يگى ىستەردىڭ ناتيجەسىندە سوڭعى ءۇش جىلدا دۇنيە ەسىگىن اشقان سابيلەردىڭ باسىم بولىگىنىڭ اتى- ءجونى قازاقشا «- ۇلى»، «- قىزى» جالعاۋلارىمەن جازىلعان. بۇل كورسەتكىشتەر 2013 -جىلى - 52، 2014 -جىلى - 73، ال 2015 -جىلى - 78 پايىزدى كورسەتىپ، «- وۆ»، «- وۆا»، «- وۆيچ»، «- وۆنا» سىندى اففيكستەرسىز تەگىن قازاقى داستۇرگە ساي رەسىمدەگەندەر سانى ارتىپ كەلەدى. بۇل - تاۋەلسىزدىك جەمىسى.

شارانى ۇيىمداستىرۋشىلاردىڭ ايتۋىنشا، تەگىمىزدى تۇزەۋ - وزەكتى ماسەلە. ءومىر تابالدىرىعىن ەندى اتتاعان نارەستەنىڭ اتى- ءجونىن كەڭەس داۋىرىنەن قالعان جالعاۋسىز راسىمدەۋ بۇگىنگى بۋىنعا جۇكتەلىپ وتىرعان مىندەت. بۇل ادامداردىڭ جەكە باسىنا عانا قاتىستى ەمەس، بۇل مەملەكەتتىك ءمانى زور ماسەلە. اتى- ءجونىمىز بەن تەگىمىزدىڭ ورىندى قولدانىلىپ، ولاردىڭ انا تىلىمىزدە جانە ورىس، اعىلشىن تىلدەرىندە ورفوگرافيالىق ەرەجە مەن ادەبي نورماعا ساي جازىلۋىن دۇرىس جولعا قوياتىن كەز جەتتى. «ماڭگىلىك ەلدىڭ» مىزعىماس قۇندىلىقتارى بۇگىننەن باستاپ قالىپتاساتىنىن ۇمىتپايىق.

ش. باقىتجان

«انا ءتىلى» گازەتى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى