تۇرىكتەر سىر وڭىرىنە كۇرىش ەگىپ، شىققان ءونىمدى تۇگەل ساتىپ الماق

تۇركيانىڭ HARMAN كومپانياسىنىڭ وكىلدەرى  قىزىلوردادا ەگىلگەن تۇرىك كۇرىشىنىڭ سورتىن ءوز نارىقتارىنا شىعارۋعا نيەتتى. بۇل تۋرالى قازاقپارات ءتىلشىسى وبلىستىق كاسىپكەرلەر پالاتاسىنا سىلتەمە جاساپ حابارلادى. ەڭ الدىمەن ى. جاقايەۆ اتىنداعى قازاق كۇرىش عىلىمي- زەرتتەۋ ينستيتۋتىندا بولعان قوناقتار سىر ەلىندە وسىرىلەتىن كۇرىش سورتتارىمەن، ولاردىڭ ءوسىرىلۋ تەحنولوگياسىمەن تانىستى.

مۇنان كەيىن پالاتادا جەرگىلىكتى شارۋا قوجالىقتارىنىڭ باسشىلارىمەن كەزدەسىپ، پىكىرلەستى. تۇركيادا كۇرىشتىڭ 1 كەلىسى 1-1,5 دوللار، ياعني 340-500 تەڭگە كولەمىندە تۇرادى ەكەن. تۇرىكتەر ەگەر  قىزىلوردادان سەرىكتەستەر تاپسا، وزدەرىنىڭ تۇقىمدارىن ءبىزدىڭ شارۋا قوجالىقتارىنا وزدەرى اكەلىپ بەرىپ، كەيىن جينالعان استىقتى تولىعىمەن ساتىپ الماق.

ياعني، ءونىمدى وتكىزۋ پروبلەماسى شەشىلەدى. ەگەر سەرىكتەستىك جالعاسىن تاپسا، بارلىق تەحنولوگيالارىن ەنگىزىپ، ەكى-جاقتى ءتيىمدى جۇمىس اتقارماق. تىلشىلەردىڭ «نەلىكتەن  قىزىلوردا تاڭدالىپ وتىر؟» دەگەن ساۋالىنا: «بىرىنشىدەن، تۇركيادا كۇرىش ەگىستىگى ءۇشىن جەر كولەمى شەكتەۋلى، ەكىنشىدەن ول جاقتا وسىرىلگەن كۇرىشتىڭ وزىندىك قۇنى دا جوعارى»، - دەپ جاۋاپ بەردى.

بۇل سەرىكتەستىكتەن ءبىزدىڭ ديحانشىلارىمىز نە ۇتادى؟ تۇركيا ەۋروستاندارتقا وتكەن. سول ءۇشىن دە كۇرىشتى ەگۋ تەحنولوگياسىنىڭ بارلىعى ستاندارتقا ساي بولىپ، باسەكەگە قابىلەتتى بولادى. ءبىزدىڭ ديحانشىلارىمىز وسى تاجىريبەنى وزدەرىنە ەنگىزۋ ارقىلى، الىس شەتەل نارىعىنا شىعۋعا مۇمكىندىك الا الادى. كاسىپكەرلەر پالاتاسىندا بولعان كەزدەسۋدەن كەيىن قوناقتار «ابزال جانە ك» ت س- دە بولىپ، ونىڭ ماتەريالدىق- تەحنيكالىق بازاسىمەن، ەگىستىك القابىمەن تانىستى. وتاندىق ءونىمدى جوعارى باعالاعان تۇرىك باۋىرلارىمىز بازارداعى كۇرىشىمىزدى ساتىپ الدى.

اۆتور: ەلۋباي اۋەزوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى