بىرنەشە شەت ءتىلىن مەڭگەرگەن تاۋەلسىزدىك قۇرداسى ءدىنيسلام اۋىلدا تۇرادى
شالعايدا ورنالاسقان بوزكولدىڭ مەكتەبىن ۇزدىك باعاعا بىتىرگەن ءدىنيسلام سپورتقا اسىرەسە، فۋتبول، ۆولەيبول، باسكەتبولعا قۇمار بولىپ ءوستى. وقۋشى كۇندەرىندە ءبىلىم سايىستارىمەن قوسا، ءتۇرلى سپورت جارىستارىندا اۋداندىق، وبلىستىق دەڭگەيدەگى باسەكەلەردە توپ جاردى. باعى مەن بابى قاتار جانىپ، قاز ۇ ت ۋ- دىڭ ءبىلىم گرانتىن جەڭىپ الدى.
مۇندا دا سپورتتان قول ۇزگەن جوق. ۋنيۆەرسيتەتتىڭ قۇراما كومانداسى ساپىندا ويناپ، ءبىرقاتار جەتىستىكتەرگە جەتتى. دەگەنمەن ءدىنيسلامنىڭ باستى دىتتەگەنى ءبىلىمىن ودان ءارى تەرەڭدەتە ءتۇسۋ بولاتىن. الدىمەن باكالاۆر، سونان سوڭ ماگيستراتۋرادا ءبىلىمىن جالعاستىردى. يسپانيادا، كەيىن يتاليادا ىسكەرلىك تاجىريبەدەن ءوتتى. قايدا جۇرسە دە، ءوزىنىڭ ەلىن ماقتان تۇتىپ، سول جۇرتتىڭ ءتىلىن، ادەت-عۇرپىن مەڭگەرۋگە كۇش- جىگەرىن سالدى. ەڭبەگى بوسقا كەتپەدى. ءدىنيسلام كۇنشىعار ۇلى انا تىلىنەن بولەك ورىس، يسپان، يتاليان، اعىلشىن تىلدەرىندە ەمىن-ەركىن سويلەيدى. كوپتى كورگەن كوسەم بولاتىنى انىق. ءبىلىم قۋعان ءدىنيسلامنىڭ باسىنان دا ءبىرشاما قىزىقتى وقيعالار وتكەن ەكەن. بارسەلونا قالاسىندا الەمدىك دەڭگەيدەگى داڭقتى فۋتبولشىلار نەيمار، سۋارەس، مەسسيدىڭ ويىندارىن كوزىمەن كورىپ، جانكۇيەر بولدى.
جاسىل الاڭدا تەڭبىل دوپتى ۇرشىقتاي ۇيىرگەن تانىمال فۋتبولشىلاردىڭ قيمىلىنا كوز ىلەسپەيدى. ءتىرى ادام ەمەس، قۇددى ءبىر ماشينا دەرسىڭ. كوپشىلىكتىڭ ىشىندە كىمدەر ءجۇرىپ، نەندەي وقيعالار بولمايدى دەيسىز. ريمدە بوتا ەسىمدى قازاق قىزىنىڭ اقشا سالعان اميانىمەن قوسا، ءتولقۇجاتتارىن ۇرلاتىپ العانىن الەۋمەتتىك جەلى ارقىلى بىلگەن سونداعى قازاق جاستارى وعان قولۇشىن سوزعان. كوپشىلىك قۋاتتاسا، وڭعا باسپايتىن ءىس بولار ما؟! قياندا جۇرگەن قارىنداسقا قاجەتتى قارجى جينالدى. قۇجاتتار دا رەتتەلدى. وسىلايشا جات ەلدەگى جاستارىمىز اتا-بابانىڭ تار كەزەڭدە جاقىنىن دالاعا تاستامايتىن ءمارت ءۇردىسىن جالعاستىردى. «كوپكە توپىراق شاشقانىم ەمەس. ەۋروپادا وزدەرىنىڭ استاناسىن، پرەزيدەنتىنىڭ ەسىمى كىم ەكەنىن بىلمەيتىن ادامدار دا بار. الايدا، ولار استانا قالاسى مەن ەلباسىمىز نۇرسۇلتان نازاربايەۆ تۋرالى جاقسى حاباردار بولىپ شىقتى. مۇنى ەستىگەندە كەۋدەمدى ماقتانىش كەرنەدى. يتاليادا سپورت پەن تۋريزم جاقسى دامىعان. وتە مادەنيەتتى حالىق. ۇيرەنەتىن نارسە كوپ»، - دەيدى ءدىنيسلام اعىنان جارىلىپ.
