بولاتبەك ورازبايەۆ «التىن دومبىرا» توڭىرەگىندەگى داۋعا نۇكتە قويدى
«بەكەر داۋرىعا بەرمەيىك. جۇگىرگەن جەتپەيدى، بۇيىرعان كەتپەيدى. كىمگە نەنىڭ قايىرلى ەكەنىن اللا بىزدەن جاقسىراق بىلەدى. مۇحتاردىڭ ونەرىن، ولەڭىن، ادامگەرشىلىگىن، ازاماتتىلىعىن ءوزىم ۇلكەن ساحناعا شىقپاي تۇرعاندا دا تالاي كورگەنمىن. قازاق ايتىسىنىڭ وركەندەپ، وسۋىنە بىردەن- ءبىر ۇلەس قوسقان جىگىتتەردىڭ ءبىرى دەپ ەسەپتەيمىن. وسى جولعى ايتىسقا تورەلىك جاساعان ءادىل قازىلار القاسىنا دا ەش وكپەم جوق. كورەرمەندەر دە ءوز ۇناتقان اقىنى جەڭىسكە جەتكەنىن، جۇلدەلى بولعانىن قالايدى. ول زاڭدى. جۇلدەنى مۇحتار الدى ەكەن دەپ ونىڭ تاراپىنا جانە ءادىل قازىلاردىڭ تاراپىنا جاعىمسىز پىكىر ايتپاعاندارىڭىزدى قالايمىن» ، - دەپ جازادى ول ءوزىنىڭ فەيسبۋك جەلىسىندەگى جەكە پاراقشاسىندا.
سونىمەن بىرگە ول «التىن دومبىرانى» جەڭىپ العان ارىپتەسىنە قولداۋ ءبىلدىرىپ، اقىنداردى بەرەكە- بىرلىككە شاقىردى.
«بايگەنى مۇحتار السا، ول ءوزىمنىڭ دوسىم، باۋىرىم. ءبىرىنشى ورىن جامان ورىن دەپ كىم ايتتى؟ سوندىقتان از عانا دۇنيەگە بولا مۇحتار دوسىما دەگەن كوڭىلىم كىرلەمەيدى. ەش اينىماعان قالپىندا، تازا كۇيىندە قالا بەرەدى. ەڭ باستىسى حالىق ءبىزدىڭ كىشكەنتاي عانا ونەرىمىزگە وڭ باعاسىن بەرىپ جاتسا، مىنە التىن دومبىرا دەگەن سول!!! مۇحتار دوسىمدى جانە جۇلدەلى ورىن العان بارلىق باۋىرلارىمدى شىن جۇرەكتەن قۇتتىقتايمىن! اللا بەرەكەلى قىلسىن!» ، - دەيدى اقىن بولاتبەك ورازبايەۆ.
ەسكە سالا كەتەيىك، الماتىدا ەل تاۋەلسىزدىگىنىڭ 25 -جىلدىعىنا ارنالعان «التىن دومبىرا» رەسپۋبليكالىق اقىندار ايتىسىندا مۇحتار نيازوۆ گران- پري يەگەرى اتانىپ، «التىن دومبىرانى» قانجىعالاعان . اتالمىش ايتىس الەۋمەتتىك جەلىدە قىزۋ تالقىلانىپ، باس جۇلدەگە بولاتبەك ورازبايەۆ لايىق دەپ شۋ كوتەرگەن بولاتىن.
اۆتور: ريزابەك نۇسىپبەك ۇلى
