قازاقستاننىڭ اۋىل شارۋاشىلىعى سالاسىنداعى بولاشاعى زور - بەرند حالليەر
- برەند مىرزا، الماتىدا ءوتىپ جاتقان فورۋم ءسىز ءۇشىن نەسىمەن پايدالى؟
- بۇل الماتى ءۇشىن وتە ماڭىزدى فورۋم. سەبەبى، كوپشىلىك ينۆەستيتسيا استاناعا قاراي تارتىلادى دەپ ويلايدى. فورۋمعا قاتىسۋشىلار مۇندا كەلگەننەن كەيىن، الماتىدا ينۆەستيتسيا سالۋعا بولاتىن نىساندار بار ەكەنىنە كوز جەتكىزدى. فورۋمنان كەيىن مەن ۇيىمداستىرۋشىلارمەن ونلاين- رەجىمدە بايلانىس ورناتامىن. كەلەسى فورۋمعا گەرمانيادان 20-30 قاتىسۋشى اكەلەمىن.
- قازاقستاندا قاي سالاعا ينۆەستيتسيا سالۋ ءتيىمدى دەپ ويلايسىز؟
- لوگيستيكا، تاماق ونەركاسىبى. سونىمەن قاتار، ورگانيكالىق ونىمدەر ءوندىرۋ، تابيعي، ەكولوگيالىق تازا تاماق ءوندىرىسى، الما، كۇرىش، تاعى باسقا دا قازاقستان بەرە الاتىن اۋىل شارۋاشىلىعى ونەركاسىبى ينۆەستورلار ءۇشىن تارتىمدى بولماق. مەنىڭشە، اۋىل شارۋاشىلىعى سالاسىندا قازاقستاننىڭ بولاشاعى زور، سوندىقتان، اۋىل شارۋاشىلىعى جوبالارىن دامىتۋعا ءمان بەرۋ كەرەك. سىزدەردىڭ ەلدەرىڭىزدىڭ الەمدەگى ءىرى اگرومادەني كلاستەرگە اينالۋعا الەۋەتى جەتەرلىك.
- قازاقستان قانداي برەندتەرىمەن تانىمال؟
- قازاقستان تۋرالى استانا، بايقوڭىردى بىلەدى. بۇدان دا تانىمال بولا ءتۇسۋ ءۇشىن شەتەل ب ا ق- تارىنا ءجيى جاريالانۋ كەرەك. ايتا كەتەيىك، بەرند حالليەر فورۋمنىڭ پانەلدىك تالقىلاۋىندا قازاقستاندا حالىقارالىق ۋنيۆەرسيتەت قۇرۋعا مۇددەلى ەكەنىن جەتكىزدى. ول ج و و قازاقستان، تاجىكستان، قىرعىزستان تۋرالى باياندامالار جاساپ، ناقتى اقپاراتتار ۇسىنۋمەن اينالىسپاق. بۇگىن الماتىدا Ritz-Carlton قوناق ۇيىندە الماتى قالاسى اكىمدىگىنىڭ ۇيىمداستىرۋىمەن «Almaty invest-2016» فورۋمى ءوتىپ جاتىر.
جالپى فورۋمعا بەدەلدى ساياساتكەرلەر، الەمدىك جانە وتاندىق بيزنەس كوشباسشىلارى، ينۆەستيتسيالىق كورپوراتسيالاردىڭ باسشىلارى، قارجى ينستيتۋتتارى مەن حالىقارالىق ۇيىمداردان بارلىعى 500-گە تارتا جوعارعى قىزمەتتەردەگى ماماندار كەلدى. فورۋمدا ساۋدا جانە قىزمەت كورسەتۋ سالاسى، تاماق ونەركاسىبى، ىسكەرلىك تۋريزم، مەملەكەتتىك- جەكەمەنشىك ارىپتەستىك جانە يندۋستريالدىق دامۋ سەكىلدى 5 باسىم باعىت بويىنشا الماتى قالاسىنىڭ ينۆەستيتسيالىق مۇمكىندىكتەرى تالقىلاندى.
اۆتور: الماس مۇقاش ۇلى
