الماتى قارجى پوليتسياسىنىڭ بۇرىنعى باسشىسى قامۋعا الىندى

«28- قاراشا كۇنى قاماۋعا الىندى. كۇدىكتى تاراپىنان ق ر ق پ ك- دە كورسەتىلگەن 146-باپتىڭ 2-بولىگى بويىنشا ءۇي قاماقتا ۇستاۋ، شەكتەۋ تالاپتارى بۇزىلدى. ولار قىلمىستىق پروتسەسكە قاتىسى جوق ادامدارمەن تەلەفون ارقىلى سويلەسىپ، ءىس تۋرالى اقپاراتتار بەردى. تامىز ايىنان قاراشا ايى ارالىعىندا ونىڭ تاراپىنان 20 تەلەفون سوعىلدى. بۇل تەلەفون اڭگىمەلەرى ستەنوگراممالىق جازبالار، سىرتقى باقىلاۋ انىقتامالارى، فوتو-كەستەلەر ارقىلى دالەلدەندى. قاۋلىعا شاعىم كەلتىرىلىپ، قالالىق سوتىنىڭ اپەللياتسيالىق سوت القاسى تاراپىنان وزگەرىسسىز قالدىرىلدى»، - دەدى الماتى قالالىق سوتىنىڭ اقپاراتپەن قامتاماسىز ەتۋ ءبولىمىنىڭ جەتەكشىسى دياس ماحامبەتوۆ.

سونىمەن قاتار، ول قاۋلى زاڭدى كۇشىنە ەنگەنىن دە جەتكىزدى. الماتى قالالىق سوتىنىڭ حابارلاۋىنشا، ءامىرحان امانبايەۆ بىرنەشە باپ بويىنشا ايىپتالىپ وتىر.

ناقتىراق ايتقاندا، 28-باپ، 5-بولىك (قىلمىستىق قۇقىق بۇزۋشىلىققا سىبايلاسۋ)، 215-باپ (جالعان كاسىپكەرلىك)، 263-باپ، 4-بولىگى (قىزمەتتىك بابىن پايدالانۋ ارقىلى كومەكتەسۋ، قۇرۋ)، 218-باپ، 3-بولىگىنىڭ 1,3-تارماقتارى (اقشا جىمقىرۋ)، 311-باپ، 5-بولىگى (اسا ءىرى كولەمدە پارا الۋ) بويىنشا ايىپتار تاعىلىپ وتىر. ءىس بويىنشا 36 كۇدىكتى جاۋاپقا تارتىلعان.

اۆتور: الماس مۇقاش ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى