ادىلبەك نيازىمبەتوۆ پەن ۆاسيلي لەۆيتكە وليمپيادا سىياقىسى تابىستالاتىن كۇن انىقتالدى

«ۆاسيلي ليەۆيت پەن ادىلبەك نيازىمبەتوۆكە «التىنعا» بەرىلەتىن وليمپيادالىق سىياقىنى تابىستاۋ ءراسىمى استانادا 8- جەلتوقساندا وتەدى. ءبىزدىڭ سپورتشىلار اسقان شەبەرلىك، مويىماس قايرات پەن بارشا الەمگە ناعىز وليمپيادالىق رۋح تانىتا ءبىلدى»، - دەلىنگەن ق ب ف حابارلاماسىندا.

ەستە بولسا، ريو-دە-جانەيرو وليمپياداسىندا ۆاسيلي لەۆيت پەن ادىلبەك نيازىمبەتوۆ كۇمىس مەدالدار ولجالاعان بولاتىن. الايدا 2016-جىلى 26- تامىزدا ءبىزدىڭ وليمپياداشىلاردى قۇرمەتتەۋ سالتاناتىندا قازاقستان پرەزيدەنتى نۇرسۇلتان نازاربايەۆ ۆاسيلي لەۆيت پەن ادىلبەك نيازىمبەتوۆتىڭ ەڭبەگىن جوعارى باعالاپ، ولارعا التىن مەدال ءۇشىن بەرىلەتىن سىياقىنى بەرۋ تۋرالى شەشىم جاسادى.

«مەملەكەت باسشىسىنىڭ 23- قاراشاسىنداعى تاپسىرماسىن ورىنداۋ ماقساتىندا ۇلتتىق وليمپيادا كوميتەتى ۆاسيلي لەۆيت پەن ادىلبەك نيازىمبەتوۆكە «التىنعا» پارا-پار سىياقىنى تابىستايدى»، - دەپ جازادى ق ب ف.

ەستەرىڭىزگە سالا كەتەيىك، 91 كەلى سالماق دارەجەسى بويىنشا بوكستان وليمپيادالىق تۋرنيردىڭ اقتىق ايقاسىندا تورەشىلەر جەڭىستى رەسەيلىك ەۆگەني تيشەنكوعا بەرگەن بولاتىن. تورەشىلەردىڭ بۇل شەشىمىنە تەك قازاقستاندىق جانكۇيەرلەر عانا ەمەس، الەمنىڭ بوكس سۇيەر جانكۇيەرلەرىنىڭ باسىم بولىگى، سونىڭ ىشىندە رەسەيدىڭ ءبىراز جانكۇيەرلەرى نارازىلىق تانىتقان بولاتىن.

شەتەلدىك ءبىرقاتار باسىلىم دا وسى اقتىق ايقاستا ۆاسيلي لەۆيتتىڭ ۇستەم بولعانىن جازدى. وسىلايشا، لەۆيتتىڭ كۇمىسى التىنمەن پارا-پار بولدى. بۇعان دالەل قازاقستان بوكس فەدەراتسياسى وليمپيادا «كۇمىسىنە» بەرىلەتىن مەملەكەتتىك سىياقى 100 مىڭ دوللاردىڭ ۇستىنە 150 مىڭ دوللار قوسىپ، بۇل سومانى وليمپيادالىق «التىنمەن» تەڭەستىردى.

اۆتور: جاسۇلان جولدىبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى