قازاقستاندا ورمانشىلاردىڭ جالاقىسى ارتاتىن بولدى
«زاڭنامانى جەتىلدىرۋ بويىنشا ۇسىنىستار ءماجىلىس قابىرعاسىندا تالقىعا ءتۇستى. دەپۋتاتتار جۇمىس توبى اياسىندا تۇجىرىمدامالىق تۇرعىدان، قۇقىقتىق رەتتەۋ، رەداكسيالىق سيپاتتاعى تۇزەتۋلەر ەنگىزدى. سونىڭ ىشىندە قوسىمشا شىعىنداردى قاجەت ەتەتىن ۇسىنىستاردىڭ كەيبىرەۋلەرى رەسپۋبليكالىق بيۋدجەتتىك كوميسسيادا قارالىپ، ءىشىنارا قولداۋ تاپتى. اتاپ ايتقاندا، ورمان شارۋاشىلىعى قىزمەتكەرلەرىنىڭ جالاقىسىن 25 پايىزعا كوبەيتۋگە ۇكىمەت كەلىسىم بەرىپ وتىر»، - دەدى ا. مىرزاحمەتوۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە وسىمدىكتەر مەن جانۋارلار دۇنيەسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تانىستىرۋ بارىسىندا.
بۇدان بولەك، ا. مىرزاحمەتوۆ ەرەكشە قورعالاتىن تابيعي اۋماقتاردى باسقارۋعا جۇرتشىلىقتى تارتۋ ماقساتىندا تابيعات قورعاۋ مەكەمەلەرى جانىنان ۇيلەستىرۋ كەڭەسىن قۇرۋ تۋرالى نورمالارىن قابىلداۋدى ۇسىندى.
بۇدان بولەك، ول حالىق قالاۋلىلارىنىڭ نازارىن ەكولوگيالىق تۋريزمنىڭ دامۋىن تەجەپ وتىرعان اكىمشىلىك كەدەرگىلەرىن جويۋعا اۋداردى. «ۇلتتىق پاركتەردىڭ اۋماعىندا ەكولوگيالىق تۋريزمدى دامىتۋ جانە اكىمشىلىك توسقاۋىلداردى جويۋ ءۇشىن تۋراگەنتتەر بولىپ تابىلاتىن جەكە جانە زاڭدى تۇلعالاردىڭ الدىمەن ليتسەنزيالار الۋى بويىنشا تالاپتى الىپ تاستاۋ ۇسىنىلىپ وتىر»، - دەدى ا. مىرزاحمەتوۆ.
ايتا كەتەيىك، پارلامەنت ءماجىلىسىنىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە وسىمدىكتەر مەن جانۋارلار دۇنيەسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا ماقۇلدادى.
اۆتور: رۋسلان عابباسوۆ
