ق ر اسكەري اۋە كۇشتەرى جاڭا تىكۇشاقتارمەن تولىقتى - فوتو
سالتاناتتى شاراعا اسكەري-اۋە كۇشتەرىنىڭ قولباسشىلىعى مەن قازاقستان رەسپۋبليكاسى قارۋلى كۇشتەرى ا ا ك- ءنىڭ ارداگەرلەرى قاتىستى.
«بۇگىن ءبولىم تاريحىنداعى اتاۋلى كۇن. قازاقستان رەسپۋبليكاسى تاۋەلسىزدىگىنىڭ 25 جىلدىعىندا ءبىز سۋ جاڭا تىكۇشاقتاردى العانىمىزعا قۋانىشتىمىز جانە ماقتانىش سەزىمدەمىز. اۆياتسيالىق بازانىڭ بارلىق جەكە قۇرامى اتىنان ۇشۋ جانە ينجەنەرلىك-تەحنيكالىق قۇرام جاڭا اۆياتسيالىق تەحنيكانى ساۋاتتى ءارى قۇنتتاپ پايدالانادى دەپ سەنىممەن ايتا الامىن»، - دەدى اۆياتسيالىق بازانىڭ كومانديرى پولكوۆنيك مارال كارىموۆ.
تىكۇشاقتار بۇدان بۇرىن قازاقستاندىق تاراپ پەن «رەسەي تىكۇشاقتارى» حولدينگى اراسىندا جاسالعان كەلىسىم-شارتقا سايكەس كەلدى. بۇدان بۇرىن اۆيابازانىڭ ۇشۋ جانە ينجەنەرلىك-تەحنيكالىق قۇرامى ءوندىرۋشى زاۋىتتا ۇشۋدىڭ قايتا دايىندىعىنان وتكەن بولاتىن. مي-171ش مي-8 ۇلگىسىندەگى تىكۇشاقتاردىڭ سوڭعى موديفيكاتسيالارىنىڭ بىرىنەن قۇرالعان. تىكۇشاقتىڭ جوعارى ۇشۋ تەحنيكالىق سيپاتتامالارى جانە قاۋىپسىزدىك دەڭگەيى بار.
زاماناۋي قوندىرعىمەن جانە جاڭا ۇلگىدەگى جۇيەلەرمەن جابدىقتالعان. پايدالانۋدا جانە قىزمەت كورسەتۋدە قاراپايىم، تسەلسيا بويىنشا -50-دەن 50+ گرادۋسقا دەيىنگى تەمپەراتۋرا مەن جاعدايدىڭ كەڭ دياپازونىندا قولدانۋ مۇمكىندىگىنە، بەرىكتىلىككە جانە كوپ فۋنكتسيونالدىلىققا يە.
دەسانتتىق- كولىكتىك تاپسىرمالاردى ورىنداۋدان باسقا تىكۇشاقتىڭ اتالمىش ۇلگىسى قۇرلىقتاعى بولىمشەلەردى ۇستاپ تۇرۋ، ياعني، قارسىلاستىڭ جاندى كۇشىن، بروندى تەحنيكانى، بەكىتىلگەن اتىس نۇكتەلەرى مەن وزگە دە جىلجىمالى جانە جىلجىمايتىن نىسانالاردى جويۋ، دەسانتتى اتىسپەن قولداۋ، اسكەري لەكتەردى الىپ ءجۇرۋ، پاترۋلدەۋ، ىزدەستىرۋ-قۇتقارۋ وپەراتسيالارىن جۇرگىزۋ ءۇشىن ارنالعان.
بۇل تىكۇشاقتاردىڭ ەكىنشى پارتياسى ەكەنىن ايتا كەتكەن ءجون. مي-171ش تىكۇشاعىنىڭ العاشقى بۋىنى قازاقستان اسكەري-اۋە كۇشتەرىنىڭ جاراقتاندىرىلۋىنا 2015-جىلدىڭ جەلتوقسان ايىندا كەلىپ تۇسكەن بولاتىن.
