باتىس قازاقستاندىق جاس تالانت ريگادا وتكەن فەستيۆالدا ءۇش مارتە جۇلدەگەر اتاندى

بۇل جونىندە الەۋمەتتىك جەلى بەلسەندىسى ايبولات بوكەنوۆ ءمالىم ەتتى، دەپ حابارلايدى قازاقپارات.

قازاقستان اتىنان ايتۋلى دوداعا تۇسكەن ەرجان ماكسيم اۆتورلىق ءان مەن الەمدىك حيتتەن ءبىرىنشى، حالىقتىق اننەن ەكىنشى ورىندى يەلەنىپ، ءۇش بىردەي مەدالعا قول جەتكىزدى.

«بالام بيىل جازدا الماتىدا وتكەن حالىقارالىق «بوزتورعاي» بالالار شىعارماشىلىعى بايقاۋىندا جەڭىمپاز اتانىپ، حالىقارالىق دودالارعا، سونىڭ ىشىندە كەلەسى جىلى ۆيتەبسكىدە بولاتىن «سلاۆيان بازارىنا» جولداما العان بولاتىن.

«سلاۆيان بازارىنا» بارۋ ءۇشىن وعان دەيىن حالىقارالىق بايقاۋلارعا قاتىسىپ، كوبىرەك ۇپاي جيناۋ كەرەك. وسىنىڭ الدىندا قىركۇيەك ايىندا گرۋزيانىڭ باتۋمي قالاسىندا وتكەن حالىقارالىق بايقاۋدىڭ باس جۇلدەسىن الىپ كەلدى. ەندى، بۇيىرسا، الداعى جىلى يتاليانىڭ سان-رەمو قالاسىندا وتەتىن جاس ورىنداۋشىلاردىڭ حالىقارالىق فەستيۆالىنە قاتىسۋى كەرەك. ونىڭ ءبىر ەرەكشەلىگى، ءاندى وركەسترگە قوسىلىپ يتاليان تىلىندە ورىندايدى. بالام ورال قالاسىنداعى 34№ ورتا مەكتەپتە وقيدى. اننەن ۇستازى - ع. قۇرمانعاليەۆ اتىنداعى وبلىستىق فيلارمونياسىنىڭ ءسوليسى داريا باقىتوۆا. ەرجان جەتى جاسىندا ماسكەۋدە وتكەن «بەگۋشايا پو ۆولنام» فەستيۆالىنىڭ باس جۇلدەسىن العان ەدى. ودان بەرى دە حالىقارالىق، رەسپۋبليكالىق بايقاۋلاردا وزا شاۋىپ ءجۇر. دارىنىنا بوگەت جاسامايىق، جولىن اشايىق دەگەن ويمەن، وسى جولى قارجىدان قانشا قينالساق تا، نەسيە الىپ، اناسى گۇلميرا ەكەۋىن ريگاعا جىبەرگەن ەدىك، ولار بۇگىن كەشكە كەلەدى»، دەدى قازاقپارات تىلشىسىنە ەرجاننىڭ اكەسى ەربول نۇعمانوۆ.

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى