سوعىس تۋرالى سوعىسسىز، سەزىم تۋرالى سەزىمسىز فيلم
ستيۆەن نايتتىڭ سەناريى بويىنشا روبەرت زەمەكيس تۇسىرگەن «وداقتاستار» - ۆيزۋالدى ەستەتيكاسى جاعىنان وتە ادەمى فيلم. بۇل تۇرعىدان ارلەۋشىلەر مەن ستيليستەر جۇمىسىن اتاپ وتپەۋ مۇمكىن ەمەس. ترەيلەرىن تاماشالاپ، اتالمىش فيلمدى كورەمىن دەگەن شەشىم قابىلداۋعا دا وسى كوركەم سۋرەتكەرلىك العاشقى تۇرتكى بولارى انىق. ال، فيلم ترەيلەرى «ۋادە بەرگەندەي» سونشالىقتى كەرەمەت پە؟!
فيلمنىڭ وقيعاسى 1942-جىلعى سولتۇستىك افريكاداعى ءشول دالا پەيزاجىنىڭ سيقىرىن بەينەلەگەن پوەتيكالىق كادردان باستالادى. برەد پيتتىڭ سومداۋىنداعى كانادالىق بارلاۋ قىزمەتىنىڭ وفيتسەرى ماكس ۆاتان (تەگى «وتان» دەگەن ماعىنادا) العاش رەت اكتريسا ماريون كوتيار كەيىپكەرى ماريانن بوسەجۋرمەن جولىعادى. العاشقى ساتتەن-اق ەكەۋىنىڭ اراسىندا سەزىم ۇشقىنى پايدا بولىپ، ارنايى تاپسىرما ءساتتى اياقتالعان سوڭ، لوندونعا بارىپ ۇيلەنەدى. اراعا جىل سالىپ، «جۇبايىڭ نەمىس شپيونى بولۋى مۇمكىن» دەگەن ءسوز باقىتتى وتباسىلىق ءومىردىڭ شىرقىن بۇزىپ، باس كەيىپكەردىڭ جان تىنىشتىعىن ۇرلايدى. بۇل وقيعا - فيلمنىڭ نەگىزگى شيەلەنىسكەن تۇسى.
ادەتتە فيلمنىڭ كۋلميناتسيالىق ءساتى العاشقى 20 مينۋتتا بەلگىلى بولىپ، ودان كەيىنگىسى سونىڭ نەگىزىندە ءوربىپ وتىرۋشى ەدى. ال، زەمەكيستىڭ جاڭا فيلمىندە وعان جەتكەنشە كورەرمەن زارىعىپ تىنادى. ويتكەنى، العاشقى 1 ساعات بويى قۇددى ءبىر ماحاببات تۋرالى ۇزا-ا-اق كليپ كورگەندەي اسەردە بولاسىڭ. جاي عانا تالاي ءاننىڭ ۆيدەو نۇسقاسىنا ارقاۋ بولعان ەڭ اتاقتى قىلمىسكەر جۇپ بونني مەن كلايدتىڭ تاعدىرىنان سىر شەرتەتىن كەزەكتى كليپ سەكىلدى. ايىرماشىلىعى - گولليۆۋدتىق دەڭگەي.
اسكەري بارلاۋشىلار نەمەسە سوعىس تۋرالى فيلم دەۋگە اۋزىڭ بارمايدى. سوعىستىڭ جاڭعىرىعى ەمىس-ەمىس. ءتىپتى مۇلدەم جوق. اتالمىش كاتەگورياعا جاتاتىن فيلمدى كورگەندە، كورەرمەن ءوزىنىڭ بايقامپازدىعىن سىناپ، فيلمنەن سوڭ پايىمداۋلارىنىڭ نە قاتە، نە دۇرىس ەكەنىنە كوز جەتكىزۋشى ەدى. كينو تامالاشالاۋشى قاۋىمنىڭ كوكەيىن ويلار مازالاپ، سول سوعىستىڭ ورتاسىندا جۇرگەندەي تۋىندىمەن ەتەنە بايلانىستا بولاسىڭ.
«وداقتاستاردا» بارلاۋشى تۋرالى فيلمدەرگە ساي شيەلەنىسكەن ينتريگانىڭ ۇتىمسىز بالاماسى عانا. سوعىس تاقىرىبىنداعى كينوعا قاتىستى ناستولگيالىق كۇي كەشۋشىلەرگە اتالمىش جاڭا تۋىندىدان گورى، ەسكى رەسەيلىك «كلاسسيكاعا» اينالىپ ۇلگەرگەن فيلمدەرگە جەتەرى جوق.
ويناۋ شەبەرلىگىنە كەلەتىن بولساق، اكتەرلەر وقيعا جەلىسىنىڭ تەتىگى بولعان «كەز كەلگەننىڭ ۋىسىنا تۇسپەيتىن، كەز كەلگەننىڭ باقشاسىندا پىسپەيتىن» شىن ماحابباتقا سەندىرە المادى. تەك قوس عاشىقتى عانا كورسەتەتىن 2 ساعاتتىق فيلمنىڭ ءبىر عانا كادرى ولاردىڭ ءبىر-بىرىنە دەگەن نازىك سەزىمىن جەتكىزگەندەي بولدى.
ول - ۇيلەنۋ تويىنداعى تولعان قوناقتىڭ ىشىندە جاڭا عانا شاڭىراق كوتەرگەن جاس جۇبايلاردىڭ تۇڭعيىق كوزقاراسى، ءۇنسىز تىلدەسۋى. ميلليونداعان ادامداردىڭ ىشىندە تەك ەكەۋدىڭ وزگەگە بەيمالىم الەمى بولاتىنىن شەبەر كەستەلەگەن. وسى سەزىمگە تولى كادردا دا، جالپى فيلمدە دە اتاعى جەر جاراتىن برەد پيتتكە قاراعاندا، جانىنداعى سەرىكتەسى ماريون كوتيار - الدەقايدا اسەرلى، الدەقايدا شەبەر.
ەندىگى ماسەلە - وقيعا جەلىسىنىڭ وسالدىعى. فيلمنىڭ العاشقى بولىگىندە ايرىقشا قابىلەتىمەن تانىلعان ماريانن بوسەجۋر ناتسيستىك بوپسالاۋعا قالايشا وڭاي كونە قويدى؟ ونىڭ ۇستىنە ارنايى تاپسىرما ورىنداۋدا تەڭدەسى جوق بارلاۋشى ماكس ۆاتان جۇبايىنىڭ نەمىس تىڭشىسى ەكەنىن قالاي اڭعارماعان؟ ۇتىمدى بارلاۋشىلىق فيلمدەر كورۋگە داعدىلانعان ازۋى وتكىر كورەرمەندەردىڭ مۇنداي تۇسىنىسپەۋشىلىكتەرگە كوز جۇمۋىنا فيلمنىڭ كوز تويماس كوركەمدىگى كومەكتەسە الار ما ەكەن؟
