ايبەك قاليەۆ: «التىن دومبىرا» ايتىسى ەل اراسىنا ىرىتكى سالاتىن بولسا، وتكىزبەي-اق قويۋ كەرەك
اقىنداردىڭ ونەرىن ق ر ەڭبەك سىڭىرگەن قايراتكەرى امانجول التايەۆ، قازاقستاننىڭ حالىق اقىنى قونىسباي ءابىلوۆ، فيلولوگيا عىلىمدارىنىڭ دوكتورى قويلىباي اسانوۆ، «دارىن» سىيلىعىنىڭ لاۋرەاتى مۇحامەدجان تازابەك، «دارىن» سىيلىعىنىڭ لاۋرەاتى داۋلەتكەرەي كاپ ۇلى سىندى تانىمال اقىنداردان جاساقتالعان قازىلار القاسى باعالادى.
قازىلار القاسىنىڭ شەشىمىمەن قىزىلوردالىق اقىن مۇحتار نيازوۆ «التىن دومبىرا» يەگەرى اتاندى. وسىمەن ەكىنشى رەت باس جۇلدەنى يەلەنگەن مۇحتاردىڭ جەڭىسى تۋرالى داۋ تاۋسىلار ەمەس.
بۇل تۋرالى مۇحتاردىڭ ءوزى قازاقپارات تىلشىسىنە بەرگەن سۇحباتتا: «مەنىڭ «التىن دومبىرانى» الۋىم كەزدەيسوقتىق ەمەس. مەن وسى جىلدىڭ باسىنان بەرى تاشكەنتتە، قىزىلوردادا وتكەن حالىقارالىق ايتىستاردان باس جۇلدەنى ەنشىلەدىم. اتىراۋدا، اقتوبەدە دە رەسپۋبليكالىق ايتىستاردان جەڭىمپاز اتانىپ، بيىلعى اقىنداردىڭ رەيتنيگىندە ءبىرىنشى ورىندا تۇرمىن. وسىعان دەيىن ناتيجەسىز كەلىپ، اياق-استىنان «التىن دومبىرانى» الدەبىرەۋلەردىڭ ىقپالىمەن الىپ كەتە سالعان جوقپىن. سوندىقتان، ساحنادا ايعاي-شۋ بولىپ جاتسا دا، وزىمە سەنىمدى، جوعارى كوڭىل كۇيدە بولدىم. حالىقتىڭ شۋ كوتەرۋىنەن تۇسىنگەنىم، بولاتبەك الماتىنىڭ تۋماسى بولعاندىقتان، وزدەرىنىڭ ىشكى سەزىمىندە «التىن دومبىرانى» الماتىدا الىپ قالامىز دەپ، ونىڭ يەسىن الدىن الا وزدەرى بەلگىلەپ قويۋىنان دەپ ويلايمىن»، - دەگەن ەدى.
وسى ورايدا تانىمال ايتىسكەر اقىن ايبەك قاليەۆ تە ءوز پىكىرىن ءبىلدىرىپ ءوتتى. «ەكى-ءۇش كۇننەن بەرى «التىن دومبىرا» توڭىرەگىندەگى داۋ تولاستار ەمەس. ەكى جاقتى دا تۇسىنۋگە بولادى. مەن دە ەكى وتتىڭ اراسىندا ەكى ۇداي سەزىمدە قالدىم. مۇحتارجاننىڭ دومبىرانى العانىنا قانشالىقتى قۋانسام، اقبوكەنىمنىڭ الماعانىنا سونشالىقتى قىنجىلدىم.
الەۋمەتتىك جەلىدە مۇحتاردىڭ اتىنا قانشاما اڭگىمەلەر ايتىلىپ جاتىر، جول شىنىمەن دە بولاتبەكتىكى ەدى، ءبىراق مۇحتاردا كىنا جوق قوي. مۇحتارعا جاقسىلىق جاسايمىن دەگەن كەيبىر قازىلار، كەرىسىنشە كورەرمەن جۇرتتى وعان قارسى قويىپ قيانات جاساپ قويعان سياقتى. مۇحتار دا، بولاتبەك تە مەنىڭ ەڭ جاقىن ارالاساتىن، تۋعانىمداي بولىپ كەتكەن باۋىرلارىم. ەكەۋى دە پەندەشىلىكتەن جوعارى تۇرعان ازاماتتار.
اقىن دەگەن ءبىر اۋىز جىلى سوزگە مارقايىپ قالاتىن، ءبىر اۋىز سۋىق سوزگە جۇرەگى اۋىراتىن جاندار عوي. سوندىقتان دا ەكى ءدۇلدۇلىمىزدىڭ اراسىنا كىربىڭ ءتۇسىرىپ، جاندارىن جارالاپ المايىقشى، اعايىن!
قازىرگى ايتىستا شاپپا-شاپ ايتىستا، سۋىرىپ سالمالىقتا مۇحتاردىڭ الدىنا تۇسەتىن، جىرىنىڭ كوركەمدىگى جاعىنان اقبوكەننەن وزاتىن اقىن جوق. ەكەۋى دە باسى مەن بولىپ ايتىس اقىندارى تاراپىنان مويىندالىپ قويعان. ەلدى بىرلىككە شاقىراتىن «التىن دومبىرا» ايتىسى وسىلايشا ەل اراسىنا ىرىتكى سالاتىن بولسا، ەندى وتكىزبەي-اق قويۋ كەرەك شىعار»- دەپ جازدى اقىن فەيسبۋكتەگى پاراقشاسىنا.
اۆتور: گۇلدەن وسپانوۆا
