استاناداعى «استانا بالەت» تەاترى جاڭا عيماراتقا يە بولدى
جاڭا ساحناداعى العاشقى سپەكتاكلدەر 2016 -جىلعى 10-11 -جەلتوقساندا وتەدى. تەاتردىڭ جالپى كولەمى 15,4 مىڭ شارشى مەتر. عيماراتتىڭ ءوزى دە، ونىڭ ينتەرەرى دە زاماناۋي ستيلدە بەزەندىرىلگەن. كورەرمەن زالىندا 783 ورىن بار (609 ورىندىق پارتەر، 104 ورىندىق بالكوننىڭ 2 يارۋسى، 70 ورىندىق بالكوننىڭ 3 يارۋسى).
زالدى بەزەندىرگەندە بايسالدى، اسىل رەڭك قولدانىلعان: التىن - قوڭىر ءتۇستى شىمىلدىق، كرەسلولار شافرانمەن قاپتالعان، ەدەن قوڭىر ءتۇستى. كورەرمەندەرگە ىڭعايلى بولۋ ءۇشىن ەكى بۋفەت اشىلعان ءارى فويەسى كەڭ. تەاترعا كەلگەن سايىن، كورەرمەن قاۋىم ۇمىتىلماس وقيعالارعا قانىق بولىپ، ادامزات ونەرىنىڭ جوعارعى ۇلگىسى - حورەوگرافيادان ءنار الىپ، ناعىز مەرەكەلىك كوڭىل- كۇيگە بولەنەدى.
ساحنانىڭ اۋدانى 536 شارشى مەتر. ساحنا ءتورت كوتەرىپ-ءتۇسىرۋ پلانشەتى مەن ءتورت ارتىستىك كوتەرگىشپەن جابدىقتالعان. وركەستر ۇڭگىرى 50-60 مۋزىكانتقا ىڭعايلانعان. «استانا بالەت» تەاترىنىڭ ساحناسىندا ستسەنوگرافياسى كۇردەلى سپەكتاكلدەر قويۋعا بولادى. «استانا بالەت» تەاترى ساحناسىنىڭ مۇمكىندىكتەرى رەجيسسەرلەر مەن سەنوگرافتاردىڭ بىرەگەي يدەيالارىن جۇزەگە اسىرۋىنا جول اشادى. جارىق بەرۋ كەشەنىندە ءداستۇرلى تەاتر قوندىرعىلارى جانە جۇيەلەرىمەن قاتار، وسى سالاداعى سوڭعى يننوۆاتسيالىق جاڭالىقتار قولدانىلعان. 600-800 جارىق جابدىقتارى ورناتىلىپ، سونىڭ ارقاسىندا كوركەم جارىقتى جوعارى ساپادا جاساۋ مۇمكىندىگى بار.
سونىمەن قاتار، ارنايى تەحنيكا بەينەپروەكتسيانىڭ بار مۇمكىندىكتەرىن قولدانۋعا مۇمكىندىك بەرەدى. ساحنانىڭ تەحنيكالىق مۇمكىندىكتەرى تەاتردىڭ كوركەمدىك- قويۋشىلىق ارتىقشىلىقتارىن ارتتىرىپ، ءتۇرلى جانر مەن ستيلدەگى سپەكتاكلدەردىڭ قويىلىمىن جۇزەگە اسىرۋعا مۇرشا بەرەدى. جاڭا تەاتردىڭ وسى ەرەكشەلىكتەرى كورەرمەن قاۋىمنىڭ دا، رەجيسسەرلەردىڭ دە نازارىن وزىنە اۋدارارى ءسوزسىز.
جاڭا عيمارات كەز-كەلگەن تەاتر ۇجىمىن قابىلداي الادى: بالەت، وپەرا، دراما. وسى كۇنى بۇل - قازاقستاننىڭ تەحنيكالىق تۇرعىدان جوعارى ساپالى جابدىقتالعان امبەباپ تەاترى. ساحنانىڭ پارامەترلەرى مەن مۇمكىندىكتەرى جاڭا تەاتردا ءتۇرلى مادەني شارالار مەن شىعارماشىلىق كەشتەردى، سيمفونيالىق جانە ەسترادالىق وركەسترلەردىڭ كونسەرتتەرىن، ءتۇرلى ارنايى اسەرلەر قولدانىلاتىن زاماناۋي شوۋ مەن ميۋزيكلدەردى ءمىنسىز وتكىزۋگە مۇرشا بەرەدى. سوڭعى جىلدارى استاناداعى تەاترسۇيەر اۋديتوريا ۇلعايىپ كەلەدى.
«استانا بالەت» تەاترىنىڭ جاڭا عيماراتى ەلورداسىنىڭ مادەني ءومىرىن ودان ءارى جاڭعىرتىپ، تارتىمدى ءارى قىزىقتى ەتە تۇسەرى ايقىن. جاڭا تەاتردىڭ اشىلۋى ونەرگە دەگەن مەملەكەتتىك قولداۋ مەن قامقورلىقتىڭ بەلگىسى. ەلورداسىندا جاڭا تەاتردىڭ اشىلۋى تۇرعىنداردىڭ ءومىرىنىڭ الەۋەتىن ءوسىرىپ، استانانىڭ يميدجىن اسىرىپ، ونىڭ باسەكەگە قابىلەتتىلىگىن ارتتىرا تۇسەتىنى داۋسىز. وسى كۇنى استانادا جوعارى ساپالى شىعارماشىلىق تۋىندىلاردى شىعارۋعا مۇمكىندىك اشىلدى. جاڭا تەاتر جاس رەجيسسەرلەر، سەنوگرافتار مەن ارتىستەردىڭ ساحناداعى شىعارماشىلىق ىزدەنىستەرىن جۇزەگە اسىرۋعا جول اشادى. «استانا بالەت» تەاترى «قازاق ۇلتتىق حورەوگرافيا اكادەمياسىنىڭ» جانىندا ورنالاسقان.
