داڭق كىتابىنا جوعارى دارەجەلى ماراپاتقا يە بولعان تۇلعالار ەنگىزىلەدى
سالتاناتتى شاراعا «داڭق كىتابىنا» ەنگەن ماراپات يەگەرلەرى مەن ساياساتكەرلەر، مەملەكەت جانە قوعام قايراتكەرلەرى، تاريحشىلار، زيالى قاۋىم وكىلدەرى قاتىستى. قازاقستان رەسپۋبليكاسى ۇكىمەتىنىڭ 2010 -جىلعى 3 -ماۋسىمدا بەكىتىلگەن «قازاقستان رەسپۋبليكاسىنىڭ داڭق كىتابى تۋرالى» №538 -قاۋلىسى نەگىزىندە «داڭق كىتابىن» جۇرگىزۋ جانە ساقتاۋ ۇلتتىق مۋزەيگە تاپسىرىلعان بولاتىن.
اتالعان قاۋلىدا كورسەتىلگەن ەرەجەگە سايكەس جارىققا شىققان «داڭق كىتابىن» ۇلتتىق ۇلاننىڭ ساربازدارى سالاتاناتتى تۇردە ۆيتريناعا قويادى. الداعى ۋاقىتتا «داڭق كىتابى» ۇلتتىق مۋزەيدىڭ تاۋەلسىزدىك زالىنداعى مەملەكەتتىك ماراپاتتار ۆيتريناسىنىڭ ەكسپوناتى رەتىندە مۋزەيگە كەلۋشىلەردىڭ نازارىنا ۇسىنىلادى.
شارانىڭ العى ءسوزىن اشىپ بەرگەن مادەنيەت جانە سپورت مينيسترلىگىنىڭ جاۋاپتى حاتشىسى قۋاتجان ۋاليەۆ: «بۇگىنگى بولىپ وتىرعان ءىس- شارا ءبىزدىڭ 25 جىلدىق تاۋەلسىزدىگىمىزدىڭ تاريحىنداعى ەلەۋلى وقيعالاردىڭ ءبىرى. ەلباسىمىز ن. ءا. نازاربايەۆتىڭ: «بۇگىنىمەن ماقتانا الماعان ەل - وتكەنىمەن عانا ماقتانادى»، - دەگەن ءسوزى بار. ال قازاق حالقى تەك وتكەنىمەن ەمەس، بۇگىنىمەن دە، بولاشاعىمەن دە كەۋدەسىن كەرە ماقتانا الادى. بۇگىنگى تۇساۋى كەسىلىپ، تۇعىرىنا ورناتىلىپ وتىرعان «داڭق كىتابى» سونىڭ بىردەن-ءبىر ايعاعى دەۋىمىزگە بولادى»، - دەدى. ۇلتىمىزعا ەڭبەگى سىڭگەن 292 تۇلعانىڭ ەسىمى جاريالانعان «داڭق كىتابىنىڭ» ەلەكتروندى نۇسقاسىنىڭ لەنتاسىن قوعام جانە مەملەكەت قايراتكەرى ومىربەك بايگەلدى مەن حالىق قاھارمانى باقىتجان ەرتايەۆ كەستى.
«داڭق كىتابىنا» ەڭ جوعارى دارەجەلى ەرەكشەلىك بەلگىسىنە، «التىن قىران»، «وتان»، «قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازاربايەۆ» وردەندەرىنە جانە «حالىق قاھارمانى»، «قازاقستاننىڭ ەڭبەك ەرى» اتاقتارىنا يە بولعان ازاماتتار تۋرالى جازبالار ەنگىزىلەدى. جازبا تەك مەملەكەتتىك تىلدە جۇرگىزىلەدى.
