ءبىز جۇرگىزىپ وتىرعان ساياسات الەمدىك تاجىريبەگە ساي كەلەدى - نازاربايەۆ

بۇل تۋرالى اقوردانىڭ باسپا ءسوز قىزمەتىنەن حابارلادى.

مەملەكەت باسشىسى ءىس- شارا اياسىندا تاۋەلسىزدىكتىڭ 25 جىلىنداعى يندۋستريالىق دامۋدىڭ نەگىزگى كەزەڭدەرىنە ارنالعان فوتوسۋرەت كورمەسىن ارالاپ كوردى. تەلەكوپىر بارىسىندا ەلىمىزدىڭ بارلىق وڭىرىنەن 23 تىكەلەي قوسىلىم جۇزەگە اسىرىلىپ، جۇمىس ىستەپ تۇرعان نىساندار تانىستىرىلدى جانە يندۋستريالاندىرۋ كارتاسىنىڭ مەيلىنشە ءىرى جوبالارى ىسكە قوسىلدى. نۇرسۇلتان نازاربايەۆ يندۋستريالىق دامۋ ەلىمىزدىڭ ەكونوميكاسى ءۇشىن ماڭىزدى مىندەت بولىپ سانالاتىنىن اتاپ ءوتتى.

«ءبىز ەكونوميكانى ءارتاراپتاندىرۋعا جانە شيكىزاتتىق ەمەس سالانى قارقىندى دامىتۋ جولىنا قاراي ايقىن باعىت ۇستادىق. ۇدەمەلى يندۋستريالىق- يننوۆاتسيالىق دامۋدىڭ 2010-2014 -جىلدارى ىسكە اسىرىلعان مەملەكەتتىك باعدارلاماسى ءوز ناتيجەسىن بەردى. جاڭا تاريحىمىزدا وڭدەۋ ونەركاسىبى العاش رەت تاۋ- كەن ونەركاسىبىنە قاراعاندا جەدەلىرەك دامي باستادى»، - دەدى قازاقستان پرەزيدەنتى.

 ەلباسى ءتيىستى ينفراقۇرىلىمدى دامىتۋ باعىتىندا اۋقىمدى جۇمىس اتقارىلىپ جاتقانىن ايتتى.

«سەنىمدى ەنەرگەتيكالىق جۇيە قۇرىپ، شىعىستان باتىسقا جانە سولتۇستىكتەن وڭتۇستىككە دەيىنگى كولىك دالىزدەرىن قالىپتاستىردىق، باعدارلاردىڭ ءارتۇرلى بولۋىنا جانە ولاردىڭ ءبىر- ءبىرىن ءوزارا تولىقتىرۋىنا دەن قويدىق. وڭدەۋ ونەركاسىبىنىڭ مەتاللۋرگيا، حيميا، مۇناي وڭدەۋ، ماشينا جاساۋ جانە ازىق- تۇلىك ءوندىرۋ سياقتى باسىمدىعى بار سالالارىنا زور ءمان بەرىلىپ وتىر»، - دەدى مەملەكەت باسشىسى.

 نۇرسۇلتان نازاربايەۆ يندۋستريالاندىرۋ جىلدارى جالپى كولەمى 4,6 تريلليون تەڭگە بولاتىن 1 مىڭنان استام جوبا جۇزەگە اسقانىن اتاپ ءوتتى.

 «100 مىڭعا جۋىق تۇراقتى جۇمىس ورنى اشىلدى، «گلوبال 2000» تىزىمىندەگى 30-عا جۋىق ترانسۇلتتىق كورپوراتسيا ىسكە تارتىلدى. تەمىرجول ماشينالارىن جاساۋ سالاسى جاڭادان قالىپتاستىرىلدى. ەكسپورتتىق جاڭا تاۋارلار، سونىڭ ىشىندە مۇناي ونىمدەرى، اككۋمۋلياتور، ترانسفورماتور، مەتاللۋرگيالىق جاڭا تاۋارلار، ماشينا جاساۋ ونىمدەرى جانە باسقا دا كوپتەگەن ءونىم تۇرلەرى شىعارىلا باستادى»، - دەپ تۇيىندەدى ءسوزىن قازاقستان پرەزيدەنتى.

ەلباسى دۇنيەجۇزىلىك بانكتىڭ «بيزنەس جۇرگىزۋ جەڭىلدىگى» رەيتينگىندە رەسپۋبليكامىز الەمنىڭ 190 ەلى اراسىندا 35-ورىنعا كوتەرىلگەنىن ايتتى. سونىمەن بىرگە، مەملەكەت باسشىسى جەدەل وزگەرىپ جاتقان مىنا زاماندا ساندىق تەحنولوگيالار الدىڭعى ورىنعا شىققانىن اتاپ ءوتتى.

 «جاڭا جاھاندىق تەحنولوگيالىق ءداۋىردىڭ باستالۋىمەن بىرگە ەلدى بەلسەندى تۇردە يندۋستريالاندىرۋ ستراتەگيالىق مىندەتكە اينالىپ وتىر. جالپى، ءبىز جۇرگىزىپ وتىرعان ساياسات الەمدىك تاجىريبەگە ساي كەلەدى، ونىڭ بارىسىندا ەكونوميكانىڭ قازىرگى جاي- كۇيى دە، جاھاندىق ۇردىستەر دە ەسكەرىلۋدە»، - دەپ قورىتىندىلادى نۇرسۇلتان نازاربايەۆ.

ەلباسى مەملەكەتتىڭ پارمەندى قولداۋىنا نەگىزدەلگەن كەڭ اۋقىمدى يندۋستريالاندىرۋ ءىسى قازاقستاندى دامىعان ەلدەر قاتارىنا قوسۋعا، كەشەندى الەۋمەتتىك ماسەلەلەردى شەشۋگە، سونداي- اق حالىقتىڭ تۇرمىس دەڭگەيىن ارتتىرۋعا مۇمكىندىك بەرەتىنىن ايتتى. ءىس- شارا اياسىندا قازاقستان پرەزيدەنتى «التىن ساپا» بايقاۋىنىڭ ارناۋلى سىيلىقتارىن تاپسىردى.  سوڭىندا مەملەكەت باسشىسى ءىس- شاراعا قاتىسۋشىلاردى الدا كەلە جاتقان تاۋەلسىزدىك كۇنىمەن قۇتتىقتادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى