قازاقستاندا ماڭىزدى ەكى جولدىڭ ۋچاسكەلەرى پايدالانۋعا بەرىلدى

«قۇرمەتتى نۇرسۇلتان ءابىش ۇلى! الماتى- قاپشاعاي تاس جولى - «ورتالىق- وڭتۇستىك» ءدالىزىنىڭ ماڭىزدى بولىگى. قازىر جولدىڭ بۇل بولىگىندەگى قۇرىلىس جۇمىستارى تولىق اياقتالدى. التى جولاقتى قوزعالىسقا ارنالعان ءارى ءبىرىنشى تەحنيكالىق كاتەگوريانىڭ بارلىق تالاپتارىنا ساي. بۇگىندە جولداعى كولىك قوزعالىسىنىڭ قارقىنى تاۋلىگىنە 30 مىڭ كولىككە دەيىن ارتتىرىلدى. ال جول- كولىك اپاتتارى 3 ەسە ازايدى. جولدىڭ قازىر ۇزىندىعى 30 شاقىرىمدى قۇرايتىن سوڭعى بولىگى پايدالانۋعا دايىن»، - دەدى «قاز اۆتو جول» ۇلتتىق كومپانياسى باسقارما ءتوراعاسىناڭ ورىنباسارى بەرىك جەلدىكبايەۆ.

 اتاپ ايتقاندا، الماتى- قاپشاعاي جولىنىڭ 104 شاقىرىمى پايدالانۋعا بەرىلىپ وتىر. سونىمەن قاتار تەلەكوپىر ارقىلى قاراعاندى وبلىسىنان بايلانىسقا شىققان «قاز اۆتو جول» ۇلتتىق كومپانياسى باسقارما ءتوراعاسى ەرمەك قيزاتوۆ تاۋەلسىزدىك مەرەيتويى قارساڭىندا الماتى- قورعاس، الماتى- تالدىقورعان، بەينەۋ- شەتپە، كوكشەتاۋ- پەتروپاۆل، شىمكەنت- تاشكەنت، شىمكەنت- جامبىل وبلىسى شەكاراسى ۋچاسكەلەرىندە 930 شاقىرىم جاڭا جولدار پايدالانۋعا بەرىلگەنىن حابارلادى. ال استانا- تەمىرتاۋ جولىنىڭ 169 شاقىرىمى تولىقتاي اياقتالىپ، كولىك قوزعالىسىنا رۇقسات ەتىلدى.

«استانا- تەمىرتاۋ جولى ءبىرىنشى تەحنيكالىق سانات نورماتيۆتەرىمەن سالىندى. ونىڭ وتكىزۋ قابىلەتتىلىگى تاۋلىگىنە 6-دان 28 مىڭ كولىككە دەيىن ۇلعايتىلدى. قۇرمەتتى ەلباسى! استانا - تەمىرتاۋ جانە الماتى - قاپشاعاي تاس جولدارى ىسكە قوسىلۋعا دايىن. قوزعالىستى باستاۋعا رۇقسات سۇرايمىز!» - دەدى ە. قيزاتوۆ. مەملەكەت باسشىسى نۇرسۇلتان نازاربايەۆ ەلىمىزدىڭ «نۇرلى جول» باعدارلاماسى قازىرگى داعدارىسقا قارسى ۇلكەن جوبا بولىپ سانالاتىنىن ەسكە سالىپ ءوتتى.

«الدىمىزداعى 5 جىلدىڭ ىشىندە ءدال وسىنداي 7 مىڭ شاقىرىم جول سالساق، سونىمەن قاتار تەمىر جولدار جەلىسىن كەڭەيتسەك، بۇل ەلىمىزگە وتە پايدالى ءارى ەكونوميكانى ارى قاراي وركەندەتەدى. وسىنىڭ بارلىعى - مەملەكەتتىڭ اتقارىپ جاتقان شارۋاسى. سوندىقتان سىزدەر - ەلىمىز ءۇشىن نەگىزگى ءىستى جاساپ جاتقان ادامدارسىزدار. وسى باعىتتا بولىنگەن قاراجاتتى مۇقيات پايدالانىپ، ەلىمىزدە ەڭ جاقسى جولداردى سالۋعا قىزمەت ەتىڭىزدەر»، - دەدى پرەزيدەنت تەلەكوپىرگە قاتىسۋشىلارعا قاراتىپ ايتقان سوزىندە.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى