توقايەۆ قىتايلىق عالىمدارعا قازاقستاننىڭ وزگەرمەلى الەمگە كوزقاراسى جايلى اڭگىمەلەپ بەردى

رەسمي ساپار بارىسىندا دەلەگاتسيا قىتاي حالىقارالىق ماسەلەلەر ينستيتۋتىنا باردى، وندا قىتاي عىلىمي بىرلەستىگى وكىلدەرىمەن (قىتاي قوعامدىق عىلىمدار اكادەمياسى، قىتاي زاماناۋي حالىقارالىق قاتىناستار اكادەمياسى، ق ح ر مەملەكەتتىك كەڭەسى جانىنداعى دامۋ زەرتتەۋ ورتالىعى جانە ت. ب. )، ق ح ر- دا اككرەديتتەلگەن قازاقستان، رەسەي، تاجىكستان ديپلوماتيالىق وكىلدىكتەرىنىڭ باسشىلارىمەن، قىرعىزستان، ارمەنيا، ازەربايجان، گرۋزيا، بەلارۋس، ۋكراينا ديپلوماتتارىمەن، قازاقستانداعى ق ح ر- دىڭ بۇرىنعى ەلشىلەرى چجان دەگۋان، چجوۋ سياوپەي جانە ياو پەيشەنمەن، سونداي-اق بەيجىڭ ج و و- لارىندا وقيتىن قازاقستاندىق ستۋدەنتتەرمەن كەزدەستى.

ق. توقايەۆ «قۇبىلمالى الەم: قازاقستاننىڭ كوزقاراسى» تاقىرىبىندا ءسوز سويلەدى. ول قازاقستان تاۋەلسىزدىگىنىڭ 25 جىلدىعى مەن ەكى ەل اراسىندا ديپلوماتيالىق قارىم-قاتىناس ورناتۋدىڭ 25 جىلدىعى قارساڭىندا الەمدىك دامۋ مەن قازاقستان-قىتاي ىنتىماقتاستىعى كەلەشەگىنىڭ نەگىزگى ۇردىستەرى تۋرالى ەگجەي-تەگجەيلى باياندادى.

سەنات ءتوراعاسى قىتايدىڭ الدىڭعى قاتارلى عالىمدارى مەن ساياساتتانۋشىلارى الدىندا قازىرگى حالىقارالىق جايعدايلارعا قازاق جانە قىتاي تىلدەرىندە تەرەڭ تالداۋ جاسادى. ول قىتايلىق ارىپتەستەرىن «نۇرلى جول» مەملەكەتتىك ينفراقۇرىلىمدىق دامۋ باعدارلاماسىنىڭ جۇزەگە اسۋى، «باتىس قىتاي - باتىس ەۋروپا» اۆتوكولىك دالىزىنىڭ قۇرىلىسى، ەۋرازيالىق جوعارى جىلدامدىقتى مۋلتيمودالدى كولىكتىك باعىتى جوباسى جايلى حاباردار ەتتى.

ق. توقايەۆتىڭ ايتۋىنشا، قازاقستان ەۋروپا مەن ازيا اراسىنداعى ترانزيتتە ماڭىزدى ءرول وينايتىن كولىكتىك-لوگيستيكالىق حاب رەتىندە ءالى دە دامي تۇسەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى