باۋىرلاس تۇركى جۇرتى ناۋرىز تويىن تۇركىستاندا تويلاماق
ونىڭ ايتۋىنشا، 2017-جىلدىڭ اقپان ايىندا كۇنگەيدە «تۇركى الەمىنىڭ مادەني استاناسى» باعدارلاماسىنىڭ اشىلۋ سالتاناتى باستالىپ، جىل سوڭىنا دەيىن ءتۇرلى ايدارلارمەن تۇركى الەمىنە قاتىستى ءىس-شارالار وتەدى.
سولاردىڭ ءبىرى ناۋرىز ايىندا بارشا تۇركى جۇرتشىلىعىمەن بىرلەسكەن ۇلىستىڭ ۇلى كۇنى - ناۋرىز مەرەكەسىن اتاۋعا بولادى، دەپ حابارلايدى و ق و اكىمىنىڭ باسپا ءسوز قىزمەتى.
سونىمەن قاتار، وسى باعدارلاما اياسىندا تۇركى تىلدەس تەاترلار فەستيۆالى، تۇركسوي- دىڭ ⅩⅩ وپەرالىق فەستيۆالى، تۇركى الەمىنىڭ كىتاپ كورمەسى مەن مادەنيەت پەن ونەر ۋنيۆەرسياداسى جانە ورتا ازيا حالىقتارىنىڭ قولونەر فەستيۆالى سىندى كوپتەگەن حالىقارالىق دارەجەدەگى ءىس-شارالار دا بار.
ايتا كەتكەن ءجون، 2016-جىلى جەلتوقسان ايىنىڭ 1-2- كۇندەرى ازەربايجاننىڭ شەكي قالاسىندا وتكەن تۇركسوي تۇراقتى كەڭەسىنىڭ 34-وتىرىسىندا تۇركىستان قالاسىن تۇركى الەمىنىڭ 2017-جىلعى مادەني استاناسى ەتىپ بەكىتۋ تۋرالى شەشىمى قابىلدانعان بولاتىن. باسپا ءسوز ءماسليحاتىندا تۇركىستان قالاسىنىڭ اكىمى تۇركى الەمىنىڭ مادەني استاناسىنىڭ بەلگىسىن وبلىس اكىمىنە ارنايى كەلىپ تابىستاعانىن جەتكىزدى.
جالپى تۇركسوي كەڭەسى ونەر مەن مادەنيەت سالاسىنداعى تۇلعالاردى دارىپتەۋ ماقساتىندا ءار جىلداردى ولاردىڭ اتىمەن جاريالاي وتىرىپ، ءتۇرلى مادەني شارالاردى تۇراقتى وتكىزىپ وتىرۋدى داستۇرگە اينالدىرعان. 2012-جىلدان باستاپ تۇركسوي تۇركى الەمى قالالارىنىڭ ءبىرىن تۇركى الەمىنىڭ استاناسى دەپ جاريالاپ كەلۋدە.
كەڭەس ەڭ العاشقى مادەني 2012-جىلدى ەلورداسى - استانا قالاسىنا بەرسە، 2013-جىلى - ەسكيشەحير، 2014-جىلى - قازان، 2015-جىلى - مارى، 2016-جىلى - شەكي قالالارى تۇركى الەمىنىڭ مادەني استاناسى بولىپ جاريالاندى.
ال 2017-جىلى - تۇركى الەمىنىڭ مادەني استاناسى - تۇركىستان قالاسىنا بەرىلۋىن قوسا ەسەپتەگەندە قازاقستان تۇركسوي - دا مادەني جىل ەستافەتاسىن ەكىنشى رەت الىپ وتىر.
كيەلى تۇركىستان قالاسى ءۇشىن بۇل ەستافەتا ۇلكەن قۋانىش ەكەنىن ايتقان قالا باسشىسى بۇل كونە قالانىڭ حالىقارالىق دەڭگەيگە كوتەرىلۋ ءۇشىن ۇلكەن مۇمكىندىك ەكەنىن جەتكىزدى.
«بۇل قالالار ءبىر جىل عانا تۇركى الەمىنىڭ استاناسى بولعانىمەن، ءوزىنىڭ تۇركى الەمىندە الار ورنىن، ماڭىزدىلىعىن ماڭگىلىككە قالدىرۋعا قول جەتكىزەدى. اتالعان جىلدى اسا جاۋاپكەرشىلىكپەن ۇيىمداستىرىپ، شارالاردى ءتيىستى دەڭگەيدە وتكىزۋگە بار كۇش جىگەرىمىزدى سالاتىن بولامىز»، - دەدى ءا. وسەربايەۆ.
