قازاقستان ۇرىمجىدە وتكەن تۋريستىك كورمەگە قاتىستى
كورمەدە جالپى 28 ەلدىڭ، ونىڭ ىشىندە رەسەي، وزبەكستان، ارمەنيا، يسلانديا، نورۆەگيا، مالايزيا ەلدەرىنىڭ دەلەگاتسيالارى باس قوستى. بۇگىندە قىتاي تۋريستەرى الەمدىك تۋريزمنىڭ نەگىزگى قوزعاۋشى كۇشىنە اينالىپ وتىر. سوڭعى 10 جىلدا قىتاي تۋريستەرىنىڭ سانى ەكى ەسەگە وسكەن. 2005 -جىلى 35 ميلليون ال، 2015 -جىلى 125 ميلليون تۋريست ساياحاتتاعان. 2015 -جىلى قىتاي تۋريستەرىنىڭ شەتەلدە جۇمساعان قارجىسى 200 ميلليارد دوللاردان اسىپ كەتتى.
سالىستىرمالى تۇردە ايتساق، 2015 -جىلى قازاقستان بيۋدجەتىنىڭ كىرىسى شامامەن 20 ميلليارد دوللار بولعان. قازاقستاندىق ستەندتى ق ر ينۆەستيتسيالار جانە دامۋ مينيسترلىگى تۋريزم يندۋسترياسىن دامىتۋ دەپارتامەنتىنىڭ تاپسىرىسى بويىنشا «اتامەكەن» ۇ ك پ جانىنداعى قازاقستاننىڭ سىرتقى ساۋدا پالاتاسى ازىرلەدى. قازاقستاندىق دەلەگاتسيا قۇرامىندا الماتى قالاسى اكىمدىگى مەن شىعىس قازاقستان وبلىسى اكىمدىگىنىڭ وكىلدەرى جانە «جىبەك جولى - ا پ» ج ش س، «KazUnion» ج ش س، «Bekzada» ج ش س، «Abdi Travel» ج ش س تۋريستىك وپەراتورلار بولدى.
كورمە بارىسىندا ق ر ي د م تۋريزم يندۋسترياسىن دامىتۋ دەپارتامەنتىنىڭ وكىلدەرى قىتايلىق ارىپتەستەرىمەن تۋريزم سالاسىنداعى ىنتىماقتاستىقتى نىعايتۋ، 2017 -جىلى قىتاي تۋريزمى جىلىن وتكىزۋ ماسەلەلەرى بويىنشا ءبىرقاتار كەزدەسۋ وتكىزدى. سونداي-اق، «قازاقستان رەسپۋبليكاسىنا قىتاي ازاماتتارىنىڭ توپتىق تۋريستىك ساپارلارىن جەڭىلدەتۋ جونىندەگى ق ر ينۆەستيتسيالار جانە دامۋ مينيسترلىگى مەن قىتايدىڭ تۋريزم ىستەرى جونىندەگى مەملەكەتتىك باسقارماسى اراسىنداعى مەموراندۋمدى» جۇزەگە اسىرۋ بارىسى تالقىلاندى.
