قازاقستان تۋرالى قىزىقتى ماتەريالدار اعىلشىن تىلىنە اۋدارىلادى

 بۇگىن پارلامەنت ماجىلىسىندەگى ۇكىمەت ساعاتىنان كەيىن ق ر اقپارات جانە كوممۋنيكاتسيالار ءمينيسترى داۋرەن ابايەۆ وسىلاي ءمالىم ەتتى، دەپ حابارلايدى قازاقپارات.

ۇكىمەت ساعاتى بارىسىندا ءماجىلىس دەپۋتاتى باقىتگۇل حامەنوۆا قازاق جۋرناليستيكاسىنىڭ وندىرگەن ونىمدەرىن «الەم نەگە تۇتىنبايدى؟» دەگەن ماسەلە بۇگىندە ءجيى قوزعالىپ جۇرگەندىگىن ايتقان بولاتىن. «ءبىزدىڭ قازاق باسىلىمدارى الەمدىك دەڭگەيدەگى اقپارات قۇرالدارىمەن بايلانىس ورناتىپ، وزدەرىنىڭ ۇزدىك ماتەريالدارىن اۋدارتىپ، سول ارىپتەستىك ارقىلى الەمگە تاراتىپ وتىرۋعا كەدەرگىلەر بار ما؟»، - دەگەن دەپۋتات ب. حامەنوۆا وسى ماسەلەگە قاتىستى ءمينيستردىڭ پىكىرىن سۇراعان ەدى.

 ءوز كەزەگىندە مينيستر داۋرەن ابايەۆ قازاق تىلىندە تۇڭعىش رەت جارىق كورىپ وتىرعان الەمدىك برەندتىك- باسىلىم «National Geographic  قازاقستان» جۋرنالىنىڭ ءدال وسى باعىتتاعى تاجىريبەسىن العا تارتتى. «مەن سىزدەرگە ءبىر مىسال كەلتىرەيىن، «National Geographic  قازاقستان» جۋرنالى بيىلعى جىلى عانا قازاق تىلىندە شىعىپ جاتىر. بۇل باسىلىمدا الەمدىك زەرتتەۋلەر اعىلشىن تىلىنەن اۋدارىلىپ بەرىلسە، بىرتە- بىرتە قازاقستان تۋرالى ءتول ماتەريالدار ونىڭ كەيىنگى سانىندا كوبەيىپ كەلەدى. سونىڭ ىشىندە ەڭ مىقتى دەگەن قازاق تىلىندەگى ماقالالار دۇنيەجۇزىلىك National Geographic»  -كە» شىعادى. بۇل ءبىر عانا مىسال. نەگىزى وسى باعىتتا ۇلكەن جۇمىستاردى جۇرگىزىپ جاتىرمىز»، - دەپ توقتالدى ۆەدومستۆو باسشىسى.

 ونىڭ ايتۋىنشا، بۇنداي حالىقارالىق اۋقىمداعى جوبالار ءبىر جاعىنان ۇلكەن قارجى تالاپ ەتسە، ەكىنشى جاعىنان ەلدىڭ الەمدىك دەڭگەيدەگى يميدجىنە زور اسەر ەتپەك. سونىمەن قاتار د. ابايەۆ الەمدىك دەڭگەيدەگى كومپانيالارمەن ارىپتەستىك باعىتتاعى شارالار قوماقتى قارجىنى تالاپ ەتەتىنىن اتاپ ءوتتى.

«ۇلكەن كومپانيالار بىزگە كەلىپ، جوبا جاساۋ ءۇشىن قارجىلاي كومەك سۇرايتىن كەزدەر بولادى. نەگىزىنەن ول جاعىن دا قاراستىرىپ جاتىرمىز. سوسىن ءبىز «Discovery» جانە «Euronews» سەكىلدى الەمدىك كومپانيالار وكىلدەرىمەن كەزدەستىك. ەگەر وسى باعىتتاعى بىرلەسكەن جوبامىز جۇزەگە اسسا، ول بارلىق تاراپتارعا دا قىزىق بولادى دەپ ويلايمىن»، - دەدى مينيستر.

مۇنىمەن قوسا، ۆەدومستۆو باسشىسى الداعى جىلدارى تۇسىرىلەتىن ساپالى ءارى رەيتينگتى قازاقستاندىق سەريالدار دا شەت ەلدەرگە ساتىلاتىنىن اتاپ ءوتتى.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى