قازاۆتوجول استانا- كوكشەتاۋ جولىنداعى جانتۇرشىگەرلىك جول اپاتىنىڭ سەبەبىن اتادى
ۇلتتىق كومپانياعا قاراستى اقىلى اۆتوموبيل جولدارى ديرەكسياسى ديرەكتورىنىڭ ءبىرىنشى ورىنباسارى اسحات وقاسوۆ اگەنتتىك تىلشىسىنە بەرگەن سۇحباتىندا «تاس جولداردا قوزعالىسقا شەكتەۋ قويۋ جانە جابۋ تۋرالى» ەرەجەگە سايكەس جول ۋچاسكەسىن جابۋ تۋرالى شەشىم جول پوليتسياسىمەن جانە قۇتقارۋشىلارمەن بىرلەسە وتىرىپ قابىلداناتىندىعىن باسا ايتتى.
«كەشەگى جول- كولىك اپاتى اۋا رايىنىڭ ناشارلاۋىنان، كورۋ دەڭگەيىنىڭ تومەن بولۋىنان ورىن الدى. ءدال سول ساتتە اۋا رايى ناشارلاپ كەتكەن ەدى. مۇنى وزدەرىڭىز دە اۋا رايى تۋرالى مالىمەتتەردەن تەكسەرە الاسىزدار. سيكلون شۋچەدەن استاناعا قاراي جۇرگەن. اۆتوبۋس ءجۇرىپ كەلە جاتقان ساتتە كورىنۋ دەڭگەيى ناشارلاپ كەتتى جانە ءبىز قوزعالىستى جابۋ تۋرالى شەشىم قابىلدادىق»، - دەدى اسحات وقاسوۆ.
بۇل رەتتە ول جول اپاتىنا ادامي فاكتورلاردىڭ دا اسەر ەتۋى مۇمكىندىگىن جوققا شىعارمايدى. ونىڭ اتاپ وتۋىنشە، كەشەگى بوران اعىمداعى جىلى ەڭ ءبىرىنشى رەت بولىپ وتىر جانە اۆتوموبيل جۇرگىزۋشىلەرى وزدەرىنە سەنىمدىلىك تانىتقان.
«ءبىز جول پوليتسياسىمەن جول- كولىك اپاتى سەبەبىن تالقىلادىق. ادامدار داعدىلانىپ ۇلگەرمەگەن، سەبەبى بۇل العاشقى بوران بولاتىن. وزدەرىڭىز دە بايقاساڭىزدار، كورىنۋ دەڭگەيى ناشارلاعان ساتتە ادامدار ساعاتىنا 30-40، ارى كەتسە 70 شاقىرىم جىلدامدىقپەن جۇرەدى. ال ول جەردەگى سوققىدان جىلدامدىقتىڭ وتە جوعارى بولعاندىعىن بايقاۋعا بولادى»، - دەپ تۇسىندىرەدى وقاسوۆ.
سونىمەن قاتار ۇلتتىق كومپانيا وكىلى اۆتوبۋس جۇرگىزۋشىسىنىڭ جولدان شارشاپ كەلە جاتۋى مۇمكىن ەكەندىگىن دە اتاپ ءوتتى.
«اۆتوبۋس جۇرگىزۋشىسىنىڭ دەمالىپ الۋعا ۋاقىتى بولعاندىعىنا كۇدىگىم بار. ول اقىلى ۋچاسكەگە شۋچەدەن كەلە جاتىپ تاڭعى ساعات 7-دە تۇسكەن. ساعات نەشەدە تۇردى، نەشەدە جاتتى، ءتىپتى جۇرگىزۋشى دەمالدى ما؟ مۇمكىن ول قاجىعان شىعار. قازىر سەبەپتەرىن تەرگەۋ انىقتايتىن بولادى. بۇل رەتتە مەن ەشتەڭە ايتا المايمىن»، - دەدى ول.
وقاسوۆتىڭ ايتۋىنشا، جول 100 مەترگە دەيىن كورىنىپ تۇرعان جاعدايدا جابىلمايدى. ول جابىلاتىن بولسا ازاماتتار تارابىنان نارازىلىق جيىلەپ كەتەدى. سوندىقتان جولداردىڭ ناشار كورىنەتىندىگىن عانا حابارلاپ وتىرادى. ايتا كەتەيىك، بۇعان دەيىن اقمولا وبلىسىندا «استانا- كوكشەتاۋ» تاس جولىنىڭ بويىندا 4 ادامنىڭ ءومىرىن قيعان جول اپاتىنا بايلانىستى قىلمىستىق ءىس قوزعالعانىن حابارلاعان ەدىك.
