داۋرەن ابايەۆ ءۇندىستاندىق سەريالداردان قالاي قۇتىلاتىنىن ايتتى
«وتاندىق تەلەارنالاردىڭ كورسەتىلىمىن، ساپاسىن كوتەرەمىز. سەريالدار ءتۇسىرىلىپ جاتىر، كەلەسى جىلى وننان كەم ەمەس ساپالى، رەيتينگى وتە جوعارى بولاتىن تەلەحيكايالار تۇسىرەمىز»، - دەدى د. ابايەۆ.
ۆەدومستۆو باسشىسىنىڭ سوزىنە قاراعاندا، بۇگىندە ءۇندىستان مەن كورەيانىڭ سەريالدارىنا تۇرعىندار تاراپىنان سۇرانىس بار. «بۇل باعىتتا اۋقىمدى جۇمىستاردى اتقارامىز. اسىرەسە، بىرتىندەپ مەملەكەتتىك ارنالاردا شەتەلدىك تەلەحيكايالاردان باس تارتاتىن بولامىز. الايدا، قازىر سۇرانىس بولعاندىقتان، ولاردى بىردەن الدىرتىپ تاستاساق، ەلىمىزدەگى اۋديتوريا شەتەلدىڭ ارنالارىنا كەتىپ قالۋى مۇمكىن. سوندىقتان دا ءبىز سول تەڭگەرىمدى ساقتاپ، ءتيىستى جۇمىستاردى ىسكە اسىرىپ، ساپانى كوتەرىپ، اۋديتوريانى جوعالتپايمىز دەپ ويلايمىن»، - دەدى مينيستر.
وسى ورايدا ابايەۆ قازاقستاندىق جوبالار سانى ەلەۋلى تۇردە ارتاتىنا توقتالا كەلە، كەلەسى جىلى قازاقستاندا ساپالى سەريالدار تۇسىرىلەتىنىنە كۇمان جوق ەكەنىنە، سونداي-اق بۇل تەلەحيكايالار الداعى ۋاقىتتا شەتەلگە ساتىلاتىنىن اتاپ ءوتتى.
