تالدىقورعانداعى مۇگەدەك ارۋدىڭ جان تەبىرەنتەر حاتى جۇرتتىڭ جۇرەگىن ەلجىرەتتى
بۇگىندە بويجەتكەن اياقتان تۇرىپ كەتۋ ءۇشىن بارىن سالۋدا. الايدا ەل قاتارلى ءومىر ءسۇرۋى ءۇشىن قىمبات وتا جاساتۋى ءتيىس.
«مەنىڭ اۋىرتپاشىلىققا تولى ءومىرىم تۋرالى ايتىپ بەرۋگە رۇقسات ەتىڭىزدەر. ەسىمىم - اسەل. تالدىقورعاننانمىن. الماتىدا گەودەزيست ءارى كارتوگراف ماماندىعىن ۇزدىك ءتامامداپ، بولاشاققا ۇلكەن جوسپارمەن ۇيگە قايتىپ بارا جاتقان ءساتىم ەدى. الايدا تالدىقورعانعا بارار جولدا جول اپاتىنا ءتۇسىپ، ول مەنىڭ بۇكىل ءومىرىمدى توڭكەرىپ تاستادى»، - دەيدى بويجەتكەن.
جول اپاتىنان كەيىن قاتتى باس-ميى شايقالىپ، سول جاق سانى سىنعان ارۋ تالدىقورعان، استانا جانە الماتى قالالارىندا ەم الادى. بىرنەشە وتادان وتەدى.
«2016-جىلى مەن امالسىز اياعىمدى كەستىرۋگە كوندىم. ودان كەيىن ءومىرىم قاتتى اۋىرسىنۋسىز، جاقسارا باستاعان ەدى. پروتەزگە تاپسىرىس بەرىپ، ونىمەن ءجۇرۋدى ۇيرەنە باستادىم. تالدىقورعانداعى «ەرلىك» مۇگەدەكتەر قوعامىنا جۇمىسقا تۇردىم»، - دەپ ەسىنە الدى اسەل.
الايدا بويجەتكەننىڭ بۇل «باقىتى ۇزاققا بارماعان».
«ءبىر اي بۇرىن مۇگەدەكتەر ارباسىنان قۇلاپ كەتىپ، اياعىمنىڭ سىنىق بولشەگىن قايتا جاراقاتتادىم. سالدارىنان ول قايتا ىرىڭدەي باستادى. دارىگەرلەر مەنىڭ تەك ەكى مۇمكىندىگىم بارىن ايتۋدا: ساننىڭ ءتۇپ جاعىن مۇلدە الىپ تاستاۋ نەمەسە قىتايعا بارىپ، اياعىمنىڭ قالعان بولشەگىن ساقتاپ قالۋعا تىرىسىپ كورۋ. ەگەر ساقتاۋ مۇمكىن بولماسا، مەن ءومىر باقي اياقتان تۇرىپ كەتە المايمىن. ءتىپتى وتىرۋ مۇمكىندىگىنەن دەي ايىرىلامىن»، - دەيدى اسەل.
بويجەتكەن قايىرىمدى جاندار قول ۇشىن سوزادى دەگەن ۇمىتتە.
«سىزدەردەن كەز كەلگەن كومەك كەلىپ قالار دەگەن ۇمىتپەن جازىپ وتىرمىن. پروتەزبەن جۇرۋگە مۇمكىندىك بولۋى ءۇشىن اياعىمنىڭ سىنىق بولشەگىن ساقتاپ قالۋىم كەرەك. سىزدەردىڭ كەز كەلگەن كومەكتەرىڭىزگە شەكسىز العىس بىلدىرەمىن. مەنى ءتۇسىنىپ، جاناشىرلىق تانىتاسىزدار دەگەن ۇمىتتەمىن» - دەيدى اسەل.
ارۋدىڭ جازباسىن جەلى قولدانۋشىلارى قىزۋ تالقىلاۋدا. ولار تالاي قيىندىقتى ەڭسەرگەن قازاق قىزىنىڭ قايسارلىعىنا ءتانتى بولعان. بەلگىلى بولعانداي، ونىڭ وتاسىنا 150 مىڭ دوللار قاجەت.
«گەودەزيست ماماندىعىن تاڭداعان قىزدى العاش رەت كورىپ تۇرمىن. بۇل ماماندىقتى ادەتتە ەر ازاماتتار عانا تاڭدايدى. بۇل قايسار قىزعا كومەك كەرەك»، - دەپ جازعان سالتانات كورشيەۆا ەسىمدى قولدانۋشى.
