كاريموۆتىڭ كولەڭكەسىندە جۇرگەن ميرزيايەۆ وتباسىمەن سايلاۋعا كەلدى - فوتو
ەلدىڭ تۇڭعىش پرەزيدەنتى يسلام كاريموۆتىڭ ورنىن ۇكىمەت باسشىسى شاۆكات ميرزيايەۆ باسادى دەگەن بولجام باسىم.
ورتالىق ازياداعى پوستسوۆەتتىك مەملەكەتتەر اراسىندا حالقىنىڭ سانى بويىنشا الدا تۇرعان وزبەكستان ازاماتتارى سوڭعى 27 جىل اۆتوريتارلىق تاسىلمەن ەل باسقارعان، قىركۇيەكتىڭ باسىندا 78 جاسىندا قايتىس بولعان يسلام كاريموۆتەن سوڭ بەس جىل مەرزىمگە پرەزيدەنت بولاتىن كەلەسى ادامنىڭ بيلىككە كەلۋىنە داۋىس بەردى.
وزبەكستانداعى 9 مىڭنان استام سايلاۋ ۋچاسكەسىندە داۋىس بەرۋ جەكسەنبى كۇنى تاڭەرتەڭ جەرگىلىكتى ساعات 6 دان باستالدى. ارادا بەس ساعات وتكەندە ورتالىق سايلاۋ كوميسسياسى سايلاۋشىلاردىڭ 33,77 پايىزى داۋىس بەرگەنىن جاريالاپ، «سايلاۋ زاڭدى كۇشىنە يە» دەپ مالىمدەگەن.
ولاردىڭ ءبىر سىپىراسى پرەزيدەنت سايلاۋىنا الدىن الا، قاراشانىڭ 24 ىنەن باستاپ داۋىس بەرىپ تاستاعان.
وزبەكستان زاڭى بويىنشا، سايلاۋشىلار تىزىمىنە ەنگەن ازاماتتاردىڭ 33 پايىزى داۋىس بەرۋگە قاتىسقان جاعدايدا سايلاۋ وتكەن بولىپ سانالادى.
پرەزيدەنت سايلاۋى وتكەن كۇنى شەتەلدەگى وزبەكستاندىق سايلاۋشىلار داۋىس بەرگەن 44 سايلاۋ ۋچاسكەسىنىڭ ءبىرى الماتىداعى وزبەكستان ەلشىلىگىندە اشىلعان.
پرەزيدەنتتىككە كانديداتتار
پرەزيدەنت سايلاۋىنا تۇسكەن ءتورت كانديداتتىڭ اراسىنان سايلاۋ ناۋقانى بارىسىندا وزگەلەرمەن سالىستىرعاندا بەلسەندىلىگى ەرەكشە كوزگە تۇسكەن قازىرگى پرەمەر-مينيستر ءارى پرەزيدەنت مىندەتىن اتقارۋشى 59 جاستاعى شاۆكات ميرزيايەۆتىڭ جەڭىسكە جەتەتىنىنە تالداۋشىلار شەك كەلتىرمەيدى.
2003-جىلدان بەرى ۇكىمەتتى باسقارىپ كەلە جاتقان ميرزيايەۆ بۇرىنعى پرەزيدەنت كاريموۆتىڭ ساياسي باعىتىن ۇستاناتىنىن مالىمدەگەن.
ۇكىمەت سىنشىلارىنىڭ كەيبىرى ميرزيايەۆ بيلىگىنىڭ كاريموۆ كەزىندەگىدەن وزگەشەلىگى بولمايدى دەپ سانايدى. شەتەلدە تۇراتىن كەي وزبەك ديسسيدەنتتەرى شاۆكات ميرزيايەۆ ەكونوميكالىق رەفورمالار جۇرگىزىپ، بۇرىنعىعا قاراعاندا ءبىرشاما ەركىندىككە جول اشادى دەپ ۇمىتتەنەدى.
سايلاۋ بيۋللەتەنىنە پرەزيدەنتتىككە كانديدات رەتىندە تاعى ءۇش ادامنىڭ اتى-ءجونى ەنگىزىلگەن - وزبەكستان حالىقتىق-دەموكراتيالىق پارتياسىنان ۇسىنىلعان حوتامجون كەتمونوۆ، «ميللي تيكلانيش» («ۇلتتىق جاڭعىرۋ») پارتياسى ۇمىتكەرى سارۆار وتامۋرادوۆ جانە «ادولات» سوتسيال-دەموكراتيالىق پارتياسىنان ءتۇسىپ جاتقان ناريمون ۋماروۆ. ۇشەۋى دە ۇكىمەتتى قولدايتىن ادامدار.
كاريموۆسىز وزبەكستان
شاۆكات ميرزيايەۆ پرەزيدەنت مىندەتىن اتقارۋعا كىرىسكەن كۇنى وزبەكستاننىڭ ەشقانداي حالىقارالىق اسكەري وداققا قوسىلماۋ، ءوز جەرىندە ەشبىر ەلدىڭ اسكەري بازاسىن جانە شەتەلدە ءوز اسكەري بازاسىن ورنالاستىرماۋ ساياساتىن جالعاستىراتىنى تۋرالى مالىمدەگەن.
وزبەكستاندا شيرەك عاسىردان استام ۋاقىتتان بەرى العاش رەت يسلام كاريموۆسىز ءوتىپ جاتقانىمەن، پرەزيدەنتتىك سايلاۋدىڭ ءوتۋ بارىسىندا بۇرىنعىلاردان ايىرماشىلىق بايقالمايدى.
مەملەكەتتىك اقپارات قۇرالدارىندا يسلام كاريموۆتىڭ ءىزباسارى رەتىندە سيپاتتالعان شاۆكات ميرزيايەۆتىڭ ەلدى ارالاپ، سايلاۋشىلارمەن وتكىزگەن كەزدەسۋلەرى كەڭىنەن كورسەتىلدى. ول جيىنداردا ەلدىڭ ەكونوميكالىق دامۋىنىڭ بولاشاعى ءسوز بولعانىمەن، ادام قۇقىقتارى مەن بوستاندىقتارىنىڭ جايى، دەموكراتيالىق سيپاتى بار وزگەرىستەر جاساۋ تۋرالى ەشنارسە ايتىلمادى.
ورتالىق سايلاۋ كوميسسياسى جەكسەنبى كۇنى ساعات 20:00 دە سايلاۋ ۋچاسكەلەرىندە داۋىس بەرۋ اياقتالعاننان كەيىن وزبەكستان پرەزيدەنت سايلاۋىنىڭ العاشقى الدىن الا ناتيجەسىن جاريالاماق.
وزبەكستان كونستيتۋتسياسى بويىنشا مەملەكەتتە جوعارعى بيلىك پرەزيدەنت قۇزىرىنا بەرىلگەن. نەگىزگى زاڭعا سوڭعى ەنگىزىلگەن وزگەرتۋلەرگە سايكەس، پرەزيدەنت بەس جىل مەرزىمگە سايلانادى جانە ءبىر ادام قاتارىنان ەكى رەتتەن ارتىق پرەزيدەنت بولىپ سايلانا المايدى.
Nur.kz
