ءبىزدىڭ سپورتىمىزدى بىرەۋ ۇرلايدى دەپ ويلاعان جوقپىز - اناتولي كيم
«شىنىمدى ايتسام، ءبىزدىڭ سپورت ءتۇرىمىزدى بىرەۋ تارتىپ الۋعا تىرىسادى دەگەندى ويلاعان دا جوقپىز. ماكاودا وتكەن الەم چەمپيوناتىندا ءبىزدىڭ كوماندامىزدى مۇلدەم باسقا ۇيىم - قازاقستان رەسپۋبليكاسىنىڭ گرەپپلينگ، پانكراتيون مەن ارالاس جەكپە-جەكتەردىڭ ۇلتتىق فەدەراتسياسىنىڭ اتىنان شىعارماقشى بولدى. ءبىز ونى سايىستىڭ الدىندا ءبىراق بىلدىك. ول ءوتىنىشتى ايدار ماحمەتوۆ بەردى. بىزدە سول قۇجاتتىڭ كوشىرمەسى بار. وندا ءبىزدىڭ سپورتشىلارىمىزدىڭ اتى-ءجونى جانە ايدار ماحمەتوۆتىڭ ەسىمى جازىلعان. ءبىراق ماحمەتوۆتىڭ ءوزى قول قويماعان. نەگىزى، ءبىز ونىمەن ەكى جىل بۇرىن تانىسقان بولاتىنبىز. ءيا، ونىڭ سپورتتىق جەتىستىكتەرى بار. سوندىقتان ءوزارا ارىپتەستىك ورناتىپ، وعان ءبىزدىڭ سپورت تۇرىمىزگە جاتاتىن سالالاردى بىرىكتىرۋ مىندەتى جۇكتەلدى.
الايدا ءۇش جىلدىڭ ىشىندە ەشتەڭە ىستەلگەن جوق. ال ماكاوداعى جاعداي ءبىز ءۇشىن مۇلدەم كۇتپەگەن جاڭالىق بولدى. سوندا ءبىزدىڭ ارتىمىزدا مۇلدەم باسقا جۇمىس جاسالدى ما؟ ونى رەيدەرلىك جاۋلاپ الۋ دەپ ايتپاسقا بولمايدى»، - دەيدى ا. كيم.
ايتا كەتەيىك، بۇعان دەيىن قازاقستاننىڭ م م ا ارالاس جەكپە-جەك ونەرى فەدەراتسياسىنىڭ پرەزيدەنتى اناتولي كيم باقىلاۋ كەڭەسىنىڭ ءتوراعاسى ايدار ماحمەتوۆتى ماكاودا وتكەن الەم چەمپيوناتى كەزىندە باسقا فەدەراتسيانىڭ اتىنان ءوتىنىش بەرگەنى ءۇشىن ايىپتاپ، باقىلاۋ كەڭەسىنىڭ ءتوراعاسى مارتەبەسىنەن ايىرىلۋىنا قاتىستى مالىمدەمە جاساعان بولاتىن.
الايدا كۇنى كەشە بۇكىلالەمدىك MAA قاۋىمداستىعى قازاقستاننىڭ م م ا فەدەراتسياسى تاراتقان اقپاراتتى جوققا شىعاردى. ال ۇيىم پرەزيدەنتى ۆاديم فينكەلشتەين ماكاودا بولعان جاعدايعا تۇسىنىكتەمە بەردى. ونىڭ ايتۋىنشا، وسى ۋاقىتقا دەيىن قازاقستاننىڭ م م ا فەدەراتسياسى مەن ونىڭ باسشىسى اناتولي كيم WMMAA جارعىسىن ءبىر رەت ەمەس، بىرنەشە رەت بۇزعان. بىرىنشىدەن، ۇيىمنىڭ جارناسى تولەنگەن جوق. اعىمداعى جىلى تامىز ايىندا سوڭعى ەسكەرتۋ جاسالدى. وندا جارنا تولەنبەگەن جاعدايدا قازاقستاننىڭ مما فەدەراتسياسىنىڭ مۇشەلىگى توقتاتىلىپ، اناتوليي كيمنىڭ داۋىس بەرۋ قۇقىعىنان ايىرىلىلاتىنى جايىندا ايتىلعان. سول كەزدە قازاقستان رەسپۋبليكاسىنىڭ گرەپپلينگ، پانكراتيون مەن ارالاس جەكپە- جەكتەردىڭ ۇلتتىق فەدەراتسياسى WMMAA مۇشەلىگىنە وتۋگە ءوتىنىش ءبىلدىردى.
«اتالعان فەدەراتسيا قازاقستاننىڭ ۇلتتىق وليمپيادا كوميتەتىنىڭ اككرەديتاتسياسىنان وتكەن. بۇكىلالەمدىك م م ا قاۋىمداستىعى ءۇشىن بۇل - ماڭىزدى ءجايت. سەبەبى كەلەسى جىلدان باستاپ ءبىز ۇلكەن وليمپيادالىق وتباسىنىڭ مۇشەسى بولۋدى كوزدەپ وتىرمىز. سوندىقتان قاۋىمداستىقتىڭ قۇرامىنا كىرەتىن ۇيىمداردىڭ ءوز ەلىندە ۇ و ك تىركەۋىنەن وتكەنى دۇرىس. ءبىز وسى ءوتىنىشتى قاراپ، قازاقستان رەسپۋبليكاسىنىڭ گرەپپلينگ، پانكراتيون مەن ارالاس جەكپە- جەكتەردىڭ ۇلتتىق فەدەراتسياسىن قاۋىمداستىعىنىڭ مۇشەلىگىنەن ۇمىتكەر رەتىندە تىركەدىك»، - دەيدى ۆ. فينكەلشتەين ءوز مالىمدەمەسىندە. وسىعان بايلانىستى ماكاوداعى الەم چەمپيوناتى كەزىندە وتكەن WMMAA كونگرەسىندە قازاقستاننىڭ ەكى فەدەراتسياسىنا قاتىستى ماسەلە قارالدى. اتالعان جيىنعا WMMAA باسشىلىعى، ازيا مەن ەۋروپا بولىمشەلەرىنىڭ جەتەكشىلەرى، سونداي-اق ۇيىمنىڭ قۇرمەتتى پرەزيدەنتى فەدور ەمەليانەنكو قاتىستى. سول جەردە «ەكى فەدەراتسيا بىرىگىپ جۇمىس ىستەسىن، ءيا بولماسا جاڭا جىلعا دەيىن ناقتى قاي ۇيىمنىڭ WMMAA- نىڭ اتىنان شىعاتىنىن انىقتاسىن» دەگەن ەكى ۇسىنىس جاسالدى. ال اتالعان سپورت ءتۇرىن وليمپيادالىق قوزعالىس رەتىندە دامىتۋ ماسەلەسىنە كەلگەندە اناتوليي كيم جاۋاپ بەرۋدىڭ ورنىنا قازاقستاننىڭ گرەپپلينگ، پانكراتيون مەن ارالاس جەكپە- جەكتەردىڭ ۇلتتىق فەدەراتسياسىنىڭ باسشىسى ساعىندىق ماكەيەۆتى الاياقتىق ءۇشىن كىنالاپ، دوق كورسەتتى. الايدا ەشقانداي دالەل كەلتىرگەن جوق. وعان فەدور ەمەليانەنكو دا ەسكەرتۋ جاسادى. ا. كيم وزىنە ۇنامايتىن شەشىمنىڭ قابىلدانعانىن جەتكىزىپ، قازاقستان قۇراماسىنىڭ فينالدىق جەكپە- جەكتەرگە قاتىسپايتىنىن مالىمدەدى. سوسىن تۇرىپ، شىعىپ كەتتى.
«وسىلايشا، كيم مىرزا كەڭەس مۇشەلەرىنە قۇرمەتسىزدىك تانىتىپ، WMMAA جارلىعىنىڭ ەرەجەلەرىن بۇزدى»، - دەيدى ۆ. فينكەلشتەين. ا. كيمنىڭ شەشىمىنە قاراماستان، س. ماكەيەۆ ول جاعدايدى شەشۋگە بارىن سالىپ، قازاقستاندىق سپورتشىلاردىڭ فينالدىق جەكپە- جەكتەرگە قاتىسۋىن ۇيىمداستىردى. سپورتشىلاردىڭ وزدەرى دە فينالعا قاتىسقاندى قالادى. «كيم مىرزانىڭ ارەكەتى ورىنسىز ءارى WMMAA جارعىسى مەن وليمپيادا حارتياسىنا قايشى كەلەدى دە سانايمىز. سونداي- اق ءبىز قازاق سپورتشىلارىنىڭ فينالدا ونەر كورسەتىپ، ەكىنشى ورىن العاندارىنا قۋانىشتىمىز. بۇنىڭ ءبارى ماكەيەۆ مىرزانىڭ ەڭبەگى ارقاسىندا جۇزەگە استى. وعان كەز كەلگەن ماسەلەنى بەيبىت تۇرعىدا شەشۋگە تىرىساتىنى ءۇشىن العىس بىلدىرەمىز»، - دەلىنگەن ۆ. فينكەلشتەينىڭ مالىمدەمەسىندە.
اۆتور: ارمان اسقاروۆ
