اقمولا وبلىسىندا پوليتسيا قىزمەتكەرى زاڭسىز قابان اتقان
30 -قاراشادا رەيد شارالارى بارىسىندا «بۇلاندى مەكەن» ج ش س قورىقشى قىزمەتى «ەلەن» اۋىل شارۋاشىلىعىنىڭ اقمولا وبلىسى ۇلتۋعان اۋىلى اۋماعى اراسىندا اۆتوكولىكتىڭ جارىعىن بايقاعان. وسى اۆتوكولىكتىڭ ىزىنە ءتۇسۋ ماقساتىندا قورىقشى قىزمەتكەرلەرى كولىكتىڭ جارىعىن جاقپاي ساۋلەسى بايقالعان جاققا قاراي بەتتەيدى. جاقىنداعان كەزدە قورىقشى قىزمەتكەرلەر اۆتوكولىكتى توقتاتتى.
وسى كەزدە اۆتوكولىكتىڭ جولاۋشىلار ورنىنان فورما كيگەن پوليتسيا قىزمەتكەرى شىعىپ، قورىقشى قىزمەتكەردىڭ اۆتوكولىگىن توقتاتۋعا ارەكەت ەتكەن. قورىقشى قىزمەتكەرلەر اڭ اۋلاۋ شارۋاشىلىعىنىڭ اۋماعىندا پوليتسيا قىزمەتكەرى نە ماقساتپەن جۇرگەنىن سۇراستىرعان كەزدە، ناقتى جاۋاپ بەرە الماعان پوليتسيا قىزمەتكەرى اۆتوكولىگىنە وتىرىپ ءىزىن سۋىتتى.
ءارى قاراي قورىقشى قىزمەتكەرلەر پوليتسيا كولىگىنىڭ ىزىنە ءتۇستى. ءىز بويىنشا 50 مەتر جەردە وق تيگەن ەكى قاباننىڭ دەنەسى تابىلدى. وسى فاكت بويىنشا 102 تەلەفون نومىرىنە حابارلاندى. بۇلاندى اۋدانىنىڭ ءى ءى ب جەدەل- تەرگەۋ توبى، اقمولا مامانداندىرىلعان تابيعات قورعاۋ پروكۋراتۋراسىنىڭ قىزمەتكەرلەرى جانە اقمولا وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسى ينسپەكتورلارى كەلگەن سوڭ زاڭسىز اڭ اۋلاۋ جەرىن قايتا تەكسەرۋ ناتيجەسىندە 12 كاليبرلى گيلزا، وق تىعىن كونتەينەرى جانە ارتيللەريا وعى تابىلدى. اتالمىش فاكت بويىنشا قۇجاتتار بۇلاندى اۋدانىنىڭ ءى ءى ب جىبەرىلدى. تابيعاتقا كەلتىرىلگەن زالال سوماسى 1272600 تەڭگەنى قۇرادى.
