جىبەك مۋسينوۆاعا ءتىل تيگىزگەندەرگە ايىپپۇل سالىندى

ەڭبەكشى قازاق اۋداندىق سوتىندا ۇكىم وقىلعاننان كەيىن سوتتالۋشىلاردىڭ تۋىستارى جابىرلەنۋشى جىبەك مۋسينوۆانى بالاعاتتاپ، جەكە باسىنا ءتىل تيگىزدى دەپ شاعىمداندى. وسى ارەكەتتەرى ءۇشىن ج. جالىمبەتوۆ جانە د. مىرزابەكوۆ اكىمشىلىك جاۋاپقا تارتىلدى، - دەپ حابارلايدى قازاقپارات ءتىلشىسى.

جابىرلەنۋشىنى بالاعاتتاعانى ءۇشىن ولاردىڭ ءارقايسىسىنا 10 ا ە ك، دەمەك 21210 تەڭگە كولەمىندە ايىپپۇل سالىندى. اكىمشىلىك ءىس قارالعاننان كەيىن، اتالعان ەكى ازامات ءوز كىنالارىن مويىنداپ، مەملەكەت قازىناسىنا قاجەتتى سومانى تولىقتاي تولەدى.

ايتا كەتۋ كەرەك، 18 -تامىزدا جىبەك مۋسينوۆانىڭ اناسى الەۋمەتتىك جەلى ارقىلى قىزىن 4 ازامات زورلاپ كەتكەندىگى جونىندە ايتىپ، ءىستىڭ ءادىل ءوتۋى جونىندە كومەك سۇراعان بولاتىن. ارتىنشا، كۇدىكتىلەر قاماۋعا الىندى جانە ءىستى وبلىستىق ءى ءى د تىكەلەي باقىلاۋعا العان ەدى.

اسحات بەكتۇرسىنوۆ 10 جىلعا، الماس ەرمەكوۆ 9,5 جىلعا، ەربول ەرمەكوۆ 8 جىلعا، ەلتاي نۇربول 9 جىلعا باس بوستاندىعىنان ايىرىلدى. ەندى ولار جازالارىن جالپى رەجيمدەگى كولونيادا وتەيتىن بولادى. سۋديا ەرلان بايمۋلدينوۆ سوتتالۋشىلارعا وسىنداي ۇكىم كەستى.

ەستەرىڭىزگە سالا كەتەيىك، جىبەك مۋسينوۆانى زورلاعانداردىڭ ءىسى ەڭبەكشىقازاق اۋداندىق سوتىندا قارالدى. پروكۋرور 4 ازاماتتى 11 جىلعا باس بوستاندىعىنان ايىرۋدى سۇراعان ەدى.
 اۆتور: سامال قابىشەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى