تاسماعامبەتوۆ بالالار ۇيلەرى تاربيەلەنۋشىلەرىنە قاتىستى تاپسىرما بەردى
اتالعان كەڭەسكە ق ر پارلامەنتى ءماجىلىسىنىڭ دەپۋتاتتارى، ق ر بالا قۇقىقتارى جونىندەگى ۋاكىل زاعيپا بالييەۆا، ق ر ءبىلىم جانە عىلىم ءمينيسترى ەرلان ساعاديەۆ، سونداي-اق، ورتالىق اتقارۋشى ورگانداردىڭ، ۇكىمەتتىك ەمەس جانە كوممەرتسيالىق ۇيىمداردىڭ وكىلدەرى قاتىستى. ءماجىلىس بارىسىندا جەتىم بالالار مەن اتا- اناسىنىڭ قاراۋىنسىز قالعان بالالاردىڭ جانە ءوز وتباسىنا بالا اسىراپ الۋعا نيەت بىلدىرگەن تۇلعالاردىڭ اقپاراتتىق مالىمەتتەر بازاسىن قۇرۋ ماسەلەسى كوتەرىلدى.
«وزدەرىڭىزگە ءمالىم، مەملەكەت باسشىسى مەملەكەتتىك ورگاندارعا بالالار ۇيلەرىندە تاربيەلەنىپ جاتقانداردىڭ سانىن ازايتۋ تۋرالى تاپسىرما بەرگەن بولاتىن. بۇل باعىتتا مەملەكەتتىك ورگاندار تاراپىنان جوسپارلى جانە دايەكتى جۇمىس جۇرگىزىلۋدە. بالالاردى وتباسىنا ورنالاستىرۋدىڭ بالامالى فورمالارى كوبەيىپ، اسىراپ الۋ، قامقورلىققا الۋ، پاتروناتتان وزگە، 2017 -جىلدان باستاپ قابىلداۋ جانە قوناقجاي وتباسىلارى فورماسى ەنەدى. بۇلاردىڭ بارلىعى مەملەكەت تاراپىنان ماتەريالدىق قولداۋعا يە بولادى»، - دەدى ءماجىلىس بارىسىندا يمانعالي تاسماعامبەتوۆ. سونىمەن قاتار، ول بۇل جۇمىسقا ۇكىمەتتىك ەمەس ۇيىم وكىلدەرى تارتىلاتىندىعىن اتادى. ولار زاڭناما اياسىندا قوعامدىق ۇيىم رەتىندە بالالار ۇيلەرىنىڭ قىزمەتكەرلەرىن وقىتۋ، تاربيەلەنۋشىلەردىڭ اراسىنداعى سىرقاتتاردى انىقتاۋ جانە تاعى باسقا جۇمىستاردى جۇرگىزەدى. ۆيتسە- پرەمەر وسىنداي ۇيىمداردىڭ ءبىرى رەتىندە «بالا اسىراپ الۋدى قولداۋ ورتالىعى» جوباسىن ىسكە اسىرۋشى «انا ءۇيى» قوعامدىق قورىن ەرەكشە اتادى. تالقىلاۋ بارىسىندا ق ر ءبىلىم جانە عىلىم ءمينيسترى ەرلان ساعاديەۆ بالا اسىراپ الۋدىڭ اشىقتىعى مەن قول جەتىمدىلىگىن قامتاماسىز ەتۋ ماقساتىندا اعىمداعى جىلدىڭ ءساۋىر ايىنان بەرى جەتىم بالالار مەن اتا- اناسىنىڭ قاراۋىنسىز قالعان بالالاردىڭ جانە ءوز وتباسىنا بالا اسىراپ الۋعا نيەت بىلدىرگەن تۇلعالاردىڭ رەسپۋبليكالىق مالىمەتتەر بانكى قالىپتاسقانىن ايتتى.
سوڭعى مالىمەتتەر بويىنشا جىل سايىن التى مىڭنان اسا بالا جاسوسپىرىمدەردى بەيىمدەۋ ورتالىقتارى ارقىلى اسىراپ الۋعا، قامقورلىققا جانە پاتروناتتىق تاربيەگە بەرىلەدى. سونىمەن قاتار، تۋعان اتا- انالارىنا قايتارىلادى نەمەسە جەتىمدەر مەن اتا- اناسىنىڭ قورعاۋىنسىز قالعان بالالارعا ارنالعان مەكەمەلەرگە جىبەرىلەدى. سونداي- اق، جاڭا تۋعان نارەستەلەردىڭ اتا- اناسى انىقتالماعان جاعدايدا، جەرگىلىكتى اتقارۋشى ورگانداردىڭ قورعانشى جانە قامقورشى ورگاندارى سابيلەردى بىردەن وتباسىلارىنا تاربيەگە بەرە الادى.
«بارلىق قۇزىرلى مەملەكەتتىك ورگاندار بالالاردى اسىراپ الۋعا، پاتروناتتىق تاربيەگە جانە وتباسىلارىنا بەرۋ ارقىلى جەتىم بالالار ۇيلەرىندەگى تاربيەلەنۋشىلەردىڭ سانىن قىسقارتۋ ءۇشىن بەلسەندى جۇمىس جۇرگىزۋى قاجەت»، - دەپ تۇيىندەدى ۆيتسە-پرەمەر يمانعالي تاسماعامبەتوۆ. سونىمەن قاتار، ءماجىلىس قورىتىندىسىندا ۆيتسە-پرەمەر جاۋاپتى قۇرىلىمدارعا بالا قۇقىقتارى جونىندەگى ۋاكىلمەن جانە ۇكىمەتتىك ەمەس ۇيىمدارمەن بىرلەسىپ جەتىم بالالاردى قازاقستاندىق ازاماتتاردىڭ وتبساىنا تاربيەلەۋگە بەرۋدە ۇكىمەتتىك ەمەس ۇيىمداردىڭ قاتىسۋى بولىگىندە زاڭنامانى جەتىلدىرۋ بويىنشا ۇسىنىستار ازىرلەۋدى تاپسىردى.
