الماتى وبلىسىندا قايتىس بولعان اعايىندىلاردىڭ بالالارىنا بەرىلەتىن جاردەماقى مولشەرى انىقتالدى
جارقىنبەك دولدان ۇلى، مۇقيات زارلىحان ۇلى جانە ءالىمحان قادىلبەك بيىل ۇزىناعاش ماڭىندا ولتىرىلگەنىنە بايلانىستى، اسىراۋشىسىنان ايىرىلعان وتباسىلارعا مەملەكەتتەن جاردەماقى تاعايىندالدى، - دەپ حابارلايدى Tengrinews.kz ءتىلشىسى.
كوكسۋ اۋدانىنىڭ اكىمى الماس ءادىل بۇگىنگى كۇندە قازا تاپقان اعايىندىلاردىڭ بالالارىنا ق ر زاڭناماسىنا ساي جاردەماقى تاعايىندالعانىن مالىمدەدى.
«ءۇش اعايىندىنىڭ ءولىمى الەۋمەتتىك رەزونانس تۋدىردى. ولاردى جەرلەۋ كەزىندە ەلىمىزدىڭ بارلىق وڭىرىنەن ادامدار كەلدى. ءوز كەزەگىندە، بىزدە جەرگىلىكتى ورىنداۋشى ورگان رەتىندە قالىس قالمادىق. قايتىس بولعانىن راستايتىن قاعازداردى الىسىمەن ءبىز جاردەماقىنىڭ تاعايىندالۋىنا كىرىستىك»، - دەدى اۋدان اكىمى.
- بۇگىندە قۇجاتتاردى راسىمدەۋ شاراسى اياقتالدى. سونىمەن، ءالىمحان قادىلبەكتىڭ اينابۇلاق اۋىلىندا تۇراتىن ەكى بالاسىنا 34060 تەڭگە جاردەماقى تاعايىندالدى. جارقىنبەك دولدان ۇلى مەن مۇقيات زارلىحان ۇلىنىڭ ارتىندا ءۇش بالادان قالدى، ولارعا 42290 تەڭگە جاردەماقى تاعايىندالدى»، - دەدى الماس ءادىل.
وسى وقيعادان كەيىن جارقىنبەكتىڭ اتا-اناسىنىڭ دولدان مەن بيعايشانىڭ دەنساۋلىعى سىر بەرگەن. جارقىنبەكتىڭ اناسى ءاردايىم اۋداندىق ەمحانانىڭ باقىلاۋىندا.
ەسكە سالايىق، تالدىقورعان قالاسىنا جاقىن ماڭداعى كوكسۋ اۋدانىنىڭ 3 تۇرعىنى الماتى جاقتاعى ۇزىناعاش بازارىندا مال ساتامىز دەپ ءىز-ءتۇسسىز جوعالىپ كەتكەن بولاتىن. كەيىنىرەك ولاردىڭ ءولى تابىلعانى حابارلانعان ەدى. ۆەدومستۆوداعىلاردىڭ ايتۋىنشا، مارقۇمداردىڭ دەنەسىندە زورلىق بەلگىلەر بار. وسى ىستەگى باستى فيگۋرانتتاردىڭ ءبىرى تالعات سۇلەيمانوۆ ءومىر بويىنا باس بوستاندىعىنان ايىرىلدى. ول جازاسىن ەرەكشە تارتىپتەگى كولونيادا وتەيتىن بولادى. ونىڭ سىبايلاسى مۇرات وڭالبايەۆ بولسا، 25 جىلعا دەيىن باس بوستاندىعىنان ايىرىلدى. مۇرات وڭالبايەۆ جازاسىن قاتاڭ تارتىپتەگى كولونيادا وتەيتىن بولادى. ال «قىلمىس تۋرالى حابارلاماعانى ءۇشىن» ايىپتالعان سول اۋىلدىڭ جەرگىلىكتى قويشىسى باقىت بايقاسىموۆ ءتورت جىلعا دەيىن باس بوستاندىعىنان ايىرىلدى.
