اۋىر جانە اسا اۋىر قىلمىستار ءۇشىن جازا مەرزىمى قىسقارۋى مۇمكىن - باس پروكۋراتۋرا
دەپ حابارلايدى قازاقپارات.
«بىرىنشىدەن، قىلمىستىق تەرىس قىلىقتار بويىنشا توقتاعىم كەلەدى. وسى رەتتە، قىلمىستىق قۋدالاۋ ورگاندارى وندىرىسىندەگىلەر، سوت قاراۋىنداعىلار توقتاتىلادى. وسىعان ۇقساس جاعداي اۋىر ەمەس ىستەر بويىنشا (ەكى جىلعا دەيىنگى) ىستەردە قامتىلادى. ورتاشا اۋىرلىقتاعى قىلمىستارعا قاتىستى ايتاتىن بولسام، ازاماتتاردىڭ الەۋمەتتىك ءالسىز توپتارى بويىنشا جازادان بوساتۋ قاراستىرالادى. الەۋمەتتىك تۇرعىدان ءالسىز توپتاردىڭ تىزىمىنە كىرمەگەندەردىڭ بارلىعى بوستاندىقتى شەكتەۋ جازاسىنا اۋىستىرىلادى. ياعني، ولار دا پروباتسيامەن قامتىلادى.
بۇرىنعى راقىمشىلىقتار تاۋەلسىزدىكتىڭ 25 جىلدىعىنا ارنالعان وسى شاراعا قاراعاندا وزگەشە. اتاپ ايتقاندا، وسىنىڭ الدىنداعى قىلمىستىق كودەكستە اۋىر جانە اسا اۋىر قىلمىس جاساعاندارعا قاتىستى راقىمشىلىقتى قولدانۋ مۇمكىندىگى بولماعان ەدى. 2014 -جىلى كۇشىنە ەنگەن جاڭا قىلمىستىق كودەكس وسىنداي جاعدايدى قاراستىرادى. الايدا، وندا تولىقتاي بوستاندىققا جىبەرۋ ەسكەرىلمەگەن. بۇل تۇرعىدا سوت تاعايىنداعان جازانى قىسقارتۋ شاراسى جۇزەگە اسىرىلادى. اۋىر قىلمىس بويىنشا بۇل جازا تورتتەن ءبىر بولىككە قىسقارادى. اسا اۋىر قىلمىستار باعىتىندا بەستەن ءبىر بولىككە ازايادى»، - دەدى مەركەل. ونىڭ سوزىنە قاراعاندا، كەيبىر قىلمىستاردىڭ ءتۇرى بويىنشا راقىمشىلىق قاراستىرىلماعان.
بۇدان بۇرىن حابارلانعانداي، وسى اپتادا پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسى تاۋەلسىزدىگىنىڭ 25 جىلدىعىنا بايلانىستى راقىمشىلىق جاساۋ تۋرالى» ق ر زاڭىنىڭ جوباسى جۇمىسقا الىندى. ەسكە سالا كەتەيىك، مەملەكەت باسشىسى نۇرسۇلتان نازاربايەۆ كونستيتۋتسيانىڭ 61-بابىنىڭ 1-تارماعىنا سايكەس ءوز باستاماسىمەن پارلامەنت ءماجىلىسىنىڭ قاراۋىنا «قازاقستان رەسپۋبليكاسى تاۋەلسىزدىگىنىڭ 25 جىلدىعىنا بايلانىستى راقىمشىلىق جاساۋ تۋرالى» زاڭ جوباسىن ەنگىزدى.
بۇل راقىمشىلىق شاراسى زاڭ بۇزعان ازاماتتارعا قاتىستى ىزگىلىك اكتىسى، مەملەكەت تاراپىنان مەيىرىمدىلىك پەن سەنىم ءبىلدىرۋدىڭ كورىنىسى بولىپ سانالادى. زاڭ جوباسىنا سايكەس، ازاماتتاردىڭ الەۋمەتتىك ءالسىز توپتارى، سونىڭ ىشىندە كامەلەتكە تولماعاندار، جۇكتى ايەلدەر، كامەلەتكە تولماعان نەمەسە مۇگەدەك بالالارى بار ايەلدەر، مۇگەدەكتەر، قارت ادامدار، سونداي- اق اۋىر ەمەس قىلمىستىق قۇقىق بۇزۋشىلىقتار جاساعاندار قىلمىستىق جازادان بوساتىلادى.
اۆتور: رۋسلان عابباسوۆ
