سەرىك احمەتوۆ پەن ماتايەۆتاردى راقىمشىلىقپەن بوساتۋعا قاتىستى تۇسىنىك بەرۋ ەرتە - مەركەل
بۇل تۋرالى بۇگىن پارلامەنت ماجىلىسىندە «قازاقستان رەسپۋبليكاسى تاۋەلسىزدىگىنىڭ 25 جىلدىعىنا بايلانىستى راقىمشىلىق جاساۋ تۋرال» زاڭ جوباسى بويىنشا جۇمىس توبى وتىرىسىنىڭ الدىندا تىلشىلەرگە بەرگەن سۇحباتىندا ق ر باس پروكۋرورىنىڭ ءبىرىنشى ورىنباسارى يوگان مەركەل ءمالىم ەتتى، دەپ حابارلايدى قازاقپارات.
تىلشىلەر تاراپىنان «سەرىك احمەت، سەيىتقازى جانە اسەت ماتايەۆتار وسى زاڭ جوباسى اياسىندا بوساتىلۋى مۇمكىن بە؟» دەگەن ساۋال قويىلدى.
«بۇل سۇراقتى تىم ەرتە قويىپ وتىرسىزدار. زاڭگەر رەتىندە ماعان وسى ىستەرگە تۇسىنىكتەمە بەرۋ ورىندى بولمايدى، سەبەبى زاڭ جوباسى ءالى قابىلدانعان جوق. ەگەر قابىلدانعان جاعدايدا، بۇل ساۋالعا تىڭعىلىقتى جاۋاپ بەرۋگە دايارمىن. دەپۋتاتتار قۇجاتقا وزدەرى قوسىمشا تولىقتىرۋلار ەنگىزۋى مۇمكىن نەمەسە كەيبىر تۇستارىن الىپ تاستاۋى ىقتيمال. سوندىقتان قازىر ناقتى تۇجىرىم ايتۋ قيىنداۋ»، - دەدى مەركەل.
بۇدان بۇرىن حابارلانعانداي، وسى اپتادا پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسى تاۋەلسىزدىگىنىڭ 25 جىلدىعىنا بايلانىستى راقىمشىلىق جاساۋ تۋرالى» ق ر زاڭىنىڭ جوباسى جۇمىسقا الىندى.
ەسكە سالا كەتەيىك، مەملەكەت باسشىسى نۇرسۇلتان نازاربايەۆ كونستيتۋتسيانىڭ 61-بابىنىڭ 1-تارماعىنا سايكەس ءوز باستاماسىمەن پارلامەنت ءماجىلىسىنىڭ قاراۋىنا «قازاقستان رەسپۋبليكاسى تاۋەلسىزدىگىنىڭ 25 جىلدىعىنا بايلانىستى راقىمشىلىق جاساۋ تۋرالى» زاڭ جوباسىن ەنگىزدى.
بۇل راقىمشىلىق شاراسى زاڭ بۇزعان ازاماتتارعا قاتىستى ىزگىلىك اكتىسى، مەملەكەت تاراپىنان مەيىرىمدىلىك پەن سەنىم ءبىلدىرۋدىڭ كورىنىسى بولىپ سانالادى.
«وسى جىلى قازاقستان تاۋەلسىزدىگىنىڭ 25 جىلدىق مەرەيتويىن اتاپ وتۋدە. رەسپۋبليكا كونستيتۋتسياسى ادام جانە ادامنىڭ ءومىرىن، قۇقىقتارى مەن بوستاندىقتارىن ەڭ قىمبات قازىنا دەپ جاريالايدى. گۋمانيزم قاعيداتىنىڭ ءبىر كورىنىسى وعان سايكەس راقىمشىلىق جاساۋ اكتىسىن قولداناتىن زاڭدى قابىلداۋ بولىپ تابىلادى. زاڭ جوباسىنا سايكەس، ازاماتتاردىڭ الەۋمەتتىك ءالسىز توپتارى، سونىڭ ىشىندە كامەلەتكە تولماعاندار، جۇكتى ايەلدەر، كامەلەتكە تولماعان نەمەسە مۇگەدەك بالالارى بار ايەلدەر، مۇگەدەكتەر، قارت ادامدار، سونداي-اق اۋىر ەمەس قىلمىستىق قۇقىق بۇزۋشىلىقتار جاساعاندار قىلمىستىق جازادان بوساتىلادى»، - دەدى جالپى وتىرىستا زاڭناما جانە سوت-قۇقىقتىق رەفورما كوميتەتىنىڭ ءتوراعاسى نۇرلان ءابدىروۆ.
اۆتور: رۋسلان عابباسوۆ
