اقتاۋدا جىگىتتەردىڭ سۇلتانى انىقتالدى
دەپ حابارلايدى قازاقپارات 7292info.kz سايتىنا سىلتەمە جاساپ.
«قىزداردىڭ اراسىندا وتەتىن سۇلۋلىق بايقاۋلارى ۇيرەنشىكتى جاعداي، ال ەندى جىگىتتەردىڭ اراسىندا مۇنداي سايىستار سيرەك كەزدەسەتىنى راس. «جىگىت سۇلتانى» بايقاۋى ايماقتا مۇنايشىلار اراسىندا العاش رەت وتكىزىلىپ وتىر. دايىندىققا ءبىز قاتتى ءمان بەردىك، قاتىسۋشىلاردى ۆوكالدان تۇبەككە بەلگىلى ءانشى ايدا بايگەلوۆا، بيدەن تاجىريبەلى حورەوگراف اينۇر سارييەۆا، دومبىرادان مادينا ۋتەپوۆا دايىنداپ، جۇمىستىڭ جۇيەلى جۇرگىزىلۋىن گۇلميرا بۋرحاندينوۆا قاداعالادى»، - دەيدى وبلىستىق جاستار ساياساتى ماسەلەلەرى جونىندەگى باسقارما باسشىسى امانعالي نۇرداۋلەتوۆ.
سايىسقا قاتىسۋشىلار تانىستىرۋ، سۇراق- جاۋاپ بويىنشا باقتارىن سىناپ، ونەرلەرىن ورتاعا سالدى، سونداي- اق شەگە قاعۋدان، گىر تاسىن كوتەرۋدەن تاپسىرمالاردى ورىندادى. ءبىرى- گيتارامەن ءان شىرقاسا، ەندى ءبىرى- كۇمبىرلەتە كۇي تارتىپ، ءارتۇرلى ۇلتتاردىڭ ءبيىن بيلەپ، كورەرمەننىڭ كوڭىلىن سەرپىلتتى. سۇراق- جاۋاپ بولىمىندە ەل تاۋەلسىزدىگىنىڭ 25 جىلدىعىنا وراي، ەكسپو-2017 كورمەسى، ق ر كونستيتۋتسياسىنا قاتىستى قويىلعان سۇراقتارعا جاۋاپ بەرىپ، ينتەللەكتۋالدىق دەڭگەيلەرىنىڭ دە جوعارى ەكەنىن كورسەتتى.
تارتىستى وتكەن بايقاۋدىڭ قورىتىندىسى بويىنشا باس جۇلدەنى «قاراجانباس مۇناي» ا ق بۇرعىلاۋشىسى مارات مامبەتوۆ الدى. ەكىنشى ورىنعا «بۋزاچي وپەرەيتينگ ل ت د» كومپانيا فيليالىنىڭ 4- رازريادتى مۇناي جانە گاز ءوندىرۋ جونىندەگى وپەراتورى اسحات تورەعالي لايىق دەپ تانىلسا، ءۇشىنشى ورىننان «تۇلپار مۇناي سەرۆيس» ج ش س ۇڭعىلاردى جەراستى جانە كۇردەلى جوندەۋ سەحىنىڭ بۇرعىلاۋشى كومەكشىسى امانعالي قاناتوۆ كورىندى. باس جۇلدەگە 150 مىڭ تەڭگە، ەكىنشى ورىنعا - 100 مىڭ، ءۇشىنشى ورىنعا - 50 مىڭ، سونداي- اق، ىنتالاندىرۋ سىيلىقتارىنا 10 مىڭ تەڭگەدەن تابىستالدى.
