ەلباسى كۇنى نەمەسە سپورتتاعى نۇرسۇلتاندار - فوتو
وتانداستارىمىزدىڭ قۇقىقتارى مەن بوستاندىقتارىنىڭ قورعاۋشىسى، ەلدى كەمەل كەلەشەككە جەتەلەيتىن يگى ىستەردىڭ قولداۋشىسى.
مەملەكەتىمىزگە ودان ءارى ورلەۋ مەن وركەندەۋ، ءاربىر قازاقستاندىققا - مول تابىس، باق-داۋلەت تىلەيمىز!
ەلباسىمىز سپورتقا جاناشىر ەلىمىزدەگى ءبىرىنشى ادام. سپورت - مەملەكەتتىڭ مارتەبەسىن، ۇلتتىڭ نامىسىن ايقىندايتىن كورسەتكىش. وسى ورايدا، حالىقارالىق ارەنادا قازاقستان سپورتىنىڭ بەدەلى جىل ساناپ كوتەرىلە تۇسكەنىن اڭعارا الامىز. سوڭعى جىلدارى بوي كوتەرگەن ءزاۋلىم سپورت عيماراتتارى، ەلىمىزدە ءىرى حالىقارالىق جارىستاردى وتكىزە باستاعانىمىز الەمدىك سپورتقا باسەكەلى بولا باستاعانىمىزدى دا اڭعارتادى.
بۇل رەتتە مەملەكەت باسشىسى نۇرسۇلتان نازاربايەۆتىڭ ەل سپورتىنا ەرەكشە ىقىلاسپەن قارايتىنىن ايتپاسقا بولمايدى.
شىندىعىندا، ەلباسىمىزدى ناعىز سپورتشى پرەزيدەنت دەسەك، ارتىق ايتقانىمىز بولماس. بىلە بىلسەك، نازاربايەۆ - كۇرەستەن سپورت شەبەرى. وسى ورايدا، ەلباسىمىزدىڭ باپكەرى بولعان، ۋكراينا جانە قازاقستاننىڭ ەڭبەك سىڭىرگەن جاتتىقتىرۋشىسى ليەۆ ەجيەۆسكيدىڭ ەستەلىگىنە نازار اۋدارىپ كورەلىك. «1958-جىلى ءبىزدىڭ دنەپرودزەرجينسك قالاسىنا قازاقستاننان ءبىر توپ جاس جىگىتتەر وقۋعا كەلگەن. ولار 8№ تەحۋچيليشەدە وقىدى. بىردە مەن جاتتىعۋ وتكىزەتىن زالعا شىمىر دەنەلى، تىعىرشىقتاي جاس جىگىت كەلىپ، «مەنى جاتتىعۋعا الاسىز با؟» دەپ سۇراندى.
«اتى-ءجونىڭ كىم، بۇرىن كۇرەسپەن اينالىستىڭ با؟» دەپ، وزىنە سۇراق قويدىم. «اتىم - نۇرسۇلتان، فاميليام - نازاربايەۆ، كۇرەسكە اكەمنىڭ ۇيرەتكەنى بار...» دەپ جاۋاپ بەردى.
«ولاي بولسا شەشىن، كورەيىك» دەپ، زالدا جاتتىعىپ جۇرگەن كوليا ليتوشكونى شاقىرىپ، «مىنا جىگىتتى بايقايىقشى، ءبىراز جۇلقىلاپ كورشى» دەپ كۇرەستىرىپ جىبەردىم. سول-اق ەكەن، ءوزىم ۇلكەن ءۇمىت ارتىپ جۇرگەن ليتوشكومدى نۇرسۇلتان شالت قيمىلىمەن شالىپ ءتۇسىردى. ءبارىمىز ءۇن-ءتۇنسىز قالدىق. سودان بەرى نازاربايەۆ ناعىز بالۋاندىقتى مەڭگەرە باستادى.
كوليا ەكەۋى دوس بولىپ تا كەتتى. جاتتىعۋلاردا ەرىنبەيتىن، جەڭىسكە دەگەن جىگەرى كورىنىپ تۇراتىن.
نۇرسۇلتان نازاربايەۆ دنەپرودزەرجينسك قالاسىندا وتكىزگەن ەكى جىلىندا ناعىز بالۋان بولىپ قالىپتاستى. كلاسسيكالىق جانە ەركىن كۇرەسپەن قاتار اينالىستى. اتتەڭ، كۇرەستىڭ سوڭىنا تۇبەگەيلى تۇسكەندە ۇلكەن جەتىستىكتەرگە جەتەتىن قابىلەتى بار ەدى. ءبىراز جارىستاردا ىسىلدى. ال، 1959-جىلى ول ۆتسسپس، ياعني، بۇكىل وداقتىق كاسىپوداقتاردىڭ ورتالىق كەڭەسى تۋرنيرىنىڭ چەمپيونى بولدى. ول كەزدە مۇنداي جارىستىڭ جەڭىمپازدارىنا سپورت شەبەرى اتاعى بەرىلەتىن. وسىلايشا، نازاربايەۆ سپورت شەبەرى نورماتيۆىن ورىنداعان بولاتىن. ال مەن ءۇشىن تاعى ءبىر ەرەكشە قۋانىش، سول كەزدەردەگى شاكىرتىمنىڭ ءبىرى مەملەكەت باسشىسى، ياعني پرەزيدەنت بولعانى».
مىنە، باپكەرلىك ومىرىندە 25 سپورت شەبەرىن دايارلاعان ليەۆ ەجيەۆسكي ءوزىنىڭ قول استىندا جاتتىققان نۇرسۇلتان نازاربايەۆ تۋرالى وسىلايشا اڭگىمەلەيدى.
ەلباسى - سپورت سالاسىن دامىتۋعا بايلانىستى تەك مەملەكەتتىك ماڭىزدى ءىس-شارالاردى جۇزەگە اسىرىپ قويماي، جەكە باسىنىڭ سالاۋاتتىلىعىن، ياعني، سپورتپەن شۇعىلداناتىنىن دا ونەگە ەتىپ كورسەتە الاتىن تۇلعا. بۇل ورايدا ءبىز پرەزيدەنتتىڭ سۋدا جاقسى جۇزەتىنىن، اتقا جاقسى مىنەتىنىن، تەننيس پەن گولفتى جاقسى وينايتىنىن، شاڭعىمەن جاقسى سىرعاناي بىلەتىنىن بىلەمىز. تۇپتەپ ايتقاندا، ەلباسىمىز نۇرسۇلتان نازاربايەۆ «ناعىز سپورتشى پرەزيدەنت» دەپ اتاۋعا تۇراتىن تۇلعا دەپ ايتا الامىز.
ەندى dodasport.kz سپورت پورتالى سپورتتاعى نۇرسۇلتاندار تۋرالى جازباق. قازاق سپورتىندا نۇرسۇلتان اتتى سپورتشىلار ەل نامىسىن ابىرويمەن قورعاپ ءجۇر. سولاردىڭ كەيبىرىنە توقتالا كەتسەك.
1- تاەكۆوندوشى نۇرسۇلتان مامايەۆ 2010-جىلعى جازعى جاس ءوسپىرىمدەردىڭ وليمپيالىق ويىندارىنىڭ كۇمىس جۇلدەگەرى، 2012-جىلعى لوندوندىق وليمپيادانىڭ قاتىسۋشىسى، ازيا ويىندارىنىڭ كۇمىس جۇلدەگەرى (2014)، جازعى ۋنيۆەرسيادا جانە VI دۇنيەجۇزىلىك ارميا ويىندارىنىڭ جەڭىمپازى (2015)، بىرنەشە دۇركىن جەڭىمپاز جانە حالىقارالىق رەيتينگتىك تۋرنيرلەردىڭ جۇلدەگەرى.
2- جاس كاسىپقوي بوكسشى نۇرسۇلتان جاڭابايەۆ. قازان ايىندا قىتايدىڭ ين چۋان قالاسىندا كاسىپقوي بوكس كەشى ءوتتى. نۇرسۇلتان جاڭابايەۆ العاشقى كەزدەسۋىندە- اق WBA چەمپيوندىق بەلدىكتەرىنىڭ ءبىرىن يەلەندى. قىتاي ەلىنىڭ چەمپيونى اتاعى ساراپقا سالىنعان كەزدەسۋدە جەرگىلىكتى بوكسشى سينگ يانگتى 10 راۋندتىق جەكپە-جەكتە قاپى قالدىردى. تورەشىلەر ءبىراۋىزدان جەڭىستى وتانداسىمىزعا بەردى.
كاسىپقوي بوكسشىمىز جەلتوقسان ايىنا تاعى ءبىر كەزدەسۋىن جوسپارلاپ وتىر. اۋەسقوي بوكستا دا ەل نامىسىن ابىرويمەن قورعاعان بولاتىن.
3- م م ا سپورتىنىڭ شەبەرى نۇرسۇلتان يتانوۆ. الماتى قالاسىنداعى بوكس كەشى م م ا سپورتى شەبەرلەرىنىڭ ايقاسىمەن ەستە قالدى. نۇرسۇلتانعا بۇل كەشتە وزبەكستاندىق امال حاسەنوۆ قارسىلاس اتانعان بولاتىن. ول قارسىلاسىن 34 سەكۋند ىشىندە قۇلاتىپ ءتۇسىردى. جاس سپورتشىمىزدىڭ الار اسۋلارى ءالى الدا.
4- قىزىلوردالىق نۇرسۇلتان كولدەيەۆ گىر سپورتىنان الەم چەمپيوناتىنىڭ كۇمىس جۇلدەسىن يەلەنگەن بولاتىن. ن. كولدەيەۆ گىر سپورتىنان ق ر حالىقارالىق دارەجەدەگى سپورت شەبەرى، ەرەسەكتەر اراسىندا بەس، جاستار اراسىندا ءۇش، جاسوسپىرىمدەر اراسىندا ءۇش دۇركىن قازاقستان چەمپيونى، ەۋروپا چەمپيوناتىنىڭ كۇمىس جۇلدەگەرى (2014 ج. ەستونيا)، الەم كۋبوگىنىڭ قولا جۇلدەگەرى (2014 ج. لاس- ۆەگاس)، 2 دۇركىن الەم چەمپيوناتىنىڭ قولا جۇلدەگەرى (2013 ج. رەسەي، 2014 ج. گەرمانيا)، الەم چەمپيوناتىنىڭ كۇمىس جۇلدەگەرى (2015 ج. يرلانديا)، ەۋروپا چەمپيونى (2015 ج. بولگاريا).
5- دزيۋدو سپورتىنان نۇرسۇلتان ەسىمىن جاقىن ارادا ءجيى ەستۋىمىز مۇمكىن. سلوۆەنيانىڭ گرادەك قالاسىندا دزيۋدودان تۋرپال-الي كادىروۆتى ەسكە الۋعا ارنالعان حالىقارالىق تۋرنيردە نۇرسۇلتان ماناربەك ۇلى التىننان القا تاققان بولاتىن. سپورتتىق مانسابىن ەندى عانا باستاعان جاس دزيۋدوشىمىزعا ساتتىلىك تىلەيمىز.
6- اتىراۋ وبلىسىنىڭ بوكسشىسى نۇرسۇلتان ساليحوۆ حالىقارالىق سايىستاردا ەل نامىسىن قورعاپ ءجۇر. نۇرسۇلتان قازىرگى كۇنى اتىراۋ قۇراماسى ساپىندا بىرنەشە تۋرنيرلەرگە قاتىسىپ ۇلگەرگەن. قازاقستان بوكس فەدەراتسياسىنىڭ قۇرمەتتى پرەزيدەنتى اسقار التىنبەك ۇلى قۇلىبايەۆتىڭ جۇلدەسىنە ارنالعان بوكستان حالىقارالىق ءتۋرنيردىڭ جۇلدەگەرى.
7- بوكسشى نۇرسۇلتان نۇريدەنوۆ قازاقستان جاسوسپىرىمدەر قۇراماسىنىڭ مۇشەسى. نيكولاي دميتريەۆيچ حروموۆ اتىنداعى XV بۇكىل رەسەيلىك اشىق ءتۋرنيردىڭ قولا جۇلدەگەرى. بوكستان ك س ر و سپورت شەبەرى قامبار انداشيەۆتىڭ رۋحىنا ارنالعان جاس ءوسپىرىمدەر اراسىنداعى رەسپۋبليكالىق ءتۋرنيردىڭ چەمپيونى. 2000-2001-جىلعى جاس ءوسپىرىمدەر اراسىندا قازاقستان چەمپيوناتىنىڭ جەڭىمپازى. 2016-جىلى ياكۋتيادا وتكەن «ازيا بالالار» ويىندارىنىڭ جەڭىمپازى.
8- نۇرسۇلتان تۇرسىنوۆ قازاقستان چەمپيونى (85 كەلى). بالۋانىمىز ستامبۋلدان تورىندەگى ۆەحبي ەمرە حاميت كاپلان حالىقارالىق ءتۋرنيرىنىڭ كۇمىس جۇلدەگەرى. حالىقارالىق ارەنالاردا ەل نامىسىن قورعاپ جۇرگەن بالۋان.
