ءبىرجان جاقىپوۆ: مەندە وكىنىش جوق، ۇستاتپاي كەتكەن ارمان بار

 ول 2013 -جىلعى بوكستان الماتىدا وتكەن الەم چەمپيوناتىنىڭ جەڭىمپازى - ءبىرجان جاقىپوۆ. ول بيىل ريو- دە- جانەيرودا وتكەن، ءوزى قاتىسقان سوڭعى وليمپياداسىنان كەيىن، ۇلتتىق قۇراما ساپىنان ءبىرجولاتا كەتتى. الايدا، سپورتشىنىڭ قازىر قايدا، نە ىستەپ جۇرگەنىن بۇگىنگى بوكسسۇيەر قاۋىمنىڭ ءبىرى بىلسە، ءبىرى بىلمەيدى. بۇگىن قازاقپارات ءتىلشىسى ۇزاق جىل باس باپكەر مىرزاعالي ايتجانوۆتىڭ ءتول شاكىرتى اتانىپ، 49 كەلىدە ەل نامىسىن قورعاعان ءبىرجان جاقىپوۆپەن تەلەفون ارقىلى تىلدەسىپ، قازىرگى تىنىس- تىرشىلىگىمەن وي ءبولىستى.

- ءبىرجان، ريو وليمپياداسىنان كەلگەننەن كەيىن، ۇلتتىق قۇرامادان كەتتىڭىز. قازىر قايدا، نە ىستەپ ءجۇرسىز؟

 - ءيا، قازىر بوسپىن. جۇمىس جوق، قايعى جوق. بالا- شاعامنىڭ قاسىندا راحاتتانىپ دەمالىپ جاتىرمىن (ازىلدەپ كۇلدى) .

- ۇلتتىق قۇرامادان ءوز ەركىڭىزبەن كەتتىڭىز بە؟

 - ارينە، ۇلتتىق قۇرامادا از ۋاقىت جۇرگەن جوقپىن. جاسىم دا كەلدى. جاستارعا ورىن بەرۋ كەرەك. باس باپكەر مىرزاعالي قۇلان ۇلى مەنى ءۇش وليمپياداعا اپاردى. قازاق بوكسشىلارىنان ەڭ كوپ وليمپيادا ويىندارىنا بارعان مەن ەكەنمىن. الايدا، بىردە- بىرەۋىندە جولىم بولمادى. تىم قۇرىعاندا ۇشتىككە ىلىنە المادىم. ارمانىم وليمپيادانىڭ ءبىر جۇلدەسى ەدى. ورىندالمادى. قانشا قۋساڭ دا، بۇيىرمايتىن دۇنيە بۇيىرمايدى ەكەن.

 - ەندى الداعى ۋاقىتتا نە ىستەمەك ويىڭىز بار؟

- اڭگىمەنىڭ باسىندا ازىلدەپ بولسا دا، شىنىمدى ايتىپ جاتىرمىن. قازىر بوسپىن. جۇمىسسىز جاتىرمىن. ناقتى نە ىستەيتىنىمدى ءالى شەشكەن جوقپىن. قازىر شىمكەنت قالاسىندا وتباسىمنىڭ قاسىندامىن.

- سوڭعى جىلدارى بوكستا كوپتەگەن وزگەرىستەر بولىپ، نەشە ءتۇرلى جوبالار جۇزەگە اسىپ جاتىر. سول جوبالاردىڭ بىرىندە ونەر كورسەتۋ ويىڭىزدا جوق پا؟

- ونداي ويلار جوق ەمەس، بار. ەگەر، APB جوباسى ءارى قاراي جالعاسىن تاۋىپ جاتسا، وسى جوبادا ءالى دە باق سىناپ كورگىم كەلەدى.

- قازىر جاتتىعۋ زالدارىنا بارىپ ءجۇرسىز بە؟

- جاسىرارى جوق، ريودان كەلگەننەن بەرى دەمالىپ جاتىرمىن. ءالى ەشبىر جاتتىعۋ زالدارىنىڭ ەسىگىن اشقان جوقپىن. وليمپيادا دەپ ۇزاق ۋاقىت دەمالعان جوقپىز. ءبىر ۋاقىت دەنساۋلىققا دا كوڭىل بولمەسەك بولمايدى عوي. وسى ءتورتجىلدىق دوداسى دەپ وتباسىمىزدىڭ بار ەكەنىن دە ۇمىتىپ كەتۋگە شاق قالدىق. قاشان ءبىر جۇمىستىڭ ىڭعايى كەلگەنشە ۇيدە بولعاندى ءجون سانادىم.

- ەگەر APB جوباسىنا شاقىرىپ جاتسا، قانشالىقتى دايىنسىز؟

- نەگىزىنەن دايىنمىن. اللا قالاسا، جاڭا جىلدان كەيىن، جاتتىعۋ زالدارىنىڭ ەسىگىن قايتا اشاتىن بولامىن. ءوز- وزىمە كەلگەنشە جاتتىعۋىم كەرەك.

- جاقىندا پاۆلودار قالاسىندا بوكستان ەل بىرىنشىگى ءوتىپ، ۇلتتىق قۇراما جاڭادان جاساقتالدى. جاڭا قۇراما ساپىنا ىلىككەن بوكسشىلارعا قانداي باعا بەرەسىز؟

- ەل چەمپيوناتىن باسىنان اياعىنا دەيىن كوردىم. ءار بوكسشىنىڭ بارلىق جەكپە- جەكتەرىن قالت جىبەرگەن جوقپىن. وليمپيادا ويىندارىنان كەيىن جاساقتالاتىن ۇلتتىق قۇراما ەڭ ماڭىزدى بولادى. سول ءۇشىن وعان بوكسشىلار دا ۇلكەن دايىندىقپەن قاتىسادى. سەبەبى، بۇل جولى ۇلتتىق قۇراماعا ىلىككەن بوكسشىلار كەلەسى وليمپيادا ويىندارىنا باراتىن نەگىزگى قۇرام رەتىندە الداعى حالىقارالىق، الەمدىك سىنداردا ەل نامىسىن قورعايدى. بيىلعى قۇرامدا ءسال- ءسال وزگەرىستەر بولدى. كەيبىر بوكسشىلار جاڭا سالماققا ءوتتى. جاڭا چەمپيوندار شىقتى. ءار سالماقتا باسەكەلەستىك ارتىپ كەلە جاتقانىن بايقادىم. جالپى جاڭا ۇلتتىق قۇراماعا جامان جىگىتتەر تاڭدالعان جوق.

- ءوزىڭىز ۇزاق جىل ونەر كورسەتكەن 49 كەلى سالماقتا بيىل تەمىرتاس ءجۇسىپوۆ چەمپيون اتانىپ، ءسىزدىڭ ورنىڭىزدى باستى. بۇل بوكسشىدان قانشالىقتى ءۇمىت كۇتۋگە بولادى؟

- ءيا، بيىل بۇل سالماقتا تەمىرتاس ءجۇسىپوۆ پەن ەرجان جومارت فينالدا جولىقتى. ەكەۋى دە بۇرىننان ءبىراز بيىكتەردى باعىندىرىپ ۇلگەرگەن بوكسشىلار. ونى الداعى ۋاقىت كورسەتەدى. ەكەۋىنە دە كوپ ەڭبەكتەنۋ كەرەك.

- ەكەۋىنىڭ قايسىسىنىڭ الەۋەتى جوعارى دەپ ويلايسىز؟

- وسى ەل بىرىنشىلىگىندە ءجۇسىپوۆ جومارتتان ءسال- ءسال عانا باسىم بولدى. مەنىڭ ويىمشا، ءدال بۇگىنگى تاڭدا ەكەۋىنىڭ الەۋەتى تەڭ دارەجەدە. الداعى ۋاقىتتا قايسىسى كوپ ەڭبەكتەنەدى، قايسىسى كوپ جۇمىس جاسايدى، سونىڭ ءباسى جوعارى بولادى. بارلىق ناتيجە تەك ەڭبەكپەن كەلەدى.

 - ءسىزدى ۇلتتىق قۇراما ساپىندا ەڭ كوپ ۋاقىت ونەر كورسەتكەن سپورتشى دەپ جاتىرمىز. وسى ۋاقىتتاردا جەڭىستەرىڭىز كوپ بولدى ما، الدە جەڭىلىستەرىڭىز كوپ بولدى ما؟

- سپورتتا جەڭىس پەن جەڭىلىس - ەگىز ۇعىم. جەڭىپ تە، جەڭىلىپ تە كوردىك. وليمپيادا ويىندارىنان مەدال الا الماعانىم بولماسا، وزگە ەل نامىسى سىنعا تۇسكەن جارىستاردىڭ كوبىندە جۇلدەمەن ورالدىم. ءبارى ءوز ۋاقىتىمەن بولدى. اللاعا شۇكىر، وتكەن كۇندەرىم جالپى جامان بولعان جوق. وتكەنگە سالاۋات دەيمىن.. .

- «وتكەن كۇندەرىم جامان بولعان جوق» دەپ جاتسىز. مۇمكىن، ءبىر وكىنىشتەرىڭىز دە بار شىعار؟

- وكىنىش.. . «وكىنىش» دەيسىز بە؟ جوق، مەندە ەشقانداي وكىنىش جوق. ءۇش بىردەي وليمپيادا ويىندارىنا قاتىسقان سپورتشىدا قانداي وكىنىش بولادى؟ ! مەن دە ورىندالماي كەتكەن ارمان قالدى. جالعىز ارمانىم وليمپيادا جۇلدەسى بولاتىن. سول ارمان ماڭگى ۇستاتپاي كەتتى. ەندى، ماڭگى جوق ول ماعان. قانشا جىل سول ارماندى قۋالادىم. جەتە المادىم. جەتكىزبەدى.. .

 - كوڭىلىڭىزدە الدە بىرەۋلەرگە وكپە- رەنىشىڭىز بار ما؟

- جو، جوق. ەشكىمگە وكپەم جوق. قانشا جىل سپورتتا جۇرسەم، سول ارالىقتا مەنىمەن بىرگە بولعان بارلىق باپكەرلەرىمە، ارىپتەستەرىمە، اعايىن- دوستارىما العىستان باسقا ايتارىم جوق.

- ەندى سۇحباتىمىزدى وتباسىڭىزعا بايلانىستى اڭگىمەمەن تۇيىندەسەك.

 - مەنىڭ ءوز وتباسىمدا ءتورت اعايىندىمىز. ءبىر اعام، ءوزىم جانە ەكى قارىنداسىم بار. قازىر ەكى بالانىڭ - ءبىر ۇل، ءبىر قىزدىڭ - اكەسى بولدىم. ۇيدەگى ۇلدىڭ كەنجەسى بولعان سوڭ، قارا شاڭىراققا يە بولىپ، اكە- شەشەمدى قولىما الىپ وتىرمىن. اعام دا وتباسىلى، ەكى قارىنداسىم دا تۇرمىستا. اكەم ۇزاق جىل ءبىر كاسىپورىندا ەسەپشى بولىپ قىزمەت ىستەپ، زەينەتكە شىقتى. ال، انام ءۇزاق جىل مەكتەپتە وقىتۋشىلىقپەن اينالىسىپ كەلەدى.

 - اڭگىمەڭىزگە راحمەت!

 اۆتور: كۇنسۇلتان وتارباي  

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى