قازاقشا تازا سويلەپ، قازاقشا تاربيەلەنگەن كارىس قىزى تۋرالى نە بىلەمىز؟
ول ءوزىنىڭ وتباسى، ءومىرى، قىزمەتى تۋرالى سىر شەرتىپ، ikerim.kz سايتىنا سۇحبات بەردى.
وتباسىنداعىلار تەگىس قازاقشا سويلەيتىن يرينا تەن ماحاببات جولىندا ءدىن دە، ۇلت تا، سالت-ءداستۇر دە ماڭىزدى ەمەس ەكەنىن تىلگە تيەك ەتتى.
«مەن ەگەر ءبىر ادامدى جاقسى كورسەم، وعان قاتىستى نارسەلەردىڭ ءبارىن قابىلداۋىم كەرەك دەپ تۇسىنەمىن. ونىڭ جۇمىسىن، وتباسىن، مىنەزىن، سالت-ءداستۇرىن ءبارىن قابىلدايمىن»، - دەگەن ول ۇلتتىق ەرەكشەلىكتەرگە ءمان بەرمەيتىنىن جاسىرمادى.
ءوزىنىڭ وتباسىنا توقتالا كەتكەن يرينا قاراپايىم، ءبىراق باقىتتى وتباسىندا دۇنيەگە كەلگەنىن جاسىرماي ايتتى.
«اكەمنىڭ ەسىمى تەن سەرگەي ۆلاديميروۆيچ، انامنىڭ ەسىمى تە ۆالەنتينا سەرگەيەۆنا. اتالارىم رەپرەسسيا جىلدارىندا ارال ماڭىنا كوشىپ كەلگەن ەكەن. اكەم سول جەردە تۋىلعان. ال انام تاشكەنتتەن، ەكەۋى الماتى قالاسىندا تانىسقان. مەنەن ءتورت جاس ۇلكەن تۋعان اعام بار، ۇيلەنگەن. جەڭگەم قازاق، ەسىمى - شولپان. ەكەۋى قازىر ءبىر ءتاپ-ءتاتتى بالاپاننىڭ اتا-اناسى. وتباسىمىزدا ءبارىمىز قازاقشا سويلەيمىز. ءتىل جاعىنان بىزدە ەش قيىندىق جوق»، - دەدى تەلەجۇرگىزۋشى.
سونىمەن بىرگە، يرينا كەيدە تەلەجۇرگىزۋشىلىكتەن باسقا كەيدە توي باسقارۋدان دا قاشپايتىنىن جاسىرمادى.
«توي باسقارۋ وتە جاقسى تابىس كوزى. ءبىراق مەنىڭ جەكە پىكىرىم اسابالىق ەر ازاماتتارعا جاقسىراق جاراساتىن سياقتى. اسابا بولۋ، جۇرتتى باسقارۋ، ءسوزىڭدى تىڭداتۋ، ءازىلىڭدى وتكىزۋ دەگەن - وتە ۇلكەن ونەر. بۇل كاسىپپەن اينالىسۋ ءۇشىن ماعان ءالى دە ءبىراز نارسە ۇيرەنۋ كەرەك سياقتى. ءبىراق تاجىريبەمدەگى توي باسقارۋ جانىمداعى مىقتى اسابالار بولعاندىقتان وتە جاقسى ءوتتى»، - دەدى ول.
