ناعيما ەسقاليەۆا اتاق ءۇشىن وزىنە دورەكى ۇسىنىس جاسالعانى تۋرالى ايتتى
وتباسىنداعى كەلىسپەۋشىلىك سالدارىنان بىرنەشە بالاسىن الدىرتىپ تاستاعان. مۇنىمەن قاتار، حالىق ءارتيسى اتاعى ءۇشىن توسەك قاتىناسىن ۇسىنعاندار دا بولىپتى.
بۇل تۋرالى 31-ارنانىڭ «ۇيات ەمەس» باعدارلاماسىندا ايتىلدى.
- جەكە ءومىرىڭىز تۋرالى از ايتاسىز. نەگە؟
- ايەل ادامنىڭ قانداي دا ءبىر قۇپياسى بولۋى كەرەك. ارينە، مەنىڭ دە ومىرىمدە ءتۇرلى جاعداي بولدى. جاقسى، جامان، قۇلاپ، ارتىنشا قايتار جۇگىرگەن ساتتەر دە بولدى. قىزعانىش پەن كورەالماۋشىلىق تا قاتار ءجۇردى. قازىر مۇنىڭ بارلىعىن ارتتا قالدىردىم. ەڭ باستىسى، ءومىرىڭدى قالاي سۇرگەنىڭ ەمەس، سوڭىندا قانداي وي تۇيگەنىڭ. ءبىرىنشى كۇيەۋىم ساشا ابلايەۆ تاماشا ادام بولدى. وعان تۇرمىسقا شىققان كەزدە 25 جاستا بولاتىنمىن.
مەنەن جۇلدىز جاسادى دەسەم ارتىق ايتپايمىن. ونى جاقسى كورەمىن. ول دا مەنى جاقسى كورگەن شىعار. ءبىز «گۇلدەر» انسامبلىندە تانىستىق. تاسقىن وقاپوۆتىڭ ورنىنا كەلگەن بولاتىن. ونىڭ جۇرەگىن جاۋلاعىسى كەلگەن قىزدار وتە كوپ بولدى. ەڭ باستىسى، ەكەۋىمىز ماحابباتپەن قوسىلدىق. مەن ماحابباتتى باعالامايتىن بولسام، حالىق ءارتيسى اتاعىن وسىدان 20 جىل بۇرىن الاتىن ەدىم. ىشتەي سونداي كۇيىندىم. ءتىپتى، بۇل اتاقتى العان سوڭ دا اسا قۋانبادىم. جوعارى جاقتان ماعان وسى اتاققا بايلانىستى ۇياتسىز ۇسىنىستار ءتۇستى.
- قانداي ايەل بولدىڭىز؟
- جاقسى ايەل بولدىم. سەبەبى، ۇيلەنگەنىمىزگە ەكى اي بولعاندا مەن گاسترولدىك ساپارعا كەتىپ قالدىم. اقشا تاپتىم، ال كۇيەۋىم بالاعا قاراپ وتىردى. بۇل ونىڭ ەركەكتىك نامىسىنا ءتيدى دەپ ايتا المايمىن. دياس قاتتى اۋىردى. ونىڭ جانىندا ەكەۋىمىزدىڭ بىرەۋىمىز مىندەتتى تۇردە قالۋىمىز كەرەك ەدى. دياتەزدىڭ سالدارىنان ونىڭ ءتىرى جەرى بولمادى دەسەم دە بولادى.
- ەكەۋىڭ نە سەبەپتى اجىراستىڭىزدار؟
- ءبىر- ءبىرىمىزدى تۇسىنبەدىك. ونىڭ ۇستىنە مەنەن 7 جاس ۇلكەن ەدى. مەن قىدىرىپ، كوڭىل- كوتەرگەندى ۇناتاتىنمىن. ونىڭ مەنى قىزعانعان ساتتەرى دە بولعان سياقتى. مەنىڭ دە وعان سەنىمسىزدىك تانىتقان كەزدەرىم بولدى. ساشا مەنىڭ دوستارىم ءۇشىن دە، مەن ءۇشىن دە تاماشا ادامداردىڭ ءبىرى بولدى. ومىرىمدە كوپ بالا تۋماعانىم ءۇشىن عانا وكىنەمىن. دياس مەديتسينالىق كارتامدى كورىپ الىپ، «انا، سەن تۇسىك تاستاعان ەكەنسىڭ عوي. سەن سولاي جاساماعانىڭدا مەنىڭ ءىنىم نەمەسە قارىنداسىم بولاتىن ەدى» دەپ ايتىپ وتىرادى. مەن «ءيا، ءبىراق ولاردى تۋسام، سەن مىنا جارىق دۇنيەنى كورمەيتىن ەدىڭ» دەيمىن. ايەل ادام نە مانساپتى، نە وتباسىنى تاڭداۋى كەرەك. قازىر قانداي جاعداي بولماسىن، بالانىڭ ءبىرىنشى ورىندا تۇرۋى كەرەك ەكەنىن تۇسىنەمىن.
- سۇحباتتارىڭىزدىڭ بىرىندە «كۇيەۋىم وڭباعان ادام بولدى» دەدىڭىز. نەگە؟
- ناقتى قايسىسى تۋرالى ايتىپ جاتىرسىز؟ مەنىڭ ەكى كۇيەۋىم بولدى. ءبىرىنشى كۇيەۋىم تاماشا ادام بولدى، ەكىنشىسى وڭباعان ەدى. ەكەۋىمىز تەك 10 ايداي بىرگە جۇرە الدىق. قازىر سول كۇندەرىم ءۇشىن قاتتى وكىنەمىن. تانىمال ادامنىڭ بەت-اۋزى كوگەرىپ جۇرگەنى ۇيات نارسە. سونداي قورقىنىشتى. ۇياتتان جەرگە كىرەردەي بولىپ كەتەسىڭ. ونىمەن بىردەن اجىراسپاۋىما ارامىزدا بولعان كەي باقىتتى كۇندەر مەن ونىڭ قازاقتىعى سەبەپ بولدى. سوڭىندا سىيىمىز جاراسپادى. مەنى سەبەپسىز قىزعاندى.
بۇل تاقىرىپتا ارى قاراي ايتقىم كەلمەيدى. تەك قىزدارعا مۇنداي ادامداردان بىردەن قاشۋعا كەڭەس بەرەمىن. ءبىر قول كوتەرگەن ادام ەكىنشى رەت تە قول كوتەرەدى. ەركەك «مەن تولىقتاي وزگەردىم. بىزدە بارلىعى جاقسى بولىپ كەتەدى» دەسە، مۇلدەم سەنبەڭدەر. ال ەگەر كەشىرەتىن بولساڭدار، اي سايىن، جىل سايىن توپەشتەي بەرەتىن بولادى. وكىنىشكە وراي، ماحابباتىمىز ءبىز اڭساعانداي بولا بەرمەيدى. مۇنى ءوز تاجىريبەمنەن بىلەمىن. مەن جاناشىرلىق تانىتاتىن ارتيستەر بىزدە وتە كوپ. مانساپ پەن اتاق ءۇشىن بىرگە جۇرگەندەر دە بار.
- ەكىنشى نەكەڭىزدەر كەيىن جۇرەگىڭىز وزگە ادامدارعا اشىق بولدى ما؟
- ءيا، جۇرەگىم تولىقتاي اشىق بولدى. ماحاببات بولدى، قازىر دە بار. ونەر ادامدارى ماحابباتسىز ءومىر سۇرە المايدى. ادەتتە ماعان ۇناۋ وتە قيىن. ماعان ۇناۋ ءۇشىن شىنايى كۇلە الاتىن، اقىلدى ادام بولۋى قاجەت. اقشاسى بولماسا دا، ساراڭ بولماسىن. مۇنى بارلىعىنا قاتىستى ايتىپ جاتىرمىن.
