بىرەر كۇندە باستالاتىن «ەۋرازيا بارىسىن» تىكەلەي ەفيردەن كورۋگە بولادى

2013-جىلدان وتكىزىلىپ كەلە جاتقان بايراقتى باسەكەگە بيىل قازاق سپورتشىلارىنان بولەك، 8 ەلدىڭ، اتاپ ايتقاندا، گرۋزيا، موڭعوليا، پولشا، رەسەي، تاجىكستان، تۇركيا، وزبەكستان بالۋاندارى قاتىسادى.

بيىل تۋرنيرگە قاتىسۋشىلاردىڭ اراسىندا الەمدىك جۇلدىزدار وتە كوپ. ماسەلەن، گرۋزيا قۇراماسى اتىنان سامبودان ءتورت مارتە چەمپيون ۆ. چيدراشۆيلي، ەۋروپانىڭ ەكى دۇركىن چەمپيونى د. لاريوشۆيلي، الەم مەن ەۋروپا چەمپيوناتتارىنىڭ جەڭىمپازدارى شىعادى.

موڭعوليانىڭ نامىسىن سامبو بويىنشا الەم چەمپيونى ا. باياراا، دزيۋدودان الەمدىك گران-پريلەر جەڭىمپازى ح. گانبولد، سونداي-اق «ەۋرازيا بارىسى» تۋرنيرىنىڭ 2014-جىلعى جەڭىمپازدارى قورعايدى.

ال قازاقستان اتىنان مارات نىعماتۋللايەۆ، ەرجان ماعاۋينوۆ، باقداۋلەت ءسابيتوۆ، ايدوس عالىموۆ، داۋلەت پاحريدەنوۆ، ايبول ايتبەك جانە مۇحيت تۇرسىنوۆ پەن ايبەك نۇعىماروۆ سەكىلدى سوم بىلەكتى، ارىستان جۇرەكتى جىگىتتەر شىعادى.

ءار كوماندا 1 تورەشى، 1 باپكەر جانە 8 سالماق دارەجەسىندە شىعاتىن (55 كەلى، 60 كەلى، 66 كەلى، 74 كەلى، 82 كەلى، 90 كەلى، 100 كەلى جانە 100 كەلىدەن جوعارى) 8 بالۋاننان تۇرادى.

بالۋانداردىڭ جاسى مىندەتتى تۇردە 18 دەن اسقان جانە ءوزى كەلگەن ەلدىڭ ازاماتى بولۋى شارت. سونىمەن قاتار، ولار مىندەتتى تۇردە مەديتسينالىق تەكسەرۋدەن، سالماق ولشەۋدەن، دوپينگ-تەستتەن جانە دايىندىق جاتتىعۋدان وتەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى