قازاقستاندا بيزنەس نەسيەلەردىڭ قولجەتىمدىگى ارتپاق

بۇل تۋرالى بۇگىن ۇكىمەت وتىرىسىندا ناتيجەلى جۇمىس جانە جاپپاي كاسىپكەرلىكتى دامىتۋ باعدارلاماسىن تانىستىرۋ بارىسىندا دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا ءمالىم ەتتى، دەپ حابارلايدى قازاقپارات.

«وسى ماقساتتاردا باعدارلاما اياسىندا قازىر قولدانىلىپ وتىرعان «بيزنەستىڭ جول كارتاسى»، «جۇمىسپەن قامتۋ جول كارتاسى» جانە «اگروبيزنەس» شاعىن نەسيەلەندىرۋدىڭ بارلىق تەتىكتەرىن بىرىكتىرۋ قاراستىرىلىپ وتىر. ەكىنشىدەن، شاعىن نەسيەلەردى اۋىلدارمەن قاتار، قالالارعا ۇسىنۋ ەسكەرىلگەن. بۇل نەسيەلەر تەك شاعىن بيزنەستى اشۋ مەن جۇمىس ىستەپ تۇرعان شارۋاشىلىقتاردى كەڭەيتۋگە عانا ەمەس، سونىمەن قاتار كووپەراتيۆتەردى قۇرۋعا جانە تۇرمىستىق ينفراقۇرىلىمدى جاقسارتۋعا بەرىلەدى»، - دەدى مينيستر.

ونىڭ سوزىنە قاراعاندا، اۋىل شارۋاشىلىعى كووپەراتيۆتەرى ءۇشىن نەسيە سوماسىن قازىر قاراستىرىلعان 6 ميلليون تەڭگەدەن 16 ميلليون تەڭگەگە دەيىن ارتتىرۋ كوزدەلىپ وتىر.

سايكەسىنشە، قارىزدى قايتارۋ مەرزىمى 7 جىلعا دەيىن ۇلعايادى. ال قالعان قىزمەتتەر ءۇشىن شاعىن نەسيەلەر «جۇمىسپەن قامتۋ جول كارتاسىنىڭ» قولدانىستاعى تالاپتارىنا سايكەس بەرىلەدى، ياعني بەس جىل مەرزىمدە 6 ميلليون تەڭگەگە دەيىن.

نەسيەنىڭ جىلدىق مولشەرلەمەسى قارىز الۋشىعا 6 پايىز دەڭگەيىندە ساقتالادى. مۇنىمەن قوسا، نەسيەلەردىڭ قولجەتىمدىگىن كەڭەيتۋگە باعىتتالعان تاعى ءبىر جاڭا شارادا قارجى ينستيتۋتتارىنان كەپىلدىك بولعان جاعدايدا، كەپىل زاتسىز 1,5 ميلليون تەڭگەگە دەيىن سومادا نەسيە بەرۋ قاراستىرىلعان. «بۇل تاجىريبەنى بۇگىندە «دامۋ» قورى قولداپ وتىر. مەنىڭ ويىمشا، ءبىز ونى وسى باعدارلاما اياسىندا قولدانا الامىز»، - دەدى ت. دۇيسەنوۆا.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى