ۇلتتىق ءبىرىڭعاي تەستىلەۋدى تاپسىرماعان تۇلەكتەر ءبىرىنشى ماماندىعىن تەگىن الادى
بۇل تۋرالى بۇگىن ۇكىمەت وتىرىسىندا ناتيجەلى جۇمىس جانە جاپپاي كاسىپكەرلىكتى دامىتۋ باعدارلاماسىن تانىستىرۋ بارىسىندا دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا ءمالىم ەتتى، دەپ حابارلايدى قازاقپارات.
«جاڭا باعدارلامانىڭ ءبىرىنشى نەگىزگى باعىتى جاپپاي وقىتۋدى ۇيىمداستىرۋ بولىپ تابىلادى. ونىڭ اياسىندا ازاماتتارعا ءبىرىنشى جانە ەكىنشى ماماندىقتى اقىسىز الۋعا مۇمكىندىك ۇسىنىلادى. 15-تەن 24 جاسقا دەيىنگى جاستار ءۇشىن ءبىرىنشى جۇمىسشى ماماندىعىن تەحنيكالىق جانە كاسىبي وقىتۋ بازاسىندا الۋعا مۇمكىندىك بەرىلەدى. وسى رەتتە ۇ ب ت تاپسىرماعان مەكتەپ تۇلەكتەرى، وقۋ ورنىنا تۇسپەگەن جاستار قاتارىنان 21 مىڭ جۋىعىن قامتۋ جوسپارلانىپ وتىر»، - دەدى مينيستر.
ونىڭ سوزىنە قاراعاندا، وقۋ مەرزىمى 2,5 جىلعا ەسكەرىلگەن. وقىتۋعا جۇمسالاتىن شىعىستارعا ءبىلىم بەرۋ ءۇردىسى، شاكىرتاقى مەن ءبىر مەزگىلدىك تاماقتاندىرۋ ەنىپ وتىر. سونىمەن قاتار 25-تەن 44 جاسقا دەيىنگى ازاماتتار ءۇشىن ەكىنشى ماماندىقتى الۋ مۇمكىندىگى بار. ولار ءۇشىن كوللەدجدەر، ۇلتتىق كاسىپكەرلەر پالاتاسىنىڭ وقىتۋ ورتالىقتارى بازاسىندا دۋالدى ءبىلىم بەرۋدىڭ قىسقا مەرزىمدى كۋرستارى ۇيىمداستىرىلادى.
«دۋالدى ءبىلىم بەرۋ جۇمىس ورنىندا جەتەكشىسىمەن بىرگە جۇرگىزىلەدى جانە وقىتۋدىڭ 40-50 پايىزىن قۇرايدى. جەتەكشى رەتىندە تەك ءوندىرىستىڭ قىزمەتكەرى عانا ەمەس، سونىمەن قاتار ناقتى كاسىپپەن اينالىساتىن جەكە كاسىپكەر دە بولا الادى. ولار وقىتقاننان كەيىن، ءتالىم العان ادام وسى كاسىپكەرگە جۇمىسقا قالادى نەمەسە بۇل كاسىپپەن بولەك اينالىسۋعا مۇمكىندىگى بار»، - دەپ ناقتىلادى ت. دۇيسەنوۆا.
مۇنىمەن قوسا، شالعايداعى اۋىلدىق جەرلەردەگى تۇرعىندار ءۇشىن جەرگىلىكتى جەرلەردە وقىتۋعا ارنالعان موبيلدى كاسىبي- تەحنيكالىق وقۋ ورىندارى ۇيىمداستىرىلماق. جىل سايىن قىسقا مەرزىمدى كۋرستارمەن 26-56 مىڭ ادامدى قامتۋ كوزدەلىپ وتىر.
اۆتور: رۋسلان عابباسوۆ
