قازاقستان مەن رەسەي ورتاق تۋريستىك كەڭىستىك قالىپتاستىرۋدى جانداندىرادى
اسسامبلەيا جۇمىسى اياسىندا تاۆريا سارايىندا تۋريزم سالاسى بويىنشا قازاقستان-رەسەي ىنتىماقتاستىعىن دامىتۋ ماسەلەلەرى قارالعان قازاقستان پارلامەنتى سەناتى مەن رەسەي فەدەراتسياسى فەدەرالدى جيىنى فەدەراتسيا كەڭەسى اراسىنداعى ىنتىماقتاستىق جونىندەگى كوميسسيانىڭ توعىزىنشى وتىرىسى ءوتتى.
وعان ۆيتسە-سپيكەرلەر سەرگەي گروموۆ پەن ءىلياس ۋماحانوۆ ءتوراعالىق ەتتى. مارات يعاليەۆ قازاقستان مەن رەسەي اراسىنداعى تۋريزم سالاسىن دامىتۋدىڭ نەگىزگى ماسەلەلەرىنە توقتالدى. «ءى ج و- گە قوساتىن تۋريزم كورسەتكىشىنىڭ تومەندىگى؛ ىشكى تۋريزمنىڭ دامۋ دەڭگەيىنىڭ جەتكىلىكسىزدىگى مەن سىرتقا شىعۋ تۋريزمى باعىتتارىنىڭ ارتىقشىلىعى؛ تۋريزمدى دامىتۋ ەسەبىنەن جاڭا جۇمىس ورىندارىن قۇرۋ كورسەتكىشىنىڭ تومەندىگى؛ تۋريزم سالاسىنا ەكونوميكاداعى داعدارىستىڭ كەرى اسەر ەتۋى سياقتى ماسەلەلەر بار.
مۇنداي جاعدايدا ءبىزدىڭ ەلدەر بىرلەسكەن تۋريستىك ونىمدەردى بارىنشا ۇسىنۋ كەرەك. اسىرەسە قىتاي نارىعىنا شىعارۋدى قولعا الۋ قاجەت. سونىمەن قاتار، شەكارالىق ىنتىماقتاستىقتى دامىتۋ؛ سىرتقى نارىققا قازاقستان مەن رەسەيدىڭ تۋريستىك الەۋەتىن پاش ەتۋ؛ شەتەلدىك تۋريستەر ءۇشىن ۆيزالىق جانە تىركەلۋ ماسەلەلەرىن شەشۋ؛ ىشكى تۋريزمدى دامىتۋ سياقتى نەگىزگى جۇمىستاردى قولعا الۋ قاجەت»، - دەدى م. يعاليەۆ.
ىنتىماقتاستىق جونىندەگى كوميسسيا جۇمىسىنىڭ قورىتىندىسى بويىنشا ەكىجاقتى نەگىزدە جانە ينتەگراتسيالىق قۇرىلىمدار اياسىنداعى ازاماتتاردىڭ تۋريستىك قىزمەتتەرگە قول جەتكىزۋىن قولايلى جاعدايمەن قامتاماسىز ەتەتىن ورتاق تۋريستىك كەڭىستىك قالىپتاستىرۋ ۇدەرىسىن جانداندىرۋ جانە ءوزارا ءىس-قيمىلدىڭ زاڭدىق، الەۋمەتتىك- قۇقىقتىق، گۋمانيتارلىق قىرلارىن پىسىقتاۋ قاجەتتىگى اتاپ ءوتىلدى.
2017-جىلى قازاقستان مەن رەسەي ۇكىمەتتەرى اراسىنداعى كەلىسىمدى بەكىتۋگە ىقپال ەتۋ؛ ە ا ە و مۇشە مەملەكەتتەردىڭ تۋريزم سالاسىنداعى زاڭنامالاردى ودان ءارى ۇيلەستىرۋ جانە تۋريزم سالاسىنداعى ستاندارتتاردى سايكەستەندىرۋ بويىنشا ىنتىماقتاستىق؛ تۋريزم سالاسىنداعى تۇراقتى قاۋىپسىزدىك جۇيەسىن قالىپتاستىرۋ، تۋريستىك قىزمەتتى ۇيىمداستىرۋ جاعدايلارى مەن قاعيدالارى؛ ماماندار ازىرلەۋدىڭ ءبىرىڭعاي جۇيەسىن قۇرۋ؛ ينتەگراتسيالىق ۇدەرىستەردىڭ ارتىقشىلىقتارى مەن فاكتورلارىن پايدالانۋ، ونىڭ ىشىندە قوناقجايلىق يندۋسترياسىن قۇرۋدا ايماق-ارالىق جانە شەكارالىق ەكونوميكالىق، الەۋمەتتىك جانە مادەني بايلانىستاردى نىعايتۋ بويىنشا جۇمىستار جالعاساتىن بولادى.
