قازاقستاندىق «الەمنىڭ جىگىت سۇلتانى» بايقاۋىندا جەڭىمپاز اتاندى دەگەن اقپارات جالعان بولىپ شىقتى
يسمايلوۆتىڭ ينستاگرام پاراقشاسىندا جاريالانعان اقپاراتتى ءبىرقاتار قازاقستاندىق ب ا ق كوشىرىپ باسقان سوڭ، قازاقپارات بايقاۋ تۋرالى سۇراستىرىپ كوردى. رەداكسيا نيۋ-يوركتە وتكەن شارا تۋرالى رەسمي اقپارات كوزىن سول كۇيى تاپپادى. ونىڭ ۇستىنە، «MISTER ЕАTSH-2017» جازۋىندا قاتە بار. (Earth - اعىلشىن تىلىنەن اۋدارعاندا «جەر» ماعىناسىن بەرەدى - رەد.).
وسىعان بايلانىستى، قازاقپارات ءتىلشىسى «Mister Kazakhstan» ۇلتتىق بايقاۋىنىڭ ديرەكسياسىنا حابارلاسىپ، رەسمي مالىمدەمە الدى. «بايرام يسمايلوۆ «Mister Kazakhstan» ۇلتتىق بايقاۋىنىڭ قاتىسۋشىسى ەمەس جانە ونىڭ بايقاۋ ديرەكتسياسىنا ەش قاتىسى جوق. «قازاقستان سۇلتانى-2015» اتاعىنىڭ رەسمي ەمەس ەكەنىن ەستەرىڭىزگە سالعىمىز كەلەدى. PR- جارناما ماقساتىندا بايرام يسمايلوۆ ءوز بەتىمەن گرامماتيكالىق قاتەسى بار لەنتا جاساپ، حالىقارالىق بايقاۋعا قاتىسى جوق لوگوتيپتى بەينەلەگەن.
سونىمەن بىرگە، حالىقارالىق بايقاۋدىڭ فينالىنان ءبىر دە ءبىر سۋرەتى جوق: «سايىستا بولعانىن دالەلدەيتىن backstage, selfie جانە ەسەپ- سۋرەتى بولماعان»، - دەپ ايتىلادى حابارلامادا. كونكۋرس ۇيىمداستىرۋشىلارى نيۋ-يوركتە حالىقارالىق ەرلەر بايقاۋى مۇلدەم وتكىزىلمەگەنىن تىلگە تيەك ەتەدى. ديرەكسيانىڭ مالىمدەۋىنشە، بايرام يسمايلوۆتىڭ سىرتقى بەت-بەينەسى - بويى مەن دەنە سالماعى حالىقارالىق تالاپتارعا ساي ەمەس. العاش رەت قازاقستاندا «Mister Kazakhstan» ۇلتتىق كونكۋرسى 2016 -جىلى ءوتتى.
ەسكە سالا كەتسەك، «Mister Earth Kazakhstan 2016» تيتۋلىنىڭ العاشقى رەسمي ءارى قازىرگى يەگەرى «Mister Kazakhstan 2016» ۇلتتىق كونكۋرسىنىڭ جەڭىمپازى بولات مۇراتبەكوۆ. 2017 -جىلدىڭ اقپان ايىندا گۆاتەمالادا وتەتىن «Mister Earth 2016» حالىقارالىق كونكۋرسىندا قازاقستان اتىنان باق سىنايدى»، - دەدى كونكۋرس ديرەكسياسى.
